ދިވެހިރާއްޖޭގެ 6 ރަށެއްގައި ފެނާއި ނަރުދަމާގެ ޚިދުމަތް އިތުރަށް ފުޅާކުރުމަށް ބޭނުންވާ މުހިންމު މަޝްރޫޢުތަކެއް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އާ މިއަދު ޙަވާލުކޮށްފިއެވެ.

މި މަސައްކަތްތަކާ ގުޅޭ އެއްބަސްވުންތަކުގައި މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީގެ ފަރާތުން ސޮއިކުރެއްވީ ސްޓޭޓް މިނިސްޓަރ ޢަލީ ފާރިޝް ޔޫސުފެވެ. އަދި ސްޓެލްކޯގެ ފަރާތުން ސޮއިކުރެއްވީ އެ ކުންފުނީގެ ޑެޕިއުޓީ މެނޭޖިންގ ޑިރެކްޓަރ ޢާއިޝަތު މުޒްނާގެ އިތުރުން ޑެޕިއުޓީ މެނޭޖިންގ ޑިރެކްޓަރ ޢަބްދުﷲ ނާޒިރެވެ.

މި އެއްބަސްވުންތަކުގެ ދަށުން ފެނާއި ނަރުދަމާގެ ނެޓްވޯކް ފުޅާކުރުމަށް ހަމަޖެހިފައިވަނީ ހއ. އުލިގަމު، ހއ. މޮޅަދޫ، ރ. ކިނޮޅަސް އަދި ބ. މާޅޮހުގެ ޓޫރިޒަމް ޒޯނުތަކުގައެވެ. މީގެއިތުރުން، ހއ. އިހަވަންދޫ އަދި ރ. އިންނަމާދޫގައި އަލަށް މީހުން އާބާދުވަމުން އަންނަ ސަރަޙައްދުތަކަށްވެސް މި ޚިދުމަތްތައް ފޯރުކޮށްދިނުމަށް ވަނީ ހަމަޖެހިފައެވެ.

އިޝްތިހާރު އިޝްތިހާރު

މި މަޝްރޫޢުތަކުގެ ތަފްޞީލް:

  1. ހއ. އުލިގަން: 22.3 މިލިއަން ރުފިޔާގެ މި މަޝްރޫޢު ނިންމުމަށް ކަނޑައަޅާފައިވަނީ 1 އަހަރު ދުވަހުގެ މުއްދަތެކެވެ.

  2. ހއ. މޮޅަދޫ: 29 މިލިއަން ރުފިޔާ ޚަރަދުވާ މި މަސައްކަތް ނިންމުމަށް 1 އަހަރު ދުވަސް ދީފައިވެއެވެ.

  3. ރ. ކިނޮޅަސް: 18 މިލިއަން ރުފިޔާގެ މި މަޝްރޫޢުގެ މަސައްކަތްވެސް ނިންމުމަށް ހަމަޖެހިފައިވަނީ 1 އަހަރު ދުވަހުގެ ތެރޭގައެވެ.

  4. ބ. މާޅޮސް: މި މަޝްރޫޢަށް 10.7 މިލިއަން ރުފިޔާ ޚަރަދުވާއިރު، މަސައްކަތް ނިންމުމަށް ދީފައިވަނީ 270 ދުވަހުގެ މުއްދަތެކެވެ.

  5. ހއ. އިހަވަންދޫ: 17 މިލިއަން ރުފިޔާގެ މި މަޝްރޫޢު ނިންމުމަށް ހަމަޖެހިފައިވަނީ 1 އަހަރު ދުވަހުންނެވެ.

  6. ރ. އިންނަމާދޫ: 19.1 މިލިއަން ރުފިޔާ ޚަރަދުވާ މި މަސައްކަތްވެސް 1 އަހަރު ދުވަހުގެ ތެރޭގައި ނިންމުމަށް ވަނީ އެއްބަސްވެވިފައެވެ.

މި މަޝްރޫޢުތަކަކީ އެ ރަށްރަށުގައި އަލަށް ފުޅާވަމުން އަންނަ ޓޫރިޒަމްގެ ވިޔަފާރިތަކަށާއި، އަލަށް އާބާދުވާ ސަރަޙައްދުތަކުގައި ދިރިއުޅޭ ރައްޔިތުންނަށް އަސާސީ ޚިދުމަތްތައް ފުރިހަމައަށް ފޯރުކޮށްދިނުމަށްޓަކައި ސަރުކާރުން އިސްކަންދީގެން ފަށާފައިވާ މުހިންމު މަސައްކަތްތަކެކެވެ.