ރާއްޖޭގައި ވަޒީފާ އަދާކުރާ ބިދޭސީންނާ ގުޅޭގޮތުން ވަޒީފާދޭ ފަރާތްތަކުން ދައުލަތަށް ދައްކަންޖެހޭ ފައިސާގެ ތެރެއިން 1.1 ބިލިޔަން ރުފިޔާ ހޯދާފައިވާކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިޙްސާން ވިދާޅުވެއްޖެއެވެ.
ވަޒީރު މިހެން ވިދާޅުވީ ބުރާސްފަތި ދުވަހު ބޭއްވުނު “ރިޔާސީ ބަޔާން 2025” ފޯރަމްގައި ވާހަކަފުޅު ދައްކަވަމުންނެވެ. މި ފޯރަމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއްވެވި ރިޔާސީ ބަޔާނާ ގުޅޭގޮތުން ބޭއްވުނު ފޯރަމެކެވެ.
ވަޒީރު އިޙްސާން ވިދާޅުވިގޮތުގައި، ރާއްޖޭގައި ވަޒީފާ އަދާކުރާ ބިދޭސީންގެ ފަރާތުން ދައުލަތަށް ލިބެންޖެހޭ ފައިސާގެ ޖުމްލަ އަދަދަކީ 1.8 ބިލިޔަން ރުފިޔާއެވެ. އޭގެ ތެރެއިން މިހާތަނަށް 1.1 ބިލިޔަން ރުފިޔާ ހޯދާފައިވާކަމަށް ވަޒީރު ފާހަގަކުރެއްވިއެވެ. މިހާރު ދައުލަތަށް ލިބެންޖެހޭ ފައިސާގެ އަދަދު ގާތްގަނޑަކަށް 600 މިލިޔަން ރުފިޔާއަށް ކުޑަކުރެވިފައިވާކަމަށްވެސް ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ، ރާއްޖޭގައި އޮތް ބިދޭސީންގެ މައްސަލަ ހައްލުކުރުމަށް ގިނަ މަސައްކަތްތަކެއް ކުރަމުންދާ ކަމަށެވެ. މީގެ ތެރޭގައި ޤަވާއިދާ ޚިލާފަށް އުޅޭ ބިދޭސީން ހޯދުމުގެ މަސައްކަތްތަކާއި ބިދޭސީންގެ މަޢުލޫމާތު އެއްކުރުމުގެ މަސައްކަތް ހިމެނެއެވެ. “އޮޕަރޭޝަން ކުރަނގި” ޕްރޮގްރާމްގެ ދަށުން މިހާތަނަށް 44,000 ބިދޭސީންގެ ބަޔޯމެޓްރިކް ޑޭޓާ އެއްކުރެވިފައިވާކަމަށްވެސް ވަޒީރު ހާމަކުރެއްވިއެވެ.
މީގެ އިތުރުން، ވަޒީރު އިޙްސާން ވަނީ މަސްތުވާތަކެތީގެ މައްސަލަ ހައްލުކުރުމަށް ކުރެވޭ މަސައްކަތްތަކާ ބެހޭގޮތުންވެސް މަޢުލޫމާތު ދެއްވާފައެވެ. މިގޮތުން، މިއަހަރުގެ ތެރޭގައި ރާއްޖޭގެ 3 ސަރަޙައްދެއްގައި ކޮމިއުނިޓީ ރިހެބިލިޓޭޝަން ފަރުވާއާއެކު ޑްރަގް އޮފެންޑަރ ރިމާންޑް ސެންޓަރުތަކެއް ތަރައްޤީކުރުމަށް ނިންމާފައިވާކަމަށް ވަޒީރު ވިދާޅުވިއެވެ.
ވަޒީރުގެ ވާހަކަފުޅުގައި، މިދިޔަ އަހަރު 1.2 ބިލިޔަން ރުފިޔާގެ މަސްތުވާތަކެތި ހުއްޓުވާފައިވާކަމަށާއި، އަތޮޅުތަކަށް ޚާއްސަކޮށްގެން މަސްތުވާތަކެތި ނައްތާލުމަށް ޚާއްސަ މަސައްކަތްތަކެއް ކުރަމުންދާކަމަށްވެސް ފާހަގަކުރެއްވިއެވެ. މިގޮތުން ފުވައްމުލައް ސިޓީގައި ޑްރަގް ކެފޭތައް ހަދައިގެން ވިއްކުން ހުއްޓުވާ، އެކަންކަން ކުރަމުން އައި މީހުން ހައްޔަރުކޮށްފައިވާކަމަށް ވަޒީރު ވިދާޅުވިއެވެ.
ކިޔުންތެރިންގެ ހިޔާލު