ތާރީޚީ ކުޅުންތެރިޔާ ލިއޮނެލް މެސީ ޤައުމީ ޓީމަށް ކުޅުން ހުއްޓާލުމަށްފަހު، އާޖެންޓީނާ ކުޅުނު ފުރަތަމަ މެޗުން އުރުގުއާއީ އަތުން 1-2 އިން އެ ޓީމު ބަލިވެއްޖެއެވެ.

އާޖެންޓީނާގެ މަޝްހޫރު ލަ ބޮމްބޮނޭރާ ސްޓޭޑިއަމްގައި ކުޅުނު މި ރަހުމަތްތެރިކަމުގެ މެޗު ބެލުމަށް ވަދެފައިވަނީ ދަނޑުގެ ޖާގައިގެ ދެބައިކުޅަ އެއްބައެއްހާ ސަޕޯޓަރުންނެވެ. މިއީ މެސީގެ ރިޓަޔަމަންޓަށްފަހު ކޯޗު ލިއޮނެލް ސްކަލޯނީގެ އިރުޝާދުގެ ދަށުން އާޖެންޓީނާ ނުކުތް ފުރަތަމަ މެޗެވެ. ސްކަލޯނީ ދާދިފަހުން ވަނީ 2030 ވަނަ އަހަރާ ހަމައަށް ޓީމުގެ ކޮންޓްރެކްޓް އާކޮށްފައެވެ. ނަމަވެސް، އޭނާގެ އެހީތެރިޔާ ވޯލްޓާ ސެމިއުލް ވަނީ އަމިއްލަ ކޯޗިން ކެރިއަރެއް ފެށުމަށްޓަކައި ޓީމާ ވަކިވެ، ސަޕޯޓަރުންނަށް އަލްވަދާޢު ކިޔާފައެވެ.

އިންޓަ މިލާންގެ ކުރީގެ ތަރި ޑިއޭގޯ ފޯލާންގެ ކޯޗުކަމުގެ ދަށުން ނުކުތް އުރުގުއާއީއާ ދެކޮޅަށް އާޖެންޓީނާއިން ވަރުގަދަ ފެށުމެއް ފަށާނެ ކަމަށް ބެލެވުނު ނަމަވެސް، އެ ޓީމަށް ދިމާވީ ހީނުކުރާ ފަދަ ނާކާމިޔާބީއެކެވެ. މެސީ ބޭނުންކުރި 10 ނަންބަރު ޖާޒީ މި މެޗުގައި އެއްވެސް ކުޅުންތެރިއަކަށް ދީފައިނުވާއިރު، ސްކަލޯނީ އެޓޭކަށް ނެރުނީ ނިކޯ ޕާޒް، ހޫލިއަން އަލްވަރޭޒް އަދި ތިއާގޯ އަލްމާޑާއެވެ.

އިޝްތިހާރު އިޝްތިހާރު

މެޗުގެ ދެވަނަ ހާފު ފެށިގެން 48 ވަނަ މިނެޓުގައި އޭއެސް ރޯމާގެ ޑިފެންޑަރު ލިއޮނާޑޯ ބަލާޑީ އަތުން ބައިކޮޅަށް ވަން ލަނޑުން އުރުގުއާއީން ލީޑު ނެގިއެވެ. އަދި އޭގެ ފަސް މިނެޓު ފަހުން، 53 ވަނަ މިނެޓުގައި މެކްސީ އަރައުހޯ ވަނީ ލަނޑެއް ޖަހައި އުރުގުއާއީގެ ލީޑު ފުޅާކޮށްދީފައެވެ. މެޗުގެ 73 ވަނަ މިނެޓުގައި ހޫލިއަން އަލްވަރޭޒް އާޖެންޓީނާއަށް ލަނޑެއް ކާމިޔާބުކޮށްދިން ނަމަވެސް، ނަތީޖާ އެއްވަރުކުރެވޭ ގޮތެއް ނުވިއެވެ.

އަނިޔާގެ ސަބަބުން ކެޕްޓަން ލައުޓާރޯ މާޓިނޭޒް ނުކުޅޭ މި މެޗުގައި ކޯމޯގެ ނިކޯ ޕާޒް އަދި ބަލާޑީ ވަނީ ފުރިހަމަ 90 މިނެޓު ކުޅެފައެވެ. އަދި ރޯމާގެ މަޓިއަސް ސޯލޭ ދެވަނަ ހާފުގައި ކުޅެން އެރި ނަމަވެސް، ބެންޗުގައި ތިބި ޓްރޮއިލޯ، ޕެރޯނޭ، މަސްޓަންޓުއޯނޯ، ސިމިއޯނޭ އަދި ކާސްޓްރޯއަށް މެޗުން ފުރުސަތެއް ނުލިބެއެވެ.