ސްރީލަންކާއަށް އެތެރެކުރާ ދިވެހިރާއްޖޭގެ ހިކިމަހުން މިހާރު ނަގަމުން އަންނަ ޓެކްސްގެ 96 އިންސައްތަ އުނިކުރުމަށް އެ ޤައުމުގެ ރައީސް އަނޫރާ ކުމާރާ ދިސަނަޔަކަ ހުށަހަޅުއްވައިފިއެވެ.

ރައީސް ދިސަނަޔަކަ މި ހުށަހެޅުން ހުށަހެޅުއްވީ ބުރާސްފަތި ދުވަހު އެ ޤައުމުގެ ޤާނޫނުހަދާ މަޖިލީހަށް ހުށަހެޅުއްވި 2027 ވަނަ އަހަރުގެ ދައުލަތުގެ ބަޖެޓުގައެވެ. މި އިސްލާޙާއެކު، ލަންކާއަށް އެތެރެކުރާ ދިވެހި ހިކިމަހުން ނަގާ ސްޕެޝަލް ކޮމޮޑިޓީ ލެވީ (އެސްސީއެލް) ކިލޯއަކަށް ނަގާ އަދަދު 302 ރުޕީސްއިން 10 ރުޕީސްއަށް ދަށްވެގެންދާނެއެވެ. މިއީ ކޮންމެ ކިލޯއަކުން 292 ރުޕީސްގެ ބޮޑު ކުޑަވުމެކެވެ. ރަސްމީ ދުވަހެއްގެ ގޮތުން މި ބަދަލަށް ޢަމަލުކުރަން ފެށުމަށް ހަމަޖެހިފައިވަނީ ނޮވެމްބަރު 13 ވާ ހުކުރު ދުވަހުން ފެށިގެންނެވެ.

މީގެ އިތުރުން، ބަޖެޓުގައި ވަނީ ލަންކާއަށް އެތެރެކުރާ ހާމަހުގެ އެސްސީއެލްވެސް 100 ރުޕީސްއިން 10 ރުޕީސްއަށް ކުޑަކުރުމަށް ހިމަނާފައެވެ. އަދި މުގުރާފައި ހުންނަ ހިކި މިރުހާއި ނުމުގުރާ ހުންނަ ހިކި މިރުހުން ނަގާ ލެވީން ކިލޯއަކަށް 50 ރުޕީސް ދަށްކުރުމަށްވެސް ވަނީ ނިންމާފައެވެ.

އިޝްތިހާރު އިޝްތިހާރު

ރައީސް ދިސަނަޔަކަ މަޖިލީހުގައި ފާހަގަކުރެއްވި ގޮތުގައި، އެސްސީއެލް ކުޑަކުރަން ހުށަހެޅުއްވި މައިގަނޑު ސަބަބަކީ އަސާސީ ކާބޯތަކެތީގެ އަގުބޮޑުވުމުގެ ސަބަބުން ޢާންމު ރައްޔިތުން އުފުލަންޖެހިފައިވާ ތަކުލީފުތަކަށް ތަސައްލީއެއް ހޯއްދަވައިދެއްވުމެވެ. މި ތިން ބާވަތުން ނަގާ ޓެކްސް ކުޑަކުރި ނަމަވެސް، ހަކުރުން ނަގާ ޓެކްސް އިތުރުކުރުމާއެކު، އެސްސީއެލްއަށް ގެނެވޭ ބަދަލުތަކުން އަހަރަކު 950 މިލިއަން ރުޕީސްގެ ސާފު އާމްދަނީއެއް ދައުލަތަށް ލިބޭނެ ކަމަށް ބަޖެޓުގައި ވަނީ ލަފާކޮށްފައެވެ. ސަރުކާރުން ހާމަކުރި ގޮތުގައި ހަކުރުގެ އަގު މަތިކުރަން ނިންމީ އެ ޤައުމުގައި ހަކުރު އުފައްދާ ވިޔަފާރިތަކަށް އިންޞާފުވެރި ވާދަވެރި މާޙައުލެއް ޤާއިމުކޮށްދިނުމަށެވެ.

ދިވެހި ހިކިމަހުން 302 ރުޕީސްގެ ލެވީއެއް ނަގަން ފަށާފައިވަނީ 2020 ވަނަ އަހަރުގެ އޮކްޓޫބަރު މަހުގެ 27 ވަނަ ދުވަހުއެވެ. އޭގެ ކުރިން އެ ރޭޓް ހުރީ ކިލޯއަކަށް 102 ރުޕީސްގައެވެ. އޭރު އެ ލެވީ ތިން ގުނައާ ގާތްކުރާ މިންވަރަކަށް ބޮޑުކުރީ ލަންކާގެ އަމިއްލަ މަސްވެރިކަން ޙިމާޔަތްކުރުމުގެ ބޭނުމުގައި ކަމަށް އެ ޤައުމުގެ ފިޝަރީޒް މިނިސްޓްރީން އޭރު ވަނީ ހާމަކޮށްފައެވެ. މި ނިންމުމަށް ގެނެވޭ ލުޔާއެކު، ލަންކާގެ ބާޒާރުގައި ދިވެހި ހިކިމަހުގެ އަގު ވަރަށް ބޮޑަށް ހެޔޮވެގެންދާނެ ކަމަށް ބެލެވެއެވެ.