މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ އާރުޓީއެލް ފެރީ ޚިދުމަތުގައި ހަރަކާތްތެރިވާ 23 މުވައްޒަފަކު، ދިވެހިރާއްޖޭގެ ޤައުމީ ދިފާޢީ ބާރު (އެމްއެންޑީއެފް) އިން މިދިޔަ އޮކްޓޫބަރު މަހު ހިންގި ކަނޑުމަތީގެ ނުރައްކާތަކުން ރައްކާތެރިވުމުގެ ޚާއްޞަ ތަމްރީނެއް ކާމިޔާބުކަމާއެކު ނިންމާލައިފިއެވެ.

މި ތަމްރީނު ކުރިއަށް ގެންގޮސްފައިވަނީ 2026 ވަނަ އަހަރުގެ އޮކްޓޫބަރު މަހުގެ 27 އިން 29 ގެ ނިޔަލަށެވެ. މި ހަރަކާތުގައި ބައިވެރިވެފައިވަނީ އާރުޓީއެލް ފެރީތައް ދުއްވާ ކެޕްޓަނުންނާއި އޭގެ ފަޅުވެރިންނެވެ.

އެމްޓީސީސީން ބުނި ގޮތުގައި، "މެރިން ޑިޒާސްޓަރ މެނޭޖްމަންޓް ޓްރޭނިންގ" ގެ ނަމުގައި އެމްއެންޑީއެފުން އިންތިޒާމުކުރި މި ޕްރޮގްރާމަކީ ކަނޑުމަތީގައި ދިމާވެދާނެ ކުއްލި ނުރައްކާތަކާ ކުރިމަތިލުމަށް މުވައްޒަފުން ތައްޔާރުކުރުމުގެ ބޭނުމުގައި ކުރިއަށްގެންދިޔަ ތަމްރީނެކެވެ. މި ތަމްރީނުގެ މައިގަނޑު އަމާޒަކީ ދަތުރުކުރާ ފަސިންޖަރުންގެ ރައްކާތެރިކަން ދެމެހެއްޓުމަށް ބޭނުންވާ މުހިންމު ހުނަރުތަކާއި މަޢުލޫމާތު މުވައްޒަފުންނަށް ފޯރުކޮށްދިނުމެވެ.

އިޝްތިހާރު އިޝްތިހާރު

މިއީ ފެރީ ދަތުރުފަތުރުގެ ޚިދުމަތުގެ ފެންވަރު މަތިކޮށް، ދަތުރުވެރިންނަށް އަމާން ދަތުރެއް ކަށަވަރުކޮށްދިނުމަށް އެމްޓީސީސީން ކުރަމުންދާ މަސައްކަތްތަކުގެ ބައެކެވެ. ރާއްޖޭގެ އެކި ކަންކޮޅުތަކަށް އާރުޓީއެލްގެ ވިއުގަ ފުޅާވަމުން އަންނައިރު، މަސައްކަތްތެރިންގެ ފެންވަރު މަތިކުރުމަށް އެ ކުންފުނިން ދަނީ ގިނަ ފުރުޞަތުތަކެއް ފަހިކޮށްދެމުންނެވެ.