ޑްރަގް ކެފޭ ގޮތުގައި ހިންގި 20 ތަނެއް ބަންދުކޮށްފި އެވެ.
މައުލޫމާތު ދެއްވަމުން ދާހިލީ ސަލާމަތާއި ފަންނިއްޔާތާ ބެހޭ ވުޒާރާއިން ބުނީ މަސްތުވާތަކެއްޗާއި ދެކޮޅަށް ކުރާ މަސައްކަތުގައި މިހާތަނަށް މުހިންމު ކާމިޔާބީތަކެއް ހޯދާފައިވާ ކަމަށެވެ. މާލެއާ އަތޮޅުތެރޭގައި ހިންގާ ޑްރަގް ކެފޭތައް ބަންދުކުރުމަށް ޚާއްސަ އިސްކަމެއްދީގެން ގިނަ މަސައްކަތްތަކެއް ކުރަމުންދާ ކަމަށާ އަމާޒަކީ އަންނަ ނޮވެންބަރު މަހުގެ ނިޔަލަށް އެފަދަ ހުރިހާ ތަނެއް ބަންދުކުރުން ކަމަށެވެ.
އެގޮތުން މިހާތަނަށް ޖުމްލަ 20 ތަނެއް ބަަންދުކޮށްފައިވާ ކަމަށް އެ ވުޒާރާއިން ބުންޏެވެ.
އިއްޔެ އޮތް ނޫސްވެރީންގެ ބައްދަލްވުމުގައި އެކަމާއި ގުޅޭގޮތުން ސުވާލުކުރުމުން ދާހިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިޙްސާން ވިދާޅުވީ މީގެ ކުރީން ވެސް އެތައް ފަހަރެއްގެ މަތީން ބަންދުކޮށްފައިވާ ޑްރަގް ކެފޭތައް އެބަހުރި ކަމަށެވެ.
އަދި މިހާރު ޤާނޫނުން ލިބިފައިވާ ބާރުތަކާއެކު ތަކުރާރުކޮށް އެފަދަ ކަންކަން ކުރުމަށް ދެން ފުރުސަތު ނުލިބޭނެ ކަމަށް ވަޒީރު ވިދާޅުވި އެވެ.
“ޑްރަގްގެ މައްސަލާގައި އަދުގެ ސަރުކާރުގެ ޓޮލަރެންސް ވަރަށް ވަރަށް ކުޑަވާނެ. ކުރީން ފިޔަވަޅު ނާޅާ ވަރަށް ގިނަ ކަންކަމަށް އަޅުގަނޑުމެން މިދަނީ ފިޔަވަޅު އަޅަމުން. ފިޔަވަޅުތައް އަޅަން ވެގެން ޤާނޫނުން އިތުރު މަގުތައް މިވަނީ ފުޅާކޮށްފައި. އަދި އަޅާ ފިޔަވަޅުތައް އިތުރަށް ވަރުގަދަވެފައި މިވަނީ،” ވަޒީރު
މީގެ އިތުރުން ފަރުވާގެ ނިޒާމު ފުޅާކުރުމަށް ވެސް ޚާއްސަ އިސްކަމެއް ދެއްވައިގެން މަސައްކަތް ކުރަމުން ގެންދާ ކަމަށެް ވަޒީރު ވިދާޅުވި އެވެ. އެގޮތުން ލ. ގަމާއި ކ. ކާށިދޫ އާއި ނ. ވެލިދޫގައި ފަރުވާގެ ނިޒާމު ހިންގާއިރު ކ. ހިންމަފުށީގައި 500 މީހުންގެ ޖާގައިގެ މަރުކަޒެއް ޤާއިމު ކުރުމުގެ މަސައްކަތް ކުރަމުންދާ ކަމަށް ވިދާޅުވި އެވެ.
ކިޔުންތެރިންގެ ހިޔާލު