ސައުދީ ޕްރޯ ލީގުން ކުލަބުތަކަށް ހުށަހެޅި ހުށަހެޅުމަކަށް، އެ ޤައުމުގެ އެންމެ ބޮޑު ތިން ކުލަބު ކަމަށްވާ އަލް ހިލާލް، އަލް ނަޞްރު އަދި އަލް އިއްތިހާދުން ދެކޮޅުހަދައިފިއެވެ. މިއީ އެ ޓީމުތަކުގެ ޕްރެކްޓިސްތަކުގެ ސިއްރު ހިފެހެއްޓުމަށް ބާރުއަޅައި ނިންމި ނިންމުމެކެވެ.
ލީގުން ކްލަބުތަކުގައި އެދިފައިވަނީ މަދުވެގެން މަހަކު އެއްފަހަރު، ފުރަތަމަ ޓީމުގެ ފަރިތަކުރުންތައް ސަޕޯޓަރުންނާއި މީޑިއާއަށް ހުޅުވާލުމަށެވެ.
“އައްރިޔާޟިއްޔާ” ނޫހަށް މައުލޫމާތު ލިބިފައިވާ ގޮތުގައި، މި ހުށަހެޅުމާ ދެކޮޅު ހެދި ކްލަބުތަކުގެ ލިސްޓުގެ ކުރީގައި އުޅެނީ އަލް-ހިލާލް، އަލް-ނަސްރު އަދި އަލް-އިއްތިހާދެވެ. ސައުދީ ރޯޝަން ލީގުގެ ފަރިތަކުރުންތައް ގަވާއިދުން، މަދުވެގެން މަހަކު އެއްފަހަރު ސަޕޯޓަރުންނާއި މީޑިއާއަށް ފެންނާނެހެން ބޭއްވުމަށް އެދި މި ތިން ކްލަބަށް ލީގުގެ ފަރާތުން މިދިޔަ ހަފުތާގައި ވަނީ ސިޓީއެއް ފޮނުވާފައެވެ.
މި ހުށަހެޅުމަށް ނޫނެކޭ ބުނި ކްލަބުތަކުން ވަނީ އެކަން އަމަލީ ގޮތުން ތަންފީޒު ކުރުމުގައި ހުރި ކަންބޮޑުވުންތައް ފާޅުކޮށްފައެވެ. ކްލަބުތަކުގެ ކޯޗިން ސްޓާފުން ބޭނުންވަނީ ފަރިތަކުރުންތަކުގެ ސިއްރުތައް ހިފެހެއްޓުމަށާއި، ހާއްސަކޮށް ބޮޑެތި މެޗުތަކުގެ ކުރިން ރާވާ ފަންނީ އަދި އުކުޅުތަކާ ގުޅޭ މަސައްކަތްތައް ހާމަވިޔަނުދީ ސަލާމަތް ކުރުމަށެވެ. މިކަމާ ގުޅިގެން އަލް-ހިލާލް، އަލް-ނަސްރު އަދި އަލް-އިއްތިހާދުން ލީގާ އެކު ބައްދަލުވުމެއް ބާއްވައި، މި ހުށަހެޅުން އުވާލުމަށް ނުވަތަ ޓީމުތަކުގެ ފަންނީ މަސައްކަތްތަކާއި ސިއްރުތަކަށް އިހުތިރާމްކުރެވޭ ފަދަ ހައްލެއް ހޯދުމަށް މަޝްވަރާ ކުރާނެ ކަމަށް ބެލެވެއެވެ.
ލީގުގެ މި ހުށަހެޅުމުގެ ފަހަތުގައިވާ މައިގަނޑު މަގުސަދަކީ ކްލަބުތަކާއި ސަޕޯޓަރުންނާ ދެމެދު އޮންނަ ގުޅުން ވަރުގަދަކުރުމާއި، ޓީމުތަކުގެ ތައްޔާރީތައް ކަވަރުކުރުމަށް މީޑިއާއަށް ފުޅާ ދާއިރާއެއްގައި ފުރުސަތު ދިނުމެވެ. އަދި ސައުދީ ރޯޝަން ލީގާ ގުޅޭގޮތުން މީޑިއާ އާއި ސަޕޯޓަރުންގެ މެދުގައި އޮންނަ މުއާމަލާތްތައް އިތުރު ހަރުފަތަކަށް ގެންދިއުމެވެ.
އޮސްޓްރޭލިއާގެ ކޯޗު އެންޖް ޕޯސްޓެކޮގްލޫ ބޭއްވި ނޫސްވެރިންގެ ބައްދަލުވުމަށްފަހު، ބުދަ ދުވަހު ބޭއްވި އަލް-ނަސްރުގެ ފަރިތަކުރުންތައް ވަނީ މީޑިއާއަށް ހުޅުވާލާފައެވެ.
ކިޔުންތެރިންގެ ހިޔާލު