ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަލަށް އުފެއްދެވި “މޯލްޑިވްސް އައުޤާފް އިންވެސްޓްމަންޓްސް ލިމިޓެޑް”ގެ ޑިރެކްޓަރުންގެ ބޯޑަށް މެންބަރުން އައްޔަންކުރައްވައިފިއެވެ.
މި ކުންފުންޏަކީ ކުންފުނީގެ ޤާނޫނުގެ 15 ވަނަ މާއްދާއިން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚުތިޔާރުގެ ދަށުން، މިދިޔަ މަހުގެ 12 ވަނަ ދުވަހު ނެރުއްވި ޚާއްޞަ ޤަރާރަކުން އުފައްދަވާފައިވާ ކުންފުންޏެކެވެ. މިއީ ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތީން، ދީނީ ކަންކަމަށް ހޭދަކުރުމަށްޓަކައި ރާއްޖޭގެ އެކި ކަންކޮޅުތަކުގައި ވަޤުފުތައް ބިނާކުރުމާއި، އެފަދަ ބިނާތައް މަރާމާތުކޮށް ބެލެހެއްޓުމަށް އުފެއްދެވި ކުންފުންޏެކެވެ.
މީގެއިތުރުން، ރާއްޖޭގެ އެކި ސަރަޙައްދުތަކުގައި މިސްކިތްތައް ބިނާކުރުމާއި، އާބާތުރަ ފިލުވައި މަރާމާތުކުރުމުގެ އިތުރުން މިސްކިތްތަކަށް ބޭނުންވާ ވަސީލަތްތައް ޤާއިމުކުރުމާއި، އިސްލާމީ ޝަރީޢަތް ހުއްދަކުރާ ވިޔަފާރީގެ މުޢާމަލާތްތައް ދެމެހެއްޓެނިވި ގޮތެއްގައި ހިންގުމަކީވެސް މި ކުންފުނީގެ މައިގަނޑު މަޤްޞަދުތަކުގެ ތެރޭގައި ހިމެނޭ ކަންކަމެވެ.
ރައީސުލްޖުމްހޫރިއްޔާގެ ޤަރާރުގައި ބަޔާންކޮށްފައިވާ ގޮތުގައި، ކުންފުނީގެ ރައުސްމާލަކީ 100 ރުފިޔާގެ މަގުން 1،000,000 (އެއް މިލިއަން) ހިއްސާގެ މައްޗަށް ބަހާލެވިފައިވާ 100 މިލިއަން ރުފިޔާއެވެ. އަދި ޝަރުޢީ ބޭނުންތަކަށާއި އެހެނިހެން ހާލަތްތަކުގައިވެސް ކުންފުނީގެ ދަރަންޏަށް ސަރުކާރުން ޒިންމާވާނީ، ކަނޑައެޅިފައިވާ ރައުސްމާލުގެ ތެރެއިން އެއްވެސް މިންވަރެއް ދައްކާފައި ނުވާނަމަ، ހަމައެކަނި އެ މިންވަރަކަށް ކަމަށްވެސް އެ ޤަރާރުގައި ވެއެވެ.
މޯލްޑިވްސް އައުޤާފް އިންވެސްޓްމަންޓްސްގެ ޗެއަރޕާސަންގެ މަޤާމަށް އައްޔަންކުރައްވާފައިވަނީ އައްޝައިޚް ޢިއްޒަދީން ޢަދުނާނެވެ. އަދި މެނޭޖިންގ ޑިރެކްޓަރަކަށް އައްޔަންކުރައްވާފައިވަނީ ޔާމީން އިދުރީސްއެވެ.
ކުންފުނީގެ ބޯޑު މެންބަރުން:
- ހުސައިން ޝާމް އާދަމް
- ޑރ. މުޙައްމަދު ޝުޖާޢު
- މަރްޔަމް ނިހާޔަތު
- ޢަބްދުﷲ ޢަލީ
- މުޙައްމަދު ޙިލްމީ
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރިން ވިދާޅުވެފައިވަނީ، ދީނީ ކަންކަމަށް ކުރެވޭ ހޭދަތައް އިތުރުކޮށް، ޒަމާނީ ފެންވަރަށް މިސްކިތްތައް ބިނާކުރުމަކީ ސަރުކާރުގެ މުހިންމު އަމާޒެއް ކަމަށެވެ. އަދި އިސްލާމީ ޝަރީޢަތާ އެއްގޮތްވާ ގޮތުގެ މަތީން ވިޔަފާރީގެ ހަރަކާތްތައް ފުޅާކުރުމާއެކު، އަލަށް އުފެއްދެވި ޤައުމީ ވަޤުފު ކުންފުނި ވެގެންދާނީ ރާއްޖޭގެ މިސްކިތްތައް ބެލެހެއްޓުމާއި ވަޤުފު އިމާރާތްތައް ތަރައްޤީކުރުމުގައި މުހިންމު ދައުރެއް އަދާކުރާނެ ކުންފުންޏަކަށް ކަމުގައި އެމަނިކުފާނު ފާހަގަކުރެއްވިއެވެ.
ކިޔުންތެރިންގެ ހިޔާލު