ގދ. ތިނަދޫ ސިޓީއަކަށް ބަދަލުކުރުމަށްޓަކައި އެ ރަށުގެ އާބާދީގެ މައުލޫމާތު އޮޅުވާލި ކަމަށް ބުނެ، އެ ސިޓީގެ މޭޔަރު ސައުދު އަލީގެ މައްޗަށް ދައުލަތުން އުފުލާފައިވާ ދެ ދައުވާއެއްގެ ޝަރީއަތް މާދަމާ ހެނދުނު ކްރިމިނަލް ކޯޓުގައި ފެށުމަށް ތާވަލުކޮށްފިއެވެ.
ސައުދުގެ މައްޗަށް ދައުލަތުން ކުރަނީ އެނގިހުރެ ސައްހަ ނޫން ލިޔުމެއް ދިނުމުގެ ދައުވާ އާއި ރަސްމީ އިދާރާއަކަށް ދޮގު މައުލޫމާތު ދިނުމުގެ ދައުވާއެވެ. މި މައްސަލައިގެ އަޑުއެހުން ތާވަލުކޮށްފައިވަނީ މާދަމާ ހެނދުނު 9:00 އަށެވެ. މި މައްސަލައިގެ ތަހުގީގު ފުލުހުން ނިންމައި ޕްރޮސެކިއުޓާ ޖެނެރަލް އޮފީހަށް ފޮނުވީ މިދިޔަ އޮގަސްޓް މަހު އެވެ. ޕީޖީން ކޯޓަށް މައްސަލަ ހުށަހެޅީ މިދިޔަ މަހުގެ ތެރޭގައެވެ.
ޕީޖީ އޮފީހުން ބުނިގޮތުގައި، ސައުދު މެއި 17، 2021 އިން ފެށިގެން ތިނަދޫ ކައުންސިލްގެ ރައީސްގެ މަގާމުގައި ހުންނެވި ދުވަސްވަރު، ލާމަރުކަޒީ ގާނޫނުގައި ސިޓީއެއްގެ ދަރަޖަ ލިބުމަށް ކަނޑައަޅާފައިވާ ޝަރުތު ފުރިހަމަވާކަން ދެއްކުމަށްޓަކައި މަރުވެފައިވާ މީހުންނާއި ސައްހަކަން ކަށަވަރުނުވާ މައުލޫމާތު ހިމަނައިގެން އާބާދީ ލިސްޓެއް ލޯކަލް ގަވަމަންޓް އޮތޯރިޓީ (އެލްޖީއޭ) އަށް ފޮނުވާފައިވެއެވެ.
އަދި އައިޑީ ކާޑު ނަންބަރު ހިމެނޭ ސައްހަ ލިސްޓެއް ހިއްސާކުރުމަށް އެލްޖީއޭއިން އެދުމުން، އެހެން ރަށްރަށުގެ މީހުންނާއި ތަކުރާރުވާ ނަންތައް ހިމަނައިގެން، ތިނަދޫގެ އާބާދީއަކީ 10,150 ކަމަށް ދައްކުވައިދޭ ލިސްޓެއް ސައުދު ސޮއިކުރައްވައި އެލްޖީއޭއަށް ފޮނުވާފައިވާ ކަމަށްވެސް ޕީޖީން ބުނެއެވެ. މީގެ އިތުރުން، އެ ލިޔެކިޔުންތައް ހޯދުމަށް ފުލުހުން އެދުމުން އެފަދަ ރެކޯޑެއް ނެތް ކަމަށް ބުނެ ފެކްސް މެދުވެރިކޮށް ދޮގު މައުލޫމާތު ދިން ކަމުގެ ތުހުމަތުވެސް ސައުދުގެ މައްޗަށް ކުރެއެވެ.
މި ދައުވާތަކުގެ އަދަބުތަކަށް ބަލާއިރު، އެނގިހުރެ ސައްހަ ނޫން ލިޔުމެއް ދިނުމުގެ ކުށުގެ އަސާސީ އަދަބަކީ 1 އަހަރާއި 7 މަހާއި 6 ދުވަހުގެ ޖަލު ހުކުމެކެވެ. އަދި ރަސްމީ އިދާރާއަކަށް ދޮގު މައުލޫމާތު ދިނުމުގެ ކުށުގެ އަސާސީ އަދަބަކީ 4 މަހާއި 24 ދުވަހުގެ ޖަލު ހުކުމެކެވެ.
ކިޔުންތެރިންގެ ހިޔާލު