ހދ. ހަނިމާދޫގައި އިމާރާތް ކުރަމުންދާ މިސްކިތުގެ މަސައްކަތުގެ ތެރެއިން މިހާރު ކުރިއަށްދަނީ ތިރީ ފަންގިފިލާގެ ރާނައި ސިމެންތި ޖެހުމުގެ މަސައްކަތް ކަމަށް އެމްޓީސީސީން ބުނެފިއެވެ.
މި މަޝްރޫއަކީ ނިމިދިޔަ ސަރުކާރުން އަމިއްލަ ކުންފުންޏަކާ ހަވާލުކޮށްގެން ކުރިއަށްގެންދިޔަ ނަމަވެސް، މަސައްކަތް ހުއްޓި ގިނަ ދުވަސްތަކެއް ވެފައިވާތީ މި ސަރުކާރުން 8 އޭޕްރީލް 2025 ގައި އެމްޓީސީސީއާ އަލުން ހަވާލުކުރި މަޝްރޫއެކެވެ.
އިސްލާމީ ކަންތައްތަކާ ބެހޭ ވުޒާރާއިން އެމްޓީސީސީއާ މި މަސައްކަތް ހަވާލުކޮށްފައިވަނީ 7,933 އަކަ މީޓަރުގެ ސަރަހައްދެއްގައި 500 މީހުންގެ ޖާގައިގެ މިސްކިތެއް ބިނާކުރުމަށެވެ. ޖުމްލަ 9.44 މިލިއަން ރުފިޔާއަށް ހަވާލުކުރި މި މަޝްރޫއު 360 ދުވަހުގެ ތެރޭގައި ނިންމުމަށް ވަނީ ހަމަޖެހިފައެވެ.
2,645 މީހުންގެ އާބާދީއެއް އޮންނަ ހަނިމާދޫއަކީ އެއާޕޯޓެއް ގާއިމުކުރެވިފައިވާ ރަށަކަށްވުމާއެކު، ދުވަހުން ދުވަހަށް ގިނަ އަދަދެއްގެ ބަޔަކު ޒިޔާރަތްކުރާ ރަށެކެވެ. އެހެންކަމުން މި މިސްކިތުގެ އިމާރާތް ނިމި ބޭނުންކުރަން ފެށުމުން، ރަށުގެ އާބާދީއަށާއި ރަށަށް ދަތުރުކުރާ ފަރާތްތަކަށް ނަމާދު ކުރުމުގައި ބޮޑެތި ލުއިފަސޭހަތަކެއް ލިބިގެންދާނެއެވެ.
ކިޔުންތެރިންގެ ހިޔާލު