ގިނަ އަދަދެއްގެ ދިވެހީން ގޮސް އުޅޭ ތައިލެންޑުގެ ވެރިރަށް ބެންކޮކަށް މިހާރު ކުރަމުންދާ ވިއްސާރައިގައި އެއްވެސް ދިވެއްސަކަށް ގެއްލުން ނުވާ ކަމަށް ތައިލެންޑުގައި ހުންނަ ރާއްޖޭގެ އެމްބަސީން ބުނެފިއެވެ.
ތައިލެންޑަށް ބޯކޮށް ވާރޭވެހި މަގުތަކުގައި ފެންބޮޑުވުމުގެ ސަބަބުން އެ ސިޓީއަކީ ކާރިސާގެ ހާލަތު މެދުވެރިވެފައިވާ ސަރަހައްދެއްގެ ގޮތުގައި އެ ސިޓީގެ ގަވަރުނަރު ޗަޑްޗާޓް ސިޓިޕުންޓް މިއަދު ވަނީ ކަނޑައަޅުއްވައިފިއެވެ.
ބެންކޮކްގެ 50 ޑިސްޓްރިކްޓް ވެސް ކާރިސާގެ ސަރަހައްދުތަކުގެ ގޮތުގައި ކަނޑައަޅާފައިވާއިރު، މިއީ ފަހުގެ ތާރީހެއްގައި ބެންކޮކަށް މިހާ ބޮޑަށް ވިއްސާރަކޮށް، އާންމު ދިރިއުޅުމަށް މިހާ ބޮޑު ބުރުލެއް އެރި ފުރަތަމަ ފަހަރު ކަމަށް ކަމާބެހޭ ފަރާތްތަކުން ފާހަގަކުރެއެވެ. ސިޓީގެ އެކި ސަރަހައްދުތަކުގައި ފެންބޮޑުވުމުގެ ސަބަބުން ވިޔަފާރިތަކަށާއި އާންމު ހިދުމަތްތަކަށް ވަނީ ބޮޑެތި ހުރަސްތަކެއް ކުރިމަތިވެފައެވެ. ހާއްސަކޮށް މާލީ މުއާމަލާތްތައް ހިންގާ މައި މަރުކަޒުތަކަށް ދަތުރުކުރުމަށް ދަތިވުމުގެ ސަބަބުން އިގުތިސާދީ ގޮތުން ވެސް ގެއްލުންތަކެއް ލިބިދާނެ ކަމަށް މާހިރުންނާ ހަވާލާދީ މީޑިއާތަކުން ރިޕޯޓުކުރެއެވެ.
މަގުތަކުގައި ފެންބޮޑުވެ، ދަތުރުފަތުރުގެ ނިޒާމަށް ވަނީ ވަރަށް ބޮޑަށް ހުރަސްއެޅިފައެވެ. ބައެއް ކާރުތައް ފެނު އަޑިއަށް ގޮސްފައިވާއިރު، އާންމުންނަށް މަގުމަތީގައި އުޅެން ޖެހިފައިވަނީ އުނަގަނޑާ ހަމައަށް ފެންބޮޑުވެފައިވާ ސަރަހައްދުތަކުގައެވެ.
ތައިލެންޑަށް ރާއްޖެއިން ކަނޑައަޅުއްވާފައި ހުންނަވާ ސަފީރު ފުއާދު ތައުފީގު މިރޭ ވިދާޅުވީ، ވިއްސާރައިގައި އެއްވެސް ދިވެއްސަކަށް ގެއްލުމެއް ލިބިފައިވާ ކަމުގެ މައުލޫމާތު ލިބިފައިނުވާ ކަމަށެވެ.
“ނަމަވެސް ވާރޭވެހި ފެންބޮޑުވުމުގެ ސަބަބުން ބައެއް މީހުންނަށް މޫވް ނުކުރެވިގެން، މި ދެންނެވީ އެއް ތަނުން އަނެއްތަނަށް ނުދެވި ތާށިވެގެން ރިޕޯޓުތަކެއް ކޮށްފައި އެބަހުރި.” ފުއާދު ވިދާޅުވިއެވެ.
ކިޔުންތެރިންގެ ހިޔާލު