އިސްތިއުމާރީ ދައުލަތުގެ މުޖުރިމު ބޮޑުވަޒީރު ނަތަންޔާހޫގެ މަތިންދާ ބޯޓު ފަރަންސޭސި ވައިގެ ސަރަހައްދުން ދަތުރުކުރުމުގެ ހުއްދަ އެގައުމުން ދިން މައްސަލަ އެމްނެސްޓީ އިންޓަރނޭޝަނަލްއިން ކުށްވެރި ކޮށްފިއެވެ.
އެކްސްގައި ޕޯސްޓްކުރި މެސެޖެއްގައި އެމްނެސްޓީން ބުނެފައިވަނީ، ފަރަންސޭސިވިލާތުން ގެންގުޅެނީ ދެފުށްދެގޮތް ސިޔާސަތުތަކެއް ކަމަށް ބުނެފައެވެ.
ބައިނަލްއަގްވާމީ ގާނޫނުތަކަށް އިހްތިރާމް ކުރަންޖެހޭނޭ ކަމަށް ފަރަންސޭސި ރައީސް އިމެނުއެލް މެކްރޮން އެއްކޮޅުން ވިދާޅުވާއިރު، ނަތަންޔާހޫ ދަތުރުކުރި މަތިންދާ ބޯޓު ފަރަންސޭސި ވައިގެ ސަރަހައްދުން ދަތުރުކުރުމުގެ ހުއްދަދިން މައްސަލަ އެމްނެސްޓީން ފާހަގަ ކޮށްފައި ވެއެވެ.
އިންސާނިއްޔަތާ ޚިލާފް ޖަރީމާތައް ހިންގުމުގެ ކުށުގައި ބައިނަލްއަގްވާމީ ޖިނާއީ ކޯޓުން ހައްޔަރުކުރަން އުޅޭ ނަތަންޔާހޫ ދަތުރުކުރި މަތިންދާ ބޯޓު ފަރަންސޭސި ވައިގެ ސަރަހައްދަށް ވަނުމުގެ ހުއްދަ ދިނުމުން ނަތަންޔާހޫ އަދަބުން ސަލާމަތް ކުރުމުގައި ފަރަންސޭސިވިލާތް ހިއްސާ ނުކުރޭތޯ، އެމްނެސްޓީން ސުވާލު ކޮށްފައި ވެއެވެ.
މިއީ، މުޖުރިމު ނަތަންޔާހޫ، ފަރަންސޭސި ވައިގެ ސަރަހައްދު ހުރަސްކޮށް ދަތުރުކުރި 5 ވަނަ ފަހަރެވެ.
އެމްނެސްޓީން ބުނެފައިވަނީ، ބައިނަލްއަގްވާމީ ޤާނޫނުތަކާއި، އިންސާފު ދިފާއުގައި އދގެ އާންމު މަޖިލީހުގައި ފަރަންސޭސި ރައީސް މެކްރޮން ދެއްކީ “ރީތި ވާހަކަތަކެއް” ކަމަށާއި، ނަމަވެސް އަމަލުން ފެނުނީ އެހެންކަމެއް ކަމަށެވެ.
ޣައްޒާއާ ގުޅޭގޮތުން އދގެ މަޖިލީހުގައި މެކްރޮން ދެއްކި ވާހަކަތަކަށް އިޝާރާތްކޮށް ޣައްޒާއާ ގުޅޭގޮތުން ފަރަންސޭސިވިލާތުން ގެންގުޅޭ ސްޓޭންޑާމެދު އެމްނެސްޓީންވަނީ ސުވާލު އުފައްދާފައެވެ. ފަރަންސޭސިވިލާތަށް އޮތް އިތުބާރަކީ ކޮބައިތޯވެސް ސުވާލު އުފައްދާފައި ވެއެވެ.
ފަރަންސޭސިވިލާތުން އިސްރާއީލަށް ހަތިޔާރާއި، އަސްކަރީ ސާމާނު މެދުނުކެނޑި ފޯރުކޮށްދެމުން ގެންދާއިރު، ޣައްޒާގައި ހިންގާ ނަސްލު ނައްތާލުމުގައި ފަރަންސޭސިވިލާތް އަމަލީގޮތުން ބައިވެރިވާ ކަމަށް ނުވޭތޯވެސް، އެމްނެސްޓީން ސުވާލު ކޮށްފައި ވެއެވެ.
ފަރަންސޭސިވިލާތުގެ އިތުރުން، މުޖުރިމު ނަތަންޔާހޫގެ މަތިންދާ ބޯޓު ގްރީސްއާއި އިޓަލީގެ ވައިގެ ސަރަހައްދުވެސް ބޭނުންކޮށްފައި ވެއެވެ.
ކިޔުންތެރިންގެ ހިޔާލު