ހދ. ނޮޅިވަރަމު ސްކޫލުގެ މަލްޓިޕާޕާސް ހޯލު އިމާރާތްކުރުމުގެ މަޝްރޫއުގެ މަސައްކަތް ހުއްޓުމެއްނެތި ބާރަށް ކުރިއަށް އެބަދެއެވެ.
މި މަޝްރޫއަކީ ނިމިދިޔަ ސަރުކާރުގައި ނޯތު ކޯސްޓް ކޮންޓްރެކްޓާސް ޕްރައިވެޓް ލިމިޓެޑާ ފުރަތަމަ ހަވާލުކުރި މަސައްކަތެކެވެ. ނަމަވެސް އެ ކުންފުންޏަށް އެއްބަސްވުމާ އެއްގޮތަށް މަސައްކަތް ނުކުރެވުމުގެ ސަބަބުން އެގްރީމެންޓް ބާތިލުކުރުމަށްފަހު، މި މަޝްރޫއުގެ މަސައްކަތްތައް ވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ ހަވާލުކޮށްފައެވެ.
އެމްޓީސީސީން ބުނީ އެ މަޝްރޫއުގެ ތެރެއިން ފުރަތަމަ ފްލޯގެ ސްލެބް ފެންވަރަށް ކޮލަމް ކޮންކްރީޓް ކުރުމުގެ މަސައްކަތް ނިންމައި، ސައިޓުގައި ޝަޓަރިންގެ މަސައްކަތްތައް މިހާރު ކުރިއަށްދާ ކަމަށެވެ.
ގާތްގަނޑަކަށް 600 ދަރިވަރުން ތައުލީމު ހާސިލުކުރަމުންދާ ނޮޅިވަރަމު ސްކޫލުގައި އިމާރާތްކުރާ މި މަލްޓިޕާޕާސް ހޯލުގެ މަޝްރޫއަކީ 2022 ވަނަ އަހަރުގެ ޕަބްލިކް ސެކްޓާ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން ކުރިއަށްގެންދިއުމަށް ފުރަތަމަ ނިންމި މަޝްރޫއެކެވެ. މި އިމާރާތް ނިމުމުން ސްކޫލުގެ ތައުލީމީ އަދި އިޖުތިމާއީ ހަރަކާތްތައް ހިންގުމަށް ބޮޑު ލުޔެއް ލިބިގެންދާނެއެވެ.
ކިޔުންތެރިންގެ ހިޔާލު