ފިނޭންސް މިނިސްޓްރީން ބުނީ ސްޓޭޓް ބޭންކް އޮފް އިންޑިއާ މެދުވެރިކޮށް ނަގާފައިވާ ފަންސާސް މިލިއަން ޑޮލަރުގެ ޓީ-ބިލް ދައްކާފައިވަނީ ބޭންކް އޮފް މޯލްޑިވްސްގައި ހުރި އާންމުންގެ ޑިޕޮސިޓް ފައިސާ ބޭނުންކޮށްގެން ނޫން ކަމަށެވެ.
އެ ފައިސާ ދައްކާފައިވަނީ ދުރާލާ އެކަމަށް ތައްޔާރުވެ، ސޮވްރިން ޑިވެލޮޕްމަންޓް ފަންޑަށް ޖަމާކުރަމުންދާ ފައިސާ ބޭނުންކޮށްގެން ކަމަށް އެ މިނިސްޓްރީން ވަނީ ކަށަވަރުކޮށްދީފައެވެ. މި ވާހަކަތަކަކީ އެއްވެސް އަސާސެއް ނެތް ވާހަކަތަކެއް ކަމަށް ބުނެ، މިނިސްޓްރީން ވަނީ އެކަން ދޮގުކޮށްފައެވެ. މިއީ ކުރީގެ ސަރުކާރުން ދައުލަތުގެ ބަޖެޓަށް ފައިސާ ހޯދުމުގެ ގޮތުން ވިއްކާފައިވާ ޓީ-ބިލެކެވެ.
މި ޓީ-ބިލް ކަނޑައެޅިފައިވާ ތާރީޚަށް ދައްކައި ޚަލާސްކުރާނެ ކަމަށް މިއަހަރުގެ މެއި މަހުގެ 11 ވަނަ ދުވަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެސް ވިދާޅުވެފައިވާކަން ފިނޭންސް މިނިސްޓްރީން ފާހަގަކުރިއެވެ. ރައީސް އޮފީހުގައި ބޭއްވެވި ނޫސްވެރިންގެ ބައްދަލުވުމެއްގައި އެމަނިކުފާނު ވަނީ އެކަމާ ގުޅޭ އެންމެ ފަހުގެ މައުލޫމާތު ހިއްސާކުރައްވާފައެވެ.
ދަރަނި އަދާކުރުމުގެ ސަބަބުން ގައުމުގެ ރަސްމީ ރިޒާވަށް އަސަރުކޮށް، ޒަރޫރީ މުދާ އެތެރެކުރުމަށް ހުރަސްއެޅިދާނެ ކަމަށް ބުނެ ފަތުރަމުންދާ ވާހަކަތަކަކީ އެއްވެސް ހަގީގަތެއް ނެތް ވާހަކަތަކެއްކަން މިހާރު މިވަނީ ސާބިތުވެފައެވެ. ރާއްޖެއަށް ބޭނުންވާ ކާބޯތަކެއްޗާއި ތެލާއި ބޭސްފަރުވާގެ ސާމާނު ފަދަ ޒަރޫރީ ތަކެތި މެދުނުކެނޑި އެތެރެކުރުމުގެ އިންތިޒާމުތައް މިހާރުވެސް ހަމަޖެހިފައިވާ ކަމުގެ ޔަގީންކަން ސަރުކާރުންދެއެވެ.
މި މައްސަލާގައި ކުރީގެ ބައެއް ބޭފުޅުން ކަންބޮޑުވުން ފާޅުކުރައްވާފައިވީ ނަމަވެސް، ސަރުކާރުން ދަނީ ދަރަނިތައް ނިންމުމަށް ޒިންމާދާރުކަމާއެކު ފިޔަވަޅުތައް އަޅަމުންނެވެ. މިގޮތުން ދައުލަތުގެ މާލީ ހިންގުން ހަރުދަނާކޮށް، އިގުތިސާދީ އިސްލާހީ އެޖެންޑާގެ ދަށުން ކަނޑައެޅިފައިވާ ލަނޑުދަނޑިތައް ހާސިލުކުރުމަށް މަސައްކަތްކުރަމުންދާ ކަމަށް މާލީ ވުޒާރާއިން ބުނެފައިވެއެވެ.
ކިޔުންތެރިންގެ ހިޔާލު