ގައިދީންނާއި ބަންދުގައި ތިބޭ މީހުންނަށް ސިއްހީ ފަރުވާ ލިބުން ލަސްވާ މައިގަނޑު ސަބަބަކީ އެމީހުން ހޮސްޕިޓަލަށް ގެންދިއުމަށް އެސްކޯޓު ކުރާނެ ޖަލު އޮފިސަރުން ނެތުން ކަން ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) ގެ ތަފާސްހިސާބުތަކުން ހާމަވެއްޖެއެވެ.
އެ ކޮމިޝަނުން އާންމުކޮށްފައިވާ މައުލޫމާތުތަކަށް ބަލާއިރު އެކެއް ޖަނަވަރީ 2024 އިން ފެށިގެން މި އަހަރުގެ ޖުލައި މަހުގެ 31 ވަނަ ދުވަހުގެ ނިޔަލަށް މޯލްޑިވްސް ކަރެކްޝަނަލް ސާވިސްގެ ބެލުމުގެ ދަށުގައި ތިބި މީހުންގެ ސިއްހީ ފަރުވާ ލަސްވެގެން ހުށަހެޅި މައްސަލަތަކުގެ ތެރެއިން އެންމެ ބޮޑު އިންސައްތައެއް ހިއްސާކުރަނީ އޮފިސަރުން ނެތުމުގެ މައްސަލައެވެ. އެގޮތުން 2024 ވަނަ އަހަރު ހުށަހެޅި މައްސަލަތަކުގެ 49.5 އިންސައްތަ އަދި މިދިޔަ އަހަރު ހުށަހެޅި މައްސަލަތަކުގެ 46.9 އިންސައްތަ މައްސަލައަކީ އެސްކޯޓު ކުރާނެ އޮފިސަރުން ދަތިވުމުގެ މައްސަލަތަކެވެ. މީގެ އިތުރުން މި އަހަރުގެ ޖުލައި މަހުގެ ނިޔަލަށް ހުށަހެޅުނު މައްސަލަތަކުގެ 63.2 އިންސައްތައަކީވެސް ހަމަ މި ސަބަބާ ހުރެ ފަރުވާ ލަސްވި މައްސަލަތަކެވެ.
ޖަލު އޮފިސަރުން ނެތުމުގެ އިތުރުން ސިއްހީ ފަރުވާ ފޯރުކޮށްދިނުމަށް ދިމާވާ ދެވަނައަށް އެންމެ ބޮޑު ގޮންޖެހުމަކީ ޚާއްސަ ޑޮކްޓަރުންގެ އެޕޮއިންޓްމަންޓްތައް ލިބުން ލަސްވުމުގެ މައްސަލަކަން އެޗްއާރުސީއެމްގެ ތަފާސްހިސާބުތަކުން ދައްކައެވެ. އަދި އިދާރީ ގޮތުން އަރާ އޮޅުންތަކުގެ ސަބަބުން ފަރުވާ މެދުކެނޑުމާއި ލަސްވުމުގެ މައްސަލަތައް އަހަރުން އަހަރަށް އިތުރުވަމުންދާކަން ވެސް ކޮމިޝަނުން ވަނީ ފާހަގަކޮށްފައެވެ.
އޭގެ އިތުރުން މާފުށީ ޖަލުން އެކަށީގެންވާ ސިއްހީ ޚިދުމަތްތައް ލިބެން ނެތުމާއި، ޑޮކްޓަރަށް ދެއްކުމަށް މާލެ ގެންގޮސް ބައިއްތިއްބާނެ އެކަށީގެންވާ ޖާގަ ނެތުމަކީ ވެސް ފަރުވާ ލަސްވުމަށް މެދުވެރިވާ މައިގަނޑު ސަބަބުތަކުގެ ތެރޭގައި ހިމެނޭ ކަންކަމެވެ. މީގެ އިތުރުން 2024 ވަނަ އަހަރު ބޭސް ދިނުން މެދުކަނޑާލި މައްސަލަތަކާއި އޮފިސަރުންގެ ފަރާތުން ބޭނުންވާ އެހީތެރިކަން ނުލިބުނު ބައެއް މައްސަލަތައް ވެސް އެ ކޮމިޝަނަށް ވަނީ ހުށަހެޅިފައެވެ.
ކިޔުންތެރިންގެ ހިޔާލު