ވިހެއުމަށްފަހު މަންމަގެ ނުރުހުމުގައި ތުއްތު ކުއްޖަކު ދައުލަތުގެ ބެލުމުގެ ދަށަށް ނެގި މައްސަލަ ތަހުގީގު ކުރުމަށްޓަކައި ބަލައި ފާސްކުރުމުގެ އަމުރަކާއެކު ހިއުމަން ރައިޓްސް ކޮމިޝަން (އެޗްއާރްސީއެމް) އިން އިޖުތިމާއީ އަދި އާއިލީ ތަރައްގީއާ ބެހޭ މިނިސްޓްރީއަށް ވަދެއްޖެ އެވެ.
އެ ކޮމިޝަނުން އަމުރާއެކު ހުޅުމާލޭގައި ހުންނަ އެ މިނިސްޓްރީގެ އޮފީހަށް ވަނީ އަމިއްލަ ފަރާތަކުން ހުށަހެޅި މައްސަލައަކާ ގުޅިގެންނެވެ. އެޗްއާރްސީއެމްގެ ތަހުގީގު ޓީމުން ދަނީ އެ މައްސަލައާ ގުޅޭ ލިޔެކިޔުންތައް ހޯދައި، ކަމާބެހޭ މުވައްޒަފުންނާ އިންޓަވިއުކޮށް މައުލޫމާތު އެއްކުރަމުންނެވެ.
މި މައްސަލައާ ގުޅިގެން އެޗްއާރްސީއެމްއިން ބުނީ، އެ ކޮމިޝަނުގެ ތަހުގީގަށް މިނިސްޓްރީގެ ފަރާތުން ފުރިހަމަ އެއްބާރުލުން ލިބެމުންދާ ކަމަށެވެ. އެ ކޮމިޝަނުން ދަނީ ކުއްޖާ ދައުލަތަށް ނެގުމުގައި އިޖުރާއަތްތައް ހިންގާފައިވަނީ ގާނޫނާ އެއްގޮތަށްތޯ ބަލައި ކަށަވަރުކުރަމުންނެވެ.
މި މައްސަލަ ސޯޝަލް މީޑިއާގައި އާންމުކުރީ ކުއްޖާގެ މަންމައެކެވެ. އޭނާ ބުނެފައިވަނީ އުފަންވިތާ ތިން ދުވަސްވީ ދަރިފުޅު އޭނާގެ ނުރުހުމުގައި ދައުލަތަށް ނެގީ އޭނާގެ ނަފްސާނީ ހާލަތަށާއި އަތުގެ ނުކުޅެދުންތެރިކަމަށް ރިއާޔަތްކޮށް ކަމަށެވެ.
އިޖުތިމާއީ އަދި އާއިލީ ތަރައްގީއާ ބެހޭ މިނިސްޓްރީން މީގެ ކުރިން ބުނެފައިވަނީ ކުއްޖަކު ދައުލަތުގެ ބެލުމުގެ ދަށަށް ނަގާނީ އާއިލާގެ ތެރެއިން ރައްކާތެރިކަން ނުލިބޭ ހާލަތުގައި އެކަނި ކަމަށެވެ. އަދި އެ ނިންމުން ނިންމާފައިވަނީ ގާނޫނީ އިމުގެ ތެރެއިން ކުއްޖާގެ އެންމެ ރަނގަޅު މަންފާއަށް އިސްކަންދީގެން ކަމަށްވެސް މިނިސްޓްރީން ބުނެފައިވެ އެވެ.
ކިޔުންތެރިންގެ ހިޔާލު