ވެރިކަންކުރާ މައި ޕާޓީ، ޕީއެންސީގެ ތާރީޚުގައިވެސް ބާއްވާ އެންމެ ބޮޑު ކޮންގްރެސްކަމަށްވާ މަތީ މަޖިލީހުގެ ކޮންގްރެސް 1300އަށްވުރެ ގިނަ މަންދޫބުންނާއެކު މިއަދު ފަށައިފިއެވެ.
ޔޫތު ސެންޓަރުގައި މިއަދު ފެށި ކޮންގްރެސް މިމަހުގެ 18އާއި ހަމައަށް ކުރިއަށްދާނެއެވެ. މި ކޮންގްރެސްގައި ޕީއެންސީގެ ރައީސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި، ޗެއަރޕާސަން، ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲއާއި، ޕާޓީގެ ނައިބު ރައީސް، ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފާއި، ލީޑާޝިޕްގެ އިސް ބޭފުޅުން ބައިވެރިވެވަޑައިގަންނަވައެވެ.
މި ކޮންގްރެސްގެ މިއަދު ހެނދުނު 07:00 ގައި ފަށާއި، ފުރަތަމަ ސެޝަނަށްފަހު، ޕާޓީގެ އަސާސީ ގަވާއިދު އެކުލަވާލުމުގެ މަސައްކަތާއި ގައުމީ ތަރައްގީގެ މުހިންމު ދާއިރާތަކާ ގުޅޭގޮތުން ވަޒީރުންގެ ހާއްސަ ސެޝަންތަކެއް ކުރިއަށް ގެންދިއުމަށް ވަނީ ރޭވިފައެވެ. މިއަދުގެ ބައްދަލުވުން މިރޭ 20:00އާއި ހަމައަށް ކުރިއަށްދާނެއެވެ.
މިމަހުގެ 18އާއި ހަމައަށް ކުރިއަށްދާ މި ކޮންގްރެސް ނިންމާލާނީ އެ ދުވަހު ކޮމިއުނިކޭޝަންސް ސެޝަނަކާއި، އެކުވެރިކަމުގެ ‘ވިލުނޫ ހަވީރު’ ބޭއްވުމަށްފަހު ފޮޓޯ ނެގުމުގެ ސެޝަނަކާއެކު އެރޭ 20:00ގައެވެ.
ޕީއެންސީން ބުނީ މިއީ ނަމޫނާ ކޮންގްރެސްއެއްކަމަށާއި، އެހެން ޕާޓީތަކަށް މި ކޮންގްރެސް ހިނގާ ގޮތް ބަލައި ތަޖުރިބާކޮށްލުމަށް ފުރުޞަތު އޮންނާނެކަމަށެވެ.
ކިޔުންތެރިންގެ ހިޔާލު