ރާއްޖޭގެ އަޕާ ނޯތު ޕޮލިސް ރީޖަންގައި ހިމެނޭ ރަށެއްގައި ކުޑަކުއްޖަކަށް ބުލީކޮށް، ޖިސްމާނީ އަދި ނަފްސާނީ ގޮތުން އަނިޔާކުރި ކަމަށް ތުހުމަތުކުރެވޭ ސީރިއަސް މައްސަލައެއް ކަމާގުޅުންހުރި މުއައްސަސާތަކާ ގުޅިގެން ފުލުހުން ތަހުގީގު ކުރަން ފަށައިފިއެވެ.
ފުލުހުން މައުލޫމާތު ދިން ގޮތުގައި މި މައްސަލަ ފުލުހުންނަށް ރިޕޯޓުކޮށްފައިވަނީ އިއްޔެގެ ވަގުތެއްގައެވެ. މި ހާދިސާ ފުލުހުން ބަލަމުން ދަނީ ހާއްސަ ސަމާލުކަމެއް ދީގެން ވަރަށް ސީރިއަސް މައްސަލައެއްގެ ގޮތުގައެވެ.
މި ހާދިސާއާ ގުޅިގެން ފުލުހުން ވަނީ އާންމު ރައްޔިތުންނާއި މީޑިއާތަކަށް މުހިންމު އިލްތިމާސެއް ކޮށްފައެވެ. އެގޮތުން މި ހާދިސާއާ ގުޅޭ އެއްވެސް ވީޑިއޯއެއް ނުވަތަ އަނިޔާ ލިބުނު ކުއްޖާގެ އައިޑެންޓިޓީ އެނގޭ ފަދަ އެއްވެސް މައުލޫމާތެއް މީސްމީޑިއާގައްޔާއި އެހެނިހެން މީޑިއާތަކުގައި ޝާއިއުނުކުރުމަށް ފުލުހުން އެދިފައިވެއެވެ. އަދި އެފަދަ ތަކެތި އިތުރަށް ދައުރުނުކުރުމަށް ވެސް ފުލުހުން ވަނީ އިލްތިމާސްކޮށްފައެވެ.
ފުލުހުން ފާހަގަކުރި ގޮތުގައި މިފަދަ މައުލޫމާތާއި ވީޑިއޯތައް އާންމުކުރުމަކީ އަނިޔާ ލިބުނު ކުއްޖާގެ ކަރާމާތަށް އުނިކަން އަތުވެދާނެ ކަމެކެވެ. މީގެ އިތުރުން އެކަމުގެ ސަބަބުން ކުއްޖާއަށް ނަފްސާނީ ގޮތުން އިތުރު ބޮޑެތި ގެއްލުންތަކެއް ލިބިގެންދާނެ ކަމަށް ވެސް ފުލުހުން ބުންޏެވެ.
ކުޑަކުދިންގެ ރައްކާތެރިކަމާއި ގުޅުންހުރި މިފަދަ ނާޒުކު މައްސަލަތަކުގައި މައުލޫމާތު ހިއްސާކުރުމުގައި ހުރިހާ ފަރާތްތަކުން ވެސް ޒިންމާދާރުވުމަށް ފުލުހުން އެދެއެވެ. އަދި ކުއްޖާގެ ހައްގުތައް ރައްކާތެރިކުރުމަށްޓަކައި ހާއްސަ ސަމާލުކަމެއް ދިނުމަށް ފުލުހުން ވަނީ އެދިފައެވެ.
ކިޔުންތެރިންގެ ހިޔާލު