ދުނިޔޭގެ ފުޓްބޯޅައިގެ މައި އިދާރާ (ފީފާ) ގެ މާލީ އެހީތަކަށް ޚިޔާނާތްތެރިވުމުގެ ސަބަބުން، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ކުރީގެ ރައީސް ބައްސާމް އަދީލް ޖަލީލް ފުޓްބޯޅައިގެ އެންމެހާ ހަރަކާތްތަކުން އުމުރަށް ސަސްޕެންޑްކޮށް، އެއް މިލިއަން ސްވިސް ފްރޭންކުން (ގާތްގަނޑަކަށް 1.23 މިލިއަން އެމެރިކާ ޑޮލަރުން) ޖޫރިމަނާކުރުމަށް ފީފާގެ އެތިކްސް ކޮމިޓީން މިއަދު ނިންމައިފިއެވެ.
ފީފާއިން އާންމުކުރި ރަސްމީ ބަޔާނުގައި ބުނެފައިވަނީ، ބައްސާމްގެ މައްޗަށް ސާބިތުވެފައިވަނީ ކޮވިޑް-19 އާ ގުޅިގެން ފީފާއިން ދޫކުރި ރިލީފް ފަންޑުގެ ފައިސާ ނަހަމަ ގޮތުގައި ބޭނުންކޮށް، އަމިއްލަ މަންފާއަށް އެ ފައިސާ ޚަރަދުކުރުމުގެ ކުށް ކަމަށެވެ. މީގެ އިތުރުން ފީފާގެ އެތިކްސް ކޯޑުގެ ގިނަ މާއްދާތަކަކާ އޭނާ ޚިލާފުވެފައިވާކަން އެ ކޮމިޓީގެ ތަހުގީގަށް ވަނީ ކަށަވަރުވެފައެވެ.
މި މައްސަލައާ ގުޅިގެން އެފްއޭއެމްގެ ފައިނޭންސް އެންޑް އެޑްމިނިސްޓްރޭޝަންގެ ކުރީގެ ޑިރެކްޓަރު މުހައްމަދު އަގީލް ވެސް ވަނީ ފުޓްބޯޅައިގެ އެއްވެސް ހަރަކާތެއްގައި ބައިވެރިނުވެވޭ ގޮތަށް 10 އަހަރަށް ސަސްޕެންޑްކޮށްފައެވެ. އޭނާ ސަސްޕެންޑްކުރުމުގެ އިތުރުން، ފީފާގެ ފައިސާއަށް ޚިޔާނާތްތެރިވުމަށް މަގުފަހިކޮށްދީ އެކަން ސިއްރުކުރިކަމުގެ ކުށުގައި 100،000 ސްވިސް ފްރޭންކުން ވަނީ ޖޫރިމަނާކޮށްފައެވެ.
ފީފާއިން ދޫކުރި ފައިސާ ބޭނުންކޮށްގެން ހުޅުމާލޭގެ އަމީން އެވެނިއުއިން ދެ އެޕާޓްމަންޓް ގަތް މައްސަލައިގައި ދިވެހި ފުލުހުން ކުރިއަށްގެންދިޔަ ތަހުގީގަށްފަހު، ބައްސާމްގެ މައްޗަށް ދިވެހިރާއްޖޭގެ ކޯޓުތަކުގައި ވެސް ވަނީ ދައުވާ އުފުލާފައެވެ. ރާއްޖޭގެ ކޯޓުތަކުން އޭނާގެ މައްޗަށް ކުށް ސާބިތުވާކަމަށް ނިންމައި ޖަލު ހުކުމެއް އިއްވާފައިވާއިރު، ޚިޔާނާތުގެ ފައިސާއިން ގަނެފައިވާ ދެ އެޕާޓްމަންޓް ދައުލަތަށް ނެގުމަށް ވެސް ވަނީ އަމުރުކޮށްފައެވެ.
ސިއްހީ ހާލަތަށް ރިއާޔަތްކޮށް ބައްސާމްގެ ޖަލު ހުކުމް މިހާރު ގޭބަންދަށް ބަދަލުކޮށްފައިވާއިރު، ފީފާގެ މި ނިންމުމާއެކު އޭނާ ވެފައިވަނީ ދުނިޔޭގެ ފުޓްބޯޅައިގެ މައި އިދާރާއިން އުމުރު ދުވަހުގެ ސަސްޕެންޝަނެއް ދިން ރާއްޖޭގެ ފުރަތަމަ އިސް އޮފިޝަލަށެވެ.
ކިޔުންތެރިންގެ ހިޔާލު