އިނގިރޭސި ލީގު ކަޕް ނުވަތަ ކަރަބާއޯ ކަޕްގައި ރޭ ލީޑްސް ޔުނައިޓެޑާއި ދެކޮޅަށް ޗެލްސީ ކުޅުނު މެޗު ފަހަތުން އަރާ 6-3 އިން މޮޅުވެއްޖެއެވެ.
ޗެލްސީގެ ދަނޑު ސްޓެމްފޯޑް ބްރިޖުގައި ރޭ ކުޅުނު މެޗުގައި ލީޑްސް އިން ފުރަތަމަ ހާފު ނިންމާލީ އެއް ގޯލު ކުރީގައި އޮވެގެންނެވެ. މީގެ އިތުރުންވެސް ލީޑްސް އަށް ވަނީ ފުރަތަމަ ހާފުގައި އިތުރު ލަނޑު ޖަހާނެ ފުރުސަތުތަކެއް ލިބިފައެވެ.ދެވަނަ ހާފަށް ނިކުތްއިރު ލީޑްސް 1-0 ގެ ނަތީޖާ އަކުން ކުރީގައި އޮތުމާއިއެކު އަލޮންސޯ ވަނީ ދެވަނަ ހާފަށް ނިކުތްއިރު ޓީމަށް ހަތަރު ބަދަލު ގެނެސްފައެވެ. އެގޮތުން ރީސް ޖޭމްސް އާއި މޯގަން ރޮޖަރސްގެ އިތުރުން ކޯލް ޕާމާ އަދި ޕެޑްރޯ ނެޓޯ ވަނީ ކުޅެން އަރުވާފައެވެ. ނަމަވެސް ދެވަނަ ހާފުގެ ކުޅުން ފެށުނުތާ ތިންވަނަ މިނިޓުގައި ލީޑްސްގެ އާރޮންސޮން ވަނީ އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފައެވެ.
ޗެލްސީން މި މެޗުގައި ޖެހި ފުރަތަމަ ލަނޑަކީ މެޗުގެ 53 ވަނަ މިނިޓުގައި ކޯލް ޕާމާ ކާމިޔާބުކޮށްދީފައިވާ ލަނޑެކެވެ. އަދި އޭގެ ދެ މިނިޓު ފަހުން އެ ޓީމަށް ލިބުނު ޕެނަލްޓީ އަކުން ޕާމާ ވަނީ އިތުރު ލަނޑެއް ޖަހާ މެޗުގެ ނަތީޖާ އެއްވަރުކޮށްފައެވެ. މި މެޗުގައި ޗެލްސީ އަށް ފުރަތަމަ ފަހަރަށް ލީޑު ލިބިފައިވަނީ މެޗުގެ 60 ވަނަ މިނިޓުގައި ޕެޑްރޯ ނެޓޯ ކާމިޔާބުކޮށްދިން ލަނޑުންނެވެ. އަދި އޭގެ ފަސް މިނިޓު ފަހުން ޑެނީ ވެލްބެކް ވަނީ ލަނޑެއް ޖަހާ މެޗުގެ ނަތީޖާ 4-2 އަށް ބަދަލުކޮށްފައެވެ. ނަމަވެސް މެޗުގެ 75 ވަނަ މިނިޓުގައި ލީޑްސްގެ ޑޮމިނިކް ކެލްވަޓް ލެވިން ވަނީ ލަނޑެއް ޖަހާ މެޗުގެ ނަތީޖާ 4-3 އަށް ބަދަލުކޮށްފައެވެ.
ޗެލްސީ އިން މި މެޗުގައި ޖެހި ފަސްވަނަ ލަނޑު މެޗުގެ 80 ވަނަ މިނިޓުގައި ވެލެންޓިން ބާކޯ ކާމިޔާބުކޮށްދިންއިރު މެޗުގެ އިތުރު ވަގުތުގައި ވެލްބެކް ވަނީ އިތުރު ލަނޑެއް ޖަހާ މެޗުގެ ނަތީޖާ 6-3 އަށް ބަދަލުކޮށްފައެވެ.
މިއާއެކު ޗެލްސީއަށް ވަނީ ކަރަބާއޯ ކަޕްގެ ހަތަރުވަނަ ބުރުގެ ޖާގައެއް ލިބިފައެވެ.
ކިޔުންތެރިންގެ ހިޔާލު