އިނގިރޭސި ޕްރިމިއާ ލީގުގައި ރޭ ކުޅުނު ފޯރިގަދަ މެޗުގައި ބޯންމަތު އަތުން 5-1 ގެ ބޮޑު ތަފާތަކުން ޗެލްސީ މޮޅުވެއްޖެއެވެ.
ލަންޑަނުގެ ސްޓެމްފަޑް ބްރިޖުގައި 39،000 އަށްވުރެ ގިނަ ސަޕޯޓަރުންގެ ކުރިމަތީގައި ކުޅުނު މި މެޗު ޗެލްސީން ފެށީ ވަރަށް ވަރުގަދަކޮށެވެ. އެގޮތުން މެޗުގެ ދެވަނަ މިނިޓުގައި ކޯލް ޕާމާ ދިން ޕާހަކުން ޖޯޑަން ހެންޑަސަން ވަނީ ލަނޑެއް ޖަހައި ޗެލްސީއަށް ލީޑު ނަގައިދީފައެވެ. މިއީ އުމުރުން 36 އަހަރުގެ ހެންޑަސަން އެ ކްލަބާ ގުޅުނު ފަހުން ޖަހައިދިން ފުރަތަމަ ލަނޑެވެ. އަދި އޭގެ މިނިޓެއް ފަހުން، ހެންޑަސަން ތަނަވަސްކޮށްދިން ފުރުސަތަކުން މޯގަން ރޮޖާރސް ވަނީ އިތުރު ލަނޑެއް ކާމިޔާބުކޮށް، ދެ ޓީމުގެ ދެމެދުގައިވާ ފަރަގު ބޮޑުކޮށްފައެވެ.
ފުރަތަމަ ތިން މިނިޓުގެ ތެރޭގައި ޗެލްސީން ދެ ލަނޑުގެ ލީޑެއް ނެގި ނަމަވެސް، ބޯންމަތުން ވަނީ ކުޅުން ރަނގަޅުކޮށް ޗެލްސީގެ ގޯލަށް ނުރައްކާކޮށްފައެވެ. އެގޮތުން އެ ޓީމުގެ ރަޔާން ކްރިސްޓީ ފޮނުވާލި ނުރައްކާތެރި ހަމަލާއެއް ޗެލްސީގެ ކީޕަރު އެމިލިއާނޯ މާޓިނޭޒް ވަނީ ހުށިޔާރުކަމާއެކު ދިފާއުކޮށްފައެވެ.
ދެވަނަ ހާފު ފެށިގެން ފުރަތަމަ މިނިޓުގެ ތެރޭގައި ޖޮއާއޯ ޕެޑްރޯ ވަނީ ޗެލްސީގެ ތިންވަނަ ލަނޑު ޖަހައިފައެވެ. ނަމަވެސް، އޭގެ ފަސް މިނިޓު ފަހުން ބޯންމަތުގެ އެވަނިލްސަން ލަނޑެއް ޖަހައި ނަތީޖާގެ ފަރަގު ކުޑަކުރިއެވެ.
ޗެލްސީން އަނެއްކާވެސް މެޗުގެ ކޮންޓްރޯލް ނަގައި، މެޗުގެ 67 ވަނަ މިނިޓުގައި ޕެޕް ޗަވާރިއާ ދިން ޕާހަކުން ޕެޑްރޯ ވަނީ އޭނާގެ ދެވަނަ ލަނޑު ކާމިޔާބުކޮށްފައެވެ. އަދި އޭގެ ތިން މިނިޓު ފަހުން ލިބުނު ހިލޭ ޖެހުމަކުން ހެންޑަސަން ވަނީ މެޗުގައި އޭނާގެ ދެވަނަ ލަނޑު ޖަހައި، ޗެލްސީއަށް 5-1 ގެ ފުރިހަމަ މޮޅެއް ކަށަވަރުކޮށްދީފައެވެ.
އަނިޔާގެ ސަބަބުން ގިނަ ދުވަސްތަކެއް ވަންދެން ކުޅުމާ ދުރުގައި ހުރުމަށްފަހު، މި މެޗުގައި އެނބުރި އައި މޯސެސް ކައިސޭޑޯ އާއި ހެންޑަސަން ވަނީ ޗެލްސީގެ މެދުތެރޭގައި މޮޅު ކުޅުމެއް ދައްކައިފައެވެ.
ރޭގެ މޮޅާއެކު ޗެލްސީ ވަނީ ލީގުގައި މިހާތަނަށް ކުޅުނު 6 މެޗުން ލިބުނު 10 ޕޮއިންޓާއެކު ތާވަލުގެ ފަސްވަނަ މަގާމަށް ޖެހިލައިފައެވެ.
ކިޔުންތެރިންގެ ހިޔާލު