އިނގިރޭސި ޕްރިމިއާ ލީގުގެ މާލީ ގަވާއިދުތަކާ ހިލާފަށް ހިންގާފައިވާ ސީރިއަސް 115 މައްސަލާގައި މެންޗެސްޓަރ ސިޓީ އާއި ދެކޮޅަށް އެލީގުން އުފުލި ދައުވާތައް ސާބިތުވެއްޖެއެވެ.
ޕްރިމިއާ ލީގުން ނެރުނު 1,545 ބަހުގެ ބަޔާނުގައި ވަނީ އެކްލަބަށް މަލީގޮތުން އެހީތެރިވެދޭ ފަރާތްތަކާއެކު ލީގަށް އޮޅުވާލުމުގެ ގޮތުން ކޮންޓްރެކްޓްތަކެއް ހަދާ އެކްލަބަށް ލިބުނު އާންމުދަނީ އޮޅުވާލާފައިވާކަމަށެވެ. މިގޮތުން 830 މިލިއަން ޕައުންޑް އެކްލަބަށް ނުގަވައިދުން ލިބިފައިވާކަން ލިޔެކިޔުންތަކުން އެނގޭކަމަށް ޕްރިމިއަރ ލީގުން ހާމަކުރެއެވެ. އެހެން ކަމުން 2009-2010 ވަނަ ސީޒަނުން ފެށިގެން 2017-2018ވަނަ އަހަރުގެ ސީޒަނާއި ދެމެދު ލީގުގެ މާލީ ގަވައިދުތަކާއި ސިޓީއިން ހިލާފުވުމާއި ގުޅިގެން އެލީގުން އުފުލި ހުރިހާ ދައުވާއެއް އެކްލަބްގެ މައްޗަށް ސާބިތުވާކަމަށް ޕްރިމިއަރ ލީގުން ހާމަކުރެއެވެ. މިކަމާ ގުޅިގެން މިނިވަން ކޮމިޝަނުން ބޭއްވި އަޑު އެހުންތަކަށްފަހު ހާމަވެގެންދިޔަގޮތުގައި ސިޓީއިންވަނީ އެކްލަބުގެ ހަރަދުތައް ކުޑަކަން ދެއްކުމުގެ ގޮތުން އެކްލަބްގެ ސްޕޮންސަރުންނާއެކު އޮޅުވާލުމުގެ އެގްރީމަންޓް ތަކެއް ހަދާ އެކްލަބަށް ނުލިބޭ އާންމު ދަނީތަކެއް ލިބުނު ކަމަށް ދައްކާފައެވެ. ޕްރިމިއަރ ލީގުން މިދައުވާތައް ސާބިތުވާކަން ހާމަކޮށް ސިޓީއަށްވަނީ އޮކްޓޯބަރު މަހުގެ ދެވަނަ ދުވަހާއި ހަމައަށް އެޕީލް ކުރުމުގެ ފުރުސަތު ދީފައެވެ.
ޕްރިމިއަރ ލީގުން ސިޓީ އާއި ދެކޮޅަށް އުފުލި 115 ދައުވާ އާއި ގުޅިގެން މިނިވަން ކޮމިޝަނުން ކުރިއަށް ގެންދިޔަ އަޑުއެހުންތަކަށްފަހު ސިޓީގެ މައްޗަށް އޭގެ ތެރެއިން 114 ދައުވާ ސާބިތުވާކަމަށް އެކޮމިޝަނުން ނިންމިކަމުގެ ހަބަރު އިނގިރޭސި މީޑިއާއިން މިދިޔަ ހަފްތާގެ ތެރޭގައިވަނީ ލީކު ކޮށްލާފައެވެ. މިކަމާއި ގުޅިގެން މިދިޔަ ހަފްތާއެއް ހާ ދުވަހުގެ ތެރޭގައި ސިޓީގެ މިކަންތަކާއި ގުޅިގެން އެކިފަރާތްތަކުން ތަފާތު ހިޔާލު ތަކާއި އެކްލަބަށް ލިބެންޖޭހެނެ ކަމަށް ގަބޫލްކުރާ އަދަބު ތަކާއި ގުޅޭގޮތުން ވާހަކަ ދައްކާފައިވެއެވެ. ނަމަވެސް މިއީ މިކަމާއި ގުޅިގެން ޕްރިމިއަރ ލިގުން ރަސްމީކޮށް ބަހެއް ބުނި ފުރަތަމަ ފަހަރެވެ.
މިނިވަން ކޮމިޝަނުން ބެލިބެލުންތަކަށްފަހު ސިޓީއިން ޕްރިމިއަރ ލީގުގެ ގަވައިދުތަކުގެ މައި ހަތަރު ދާއިރާއަކުން 100 އަށް ވުރެ ގިނަ ފަހަރު ހިލާފުވެފައިވެއެވެ. އަދި މިކޮމިޝަނުން ބެލިބެލުމުން ސާބިތު ނުވާ ހަމައެކަނި ދައުވާއަކީ ޕްރިމިއަރ ލީގަށް އެއްބާރުލުން ނުދިނުމާއި ގުޅޭގޮތުން އުފުލި ދައުވާތަކުގެ ތެރެއިން ދައުވާއެކެވެ. ސިޓީއިން 2011-2012، 2013-2014 އަދި 2017 -2018 ވަނަ ސީޒަންގައި ލީގު ކާމިޔާބު ކުރިއިރު ސްޕޮަންސަރގެ ގޮތުގައި 360 މިލިއަން ޕައުންޑް ލިބިފައިވާކަމަށް ދައްކާފައިވީ ނަމަވެސް މިހާރު ބުނެވޭގޮތުގައި އޭގެ ތެރެއިން ސްޕޮންސަރުންގެ ފަރާތުން އަސްލު ލިބިފައިވަނީ 43 މިލިއަން ޕައުންޑެވެ. ބާކީ ބައި އައިސްފައިވަނީ ކްލަބްގެ އޯނަރުގެ ފަރާތުންނެވެ. އަދި ކޮންޓްރެކްޓް ތަކުގައި އެފައިސާވަނީ ސްޕޮންސަރުންގެ ފަރާތުން ލިބުނު އެއްޗެއްގެގޮތުގައި ދައްކާފައެވެ.
ޕްރިމިއަރ ލީގުގެ ޗީފް އެގްޒެކެޓިވް ރިޗަޑް މާސްޓަރސް ބުނީ ކޮމިޝަންގެ ނިންމުންތަކުން ސިޓީގައި ދައުވާ އުފުލާފައިވާ މުއްދަތުގެ ތެރޭގައި ކަންތައްތައް ހިނގާފައިވާގޮތް ހާމަވެގެންދާ ކަމަށެވެ. އަދި ސިޓީ އާއި ދެކޮޅަށް މިތަހްގީގް ކުރަން ޖެހުނު ސަބަބު މިކަންތައްތަކުން ހާމަވެގެންދާކަމަށެވެ. އަދި މިއްސަލަ މިހާހިސާބަށް ގެނައުމުގައި ގިނަ ދަތިތަކެއް ކުރިމަތިވުމުގެ އިތުރުން މިހާ ދިގުލައިގެން ދިޔަ ނަމަވެސް ބޭނުންވީ ވީހާވެސް މިނިވަން ކަމާއެކު މިކަން ކުރިއަށް ގެންދަން ކަމުގައި އޭނާ ފާހަގަ ކުރިއެވެ. އަދި ޕްރިމިއަރ ލީގުގައި ވާދަކުރާ ކްލަބްތަކުން ހަދާފައިވާ ގަވައިދުތަކަށް އެކްލަބްތަކުން އަމަލުކުރޭތޯ ބެލުމަކީ ލީގުގެ ޒިންމާއެއް ކަމަށާއި އަދި މިލީގަކީ ވާދަވެރި ހުރިހާ ކްލަބަކަށްވެސް އެއް ހަމައަކުން އަމަލު ކުރާ ލީގެއްގެ ގޮތުގައި އޮތުން މުހިންމު ކަމަށްވެސް މާސްޓަރސް ހާމަކުރިއެވެ.
މިދައުވާ ތަކާއި ގުޅިގެން އެކްލަބާއި ދެކޮޅަށް އަޅާނެ ފިޔަވަޅުތައް ނިންމުމަށް އިތުރު އަޑުއެހުމެއް ފަހުން ބާއްވާނެއެވެ. އަދި މިއަޑުއެހުމަކީ ސިއްރު އަޑުއެހުމަކަށް ވާންޖެހޭކަމުގައި ލީގުގެ ގަވައިދުގައި ހާމަކޮށްފައިވެއެވެ.
މިކަމަށް އިންކާރުކޮށް ސިޓީން ނެރުނު ބަޔާނެއްގައި އެކްލަބުންވަނީ ޕްރިމިއަރ ލީގުގެ މިނިވަން ކޮމިޝަނުން ނިންމި ނިންމުންތަކާއި މެދު ކަންބޮޑުވުން ފާޅު ކުރުމުގެ އިތުރުން ހައިރާންވާކަން ހާމަކޮށްފައެވެ. އަދި ސިޓީއިން ހާމަކުރާގޮތުގައި އެކްލަބާއި ދެކޮޅަށް އުފުލާފައިވާ ދައުވާތަކަކީ ރަނގަޅު ދައުވާ ތަކެއް ނޫން ކަމަށާއި އެކްލަބްގައި މިދައުވާތަކާއި ހިލާފު ވެފައިނުވާކަމުގެ ފުރިހަމަ ހެކި އެބަހުރި ކަމަށެވެ. ސިޓީއިން ބުނީ މިމައްސަލައިގާ ފުރިހަމަ ނުވާ ގިނަ ކަންތައްތަކެއް އަދި އެބަހުރި ކަމަށާއި އަދި އެކްލަބަށް ލިބިފައިވާ އެޕީލް ކުރުމުގެ ފުރުސަތުގެ ބޭނުން ހިފާނެކަމަށެވެ. މިކަން ކުރިއަށްދާތީ ކްލަބްގެ ފަރާތުން ހާމަކުރެވެން ހުރި މަޢުލޫމާތު މަދު ކަމަށްވެސް އެކްލަބުން ބުނެއެވެ. މިކަމާއި ގުޅިގެން ސިޓީގެ ޗީފް އެގްޒެކެޓިވް އޮފިސަރ ފެރާން ސޮރިއާނޯ ކޮމެންޓް ކުރަން ބޭނުން ނޫންކަން ހާމަކުރުމާއެކު އާންމު ކުރި ވީޑިއޯ މެސެޖެއްގައިވަނީ ޕްރިމިއަރ ލީގުން އެކްލަބާއި ދެކޮޅަށް ކޮންސްޕިރަސީ ތިއަރީއެއް ކުރިއަށް ގެންދާކަމަށް ތުހުމަތު ކުރުމުގެ އިތުރުން މިކަމުން ސިޓީ އަށް ކާމިޔާބު ލިބޭނެކަމަށް ހާމަކޮށްފައެވެ.
ކިޔުންތެރިންގެ ހިޔާލު