އިންގްލިޝް ޕްރިމިއާ ލީގުގައި ސަންޑަލޭންޑް އާއި ދެކޮޅަށް މެންޗެސްޓަރ ސިޓީ ރޭ ކުޅުނު މެޗު 5-3 ގެ ނަތީޖާއަކުން ސިޓީން ކާމިޔާބުކޮށްފިއެވެ.
ފޯރިގަދަ ކުޅުމެއް ފެނުނު މި މެޗުގެ 9 ވަނަ މިނިޓުގައި އެންޒޯ ފެނާންޑޭޒް ވަނީ ލަނޑެއް ޖަހާ ސިޓީއަށް ކުރި ހޯދަދީފައެވެ. މިއީ 125 މިލިއަން ޕައުންޑްގެ ފީއަކަށް އެންޒޯ ފެނާންޑޭޒް މި ސީޒަނުގައި ޗެލްސީން ސިޓީއަށް ބަދަލުވި ފަހުން އެ ކްލަބަށް ޖަހައިދިން ފުރަތަމަ ލަނޑެވެ. ސަންޑަލޭންޑް އިން ވަނީ ސިޓީން ލަނޑު ޖެހިތާ 3 މިނިޓު ފަހުން ލަނޑެއް ޖަހާ މެޗުގެ ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ކާމިޔާބުކޮށްދީފައިވަނީ ބްރަޔަން ބްރޮބޭއެވެ.
ސިޓީން ދެވަނަ ފަހަރަށް މި މެޗުގައި ލީޑު ނަގާފައވަނީ މެޗުގެ 29 ވަނަ މިނިޓުގައި ރަޔާން ޗާރކީ ކާމިޔާބުކޮށްދިން ލަނޑުންނެވެ. ނަމަވެސް ބްރަޔަން ބްރޮބޭ ވަނީ ލަނޑެއް ޖަހާ ހަތަރު މިނިޓު ފަހުން މެޗުގެ ނަތީޖާ 2-2 އަށް ބަދަލުކޮށްފައެވެ. އެންޒޯ މަރެސްކާގެ އިރުޝާދުގެ ދަށުން ކުޅެމުންދާ ސިޓީން ތިންވަނަ ފަހަރަށް މި މެޗުގައި ކުރި ހޯދާފައިވަނީ މެޗުގެ ފުރަތަމަ ހާފުގެ ކުޅުން ނިމެން ދެ މިނިޓަށް ވެފައިވަނިކޮށް އެންޓޮއިން ސެމެންޔޯ ކާމިޔާބުކޮށްދިން ލަނޑުންނެވެ. އަދި ދެވަނަ ހާފުގެ ކުޅުން ފެށުނުތާ 12 ވަނަ މިނިޓުގައި ސެމެންޔޯ ވަނީ އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ.
ސަންޑަލޭންޑް އިން މި މެޗުގައި ޖެހި ތިންވަނަ ލަނޑަކީ މެޗުގެ 59 ވަނަ މިނިޓުގައި ބްރޮބޭ ކާމިޔާބުކޮށްދީފައިވާ ލަނޑެކެވެ. އޭނާ މި މެޗުގައި ޖެހި ތިން ލަނޑާއެކު މިއީ ސީނިއާ މެޗެއްގައި ބްރޮބޭ ހެދި ފުރަތަމަ ހެޓްރިކެވެ. ސިޓީން މި މެޗުގައި ޖެހި ފަސްވަނަ ލަނޑަކީ މެޗުގެ ފުރިހަމަ ވަގުތު ހަމަވާން 9 މިނިޓަށް ވެފައިވަނިކޮށް އާލިން ހާލާންޑް ކާމިޔާބުކޮށްދީފައިވާ ލަނޑެކެވެ.
މި ނަތީޖާ އާއިއެކު ސިޓީއަށް ވަނީ ލީގުގައި މިހާތަނަށް ކުޅުނު 5 މެޗުން ލިބިފައިވާ 15 ޕޮއިންޓާއެކު ތާވަލުގެ އެއްވަނަ ލިބިފައެވެ.
ކިޔުންތެރިންގެ ހިޔާލު