ސޫރިޔާގެ ދެކުނުން ސިފައިން ނުބާލާނޭ ކަމަށް އިސްތިއުމާރީ އިސްރާއީލުން ބުނެފިއެވެ.

އިސްތިއުމާރީ އަސްކަރިއްޔާއިން މިއަދު  ބުނެފައިވަނީ، އިސްރާއީލުގެ ރައްޔިތުންނަށް ކުރިމަތިވާ "ނުރައްކާތައް" ނައްތާލުމަށްޓަކައި ސޫރިޔާގެ ދެކުނުގައި އޮޕަރޭޝަންތައް ކުރިއަށް ގެންދާނޭ ކަމަށާއި، އަދި ސިފައިން ނުވެސް ފައިބާނޭ ކަމަށެވެ.

ސޫރިޔާގެ ދެކުނަށް އަރާތިބި އިސްތިއުމާރީ ސިފައިން ގެންދަނީ، ދޭތެރެ ދޭތެރެއިން މީހުން ދިރިއުޅޭ އަވަށްތައް ރެއިޑްކޮށް، ތަންތަނަށް ހަމަލާދީ މީހުންވެސް މަރަމުން ގެންދެއެވެ.

އިޝްތިހާރު އިޝްތިހާރު

ސޫރިޔާގެ ދެކުނުގައި އިއްޔެވެސް އާންމު މީހެއްގެ ގަޔަށް ބަޑިޖަހައި މަރާލާފައި ވެއެވެ.

ނުވިތާކަށް، ސޫރިޔާގެ ދެކުނު، ސޫރިޔާގެ އެހެން ހިސާބުތަކާ ވަކިކޮށްލުމަށްޓަކައި މަގެއް ހަދައި ކަށިނަރު ދަމައި އަދި ޚަންދަގު ކޮނެ ވަކިކުރުމުގެ މަސައްކަތްވެސް ހުއްޓާނުލާ ކުރިއަށް އެބަ ގެންދެއެވެ. އިސްތިއުމާރީ ސިފައިން މިމަސައްކަތް 2022 ވަނަ އަހަރުން ފެށިގެން ގެންދަނީ ކުރަމުންނެވެ.

ސޫރިޔާގެ ދެކުނުން ކުރިން ހިފާފައިވާ ބިންތަކުގެ އިތުރުން، ސޫރިޔާގެ އެތެރެއަށް އިތުރު ސިފައިން ފޮނުވައި މިހާރުވެސް ގެންދަނީ އިތުރު ސަރަހައްދުތައް ހިފަމުންނެވެ. އަދި ބިންތައް ހިފައި އެ ސަރަހައްދުތަކުގައި އިސްތިއުމާރީ ސިފައިންގެ މަރުކަޒުތަކާއި ޕޯސްޓްތައް ގެންދަނީ ހަދަމުންނެވެ.

އިސްތިއުމާރީ ދައުލަތުން ސޫރިޔާގެ ބިންތައް ހިފައި އިސްތިއުމާރު ފުޅާކުރަމުން ގެންދާތީ، ގަތަރު، އުރުދުން، ތުރުކީ އަދި ކުވައިތު ފަދަ ގައުމުތަކުން އެކަން ވަރަށް ބޮޑަށް ކުށްވެރި ކޮށްފައި ވެއެވެ.

ސޫރިޔާގެ ކުރީގެ ރައީސް ބައްޝާރުލް އަސަދުގެ ވެރިކަން ވެއްޓުމާއެކު، ސޫރިޔާގެ ދެކުނަށް އަރައިގަތް އިސްތިއުމާރީ ސިފައިން ހިފާފައިވާ ދަރާއޭ ނަމަކަށްކިޔުނު ދެކުނުގެ ރަށެއްގައި އިސްތިއުމާރީ ސިފައިން ނަގާފައިވާ ގްރޫޕް ފޮޓޯއެއްގައި، ސޫރިޔާ ދިދައިގެ މައްޗަށް ފައިން އަރައި އަދި އިސްތިއުމާރީ ދައުލަތުގެ ދިދަ އުފުލައިގެން ތިބި ފޮޓޯއެއް އިސްރާއީލުގެ ޗެނަލަކުން އާންމުކޮށްފައި ވެއެވެ.

ސޫރިޔާގެ އިސްތިގްލާލަށް އިސްތިއުމާރީ ދައުލަތުން އަރައިގެންފައިވާ މިންވަރު މި ފޮޓޯއިން އެކަނިވެސް ހާމަވާ ކަމަށް، ތަޖުރިބާކާރުން ބުނެއެވެ.

ތުރުކީގެ ޚާރިޖިއްޔާއިން މިއަދު ނެރުނު ބަޔާނެއްގައި، ސޫރިޔާގެ ބިންތައް އިސްތިއުމާރުކުރުން ހުއްޓުވުމަށް ބައިނަލްއަގްވާމީ މުޖުތަމައަށް ގޮވާލާފައި ވެއެވެ. އަދި ސޫރިޔާގެ ހުރިހާ ބިންތަކުން އިސްތިއުމާރީ ސިފައިން  ފޭބުމަށްވެސް ގޮވާލާފައި ވެއެވެ.