ފެރަން ޓޮރޭޒްގެ ހެޓްރިކާއެކު ޗެމްޕިއަންސް ލީގުގައި ޗެމްޕިއަން ޕީއެސްޖީން ބޮޑު މޮޅަކުން ފަށައިފިއެވެ.
ފާއިތުވި ދެ ސީޒަންގެ ޔޫރަޕްގެ ޗެމްޕިއަން ޕީއެސްޖީން މިސީޒަންގައި ޗެމްޕިއަންސް ލީގު ފެށީ ސްލޮވާކިޔާގެ ސްލޮވަން ބްރަޓިސްލާވާ އަތުން ހޯދި 6-1 ގެ މޮޅުންނެވެ. މެޗުގައި ޕީއެސްޖީން ޖެހި ހަ ލަނޑުގެ ތެރެއިން ތިން ލަނޑު ޖެހީ ބާސެލޯނާ ދޫކޮށް, ޕީއެސްޖީއަށް ބަދަލުވި ސްޕެއިންގެ ފެރަން ޓޮރޭޒް އެވެ. ސްޕެއިން އަށް ވޯލްޑްކަޕް ހޯދައިދޭން ފައިނަލް މެޗުގައި އާޖެންޓީނާ ކޮޅަށް ލަނޑު ޖެހި ފެރަން ޓޮރޭޒް ޖެހި ތިން ލަނޑުގެ ތެރެއިން ދެ ލަނޑު ޖަހަން ފުރުޞަތު ތަނަވަސްކޮށްދިނީ އެންމެ ފަހުން ބެލަންޑިއޯ އުފުލާލި ޑެމްބެލޭ އެވެ.
މެޗުގައި ޕީއެސްޖީގެ ފުރަތަމަ ދެ ލަނޑު ފުރަތަމަ ހާފްގައި ޖެހީވެސް ޑެމްބެލޭ އެވެ. ފެރަން ޓޮރޭޒްގެ ފުރަތަމަ ލަނޑާއެކު ފުރަތަމަ ހާފް ޕީއެސްޖީ ނިންމާލީ 3 ލަނޑުގެ ލީޑެއްގައެވެ. ފެރަން ޓޮރޭޒް ހެޓްރިކް ފުރިހަމަ ކުރީ ދެވަނަ ހާފް ފަށައިގެން ހަތް މިނިޓްގެ ތެރޭގައެވެ. ޕީއެސްޖީގެ ފަހު ލަނޑު މެޗުގެ ފުރިހަމަ ވަގުތު ހަމަވާން ތިން މިނިޓަށް ވެފައި ވަނިކޮށް ޖެހީ ފަބިއަން ރުއިޒް އެވެ. އޭގެކުރިން ސްލޮވަން ބްރަޓިސްލާވާގެ ސުލޭމާން ކަމާރާ އޮތީ ދުރުން ފޮނުވާލި ބޯޅަ ގޯލަށް ފޮނުވާލައިގެން އެޓީމަށް ސުން ކަނޑުވާލަދީފައެވެ.
މިމެޗުގައި ސްލޮވަން ބްރަޓިސްލާވާ އަށް އިރުޝާދުދިނީ ކުރިން މެންޗެސްޓަރ ސިޓީއަށް ކުޅުނު މިޑްފީލްޑަރ ޔާޔާ ޓޫރޭއެވެ.
ކިޔުންތެރިންގެ ހިޔާލު