ބާސެލޯނާގެ އަމާޒަކީ މި ސީޒަނުގައި ޗެމްޕިއަންސް ލީގު ކާމިޔާބު ކުރުންކަމަށް ކުލަބުގެ ރައީސް ޖޯން ލަޕޯޓާ ވިދާޅުވެއްޖެއެވެ.
ބާސެލޯނާގެ އެކްސްކޯ ބައްދަލުވުމުގެ ހަވާސާގައި ވާހަކަ ދައްކަވަމުން ލަޕޯޓާ ވިދާޅުވީ އޭނާގެ ރައީސްކަމުގައި ފާއިތުވެދިޔަ ފަސް އަހަރަށްވުރެ ހުރިހާ ގޮތަކުންވެސް މި ސީޒަނަށް ޓީމު ވަރުގަދަ ކުރީ ޔޫރަޕުގެ އެންމެ ޝަރަފުވެރި ތައްޓަށް އަމާޒު ކޮށްގެންކަމަށެވެ.
އަހަރުމެން ހުރިހާ ތަށްޓަކަށް ވެސް ވާދަ ކުރާނަން. ސްޕެނިޝް ލީގާއި ސްޕެނިޝް ސުޕަކަޕް އަދި ކޮޕާ ޑެލްރޭގެ އިތުރުން އެންމެ އިސް ޓާގެޓަކީ ޗެމްޕިއަންސް ލީގު ކާމިޔާބު ކުރުން. މިހާރު އޮތް ޓީމަކީ އެ ޓާގެޓަށް ވާސިލް ވެވޭނެ ޓީމެއް.
Advertisement
ބާސާގެ ރައީސް ލަޕޯޓާ ވިދާޅުވިއެވެ.
ޖެނުއަރީ ޓްރާންސްފާ މާކެޓުގައި ފޯވަޑެއް ގެންނާނެތޯ ނޫސްވެރިން ސުވާލު ކުރުމުން ލަޕޯޓާ ވިދާޅުވީ ބާސެލޯނާއަށް ބޭނުންވާ ކުޅުންތެރިން ހޯދަން ކޯޗު އިރުޝާދުދީފިނަމަ އެކަންކަން ހާސިލްކުރަން މެނޭޖްމަންޓުން މަސައްކަތް ކުރާނެކަމަށެވެ.
މި ސީޒަނަށް ބާސެލޯނާގެ އެންމެ އިސް ޓާގެޓަށްވީ ފޯވަޑް ލައިނަށް އެތްލެޓިކޯ މެޑްރިޑަށް ކުޅޭ އާޖެންޓީނާގެ ފޯވަޑް ހޫލިއަން އަލްވަރޭޒް ގެނައުމެވެ. ނަމަވެސް ބާސެލޯނާ އަށް އޭނާ ވިއްކަން އެ ކުލަބުން ވަނީ ދެކޮޅު ހަދައިފަ އެވެ. ނަމަވެސް ޖެނުއަރީގައި މިކަމަށް ބާސެލޯނާ އަނެއްކާ ވެސް މަސައްކަތް ކުރާނެ ކަމަށް ސްޕޭނުގެ ނޫސްތަކުން ބުނެއެވެ.
އަހަރުމެން ކުރީ ވަރަށް ރަނގަޅު ކަމެއް. އަހަރުމެން 100 މިލިއަން ޔޫރޯ އޭނާއަށް ހުށަހެޅީ އެއީ ރަނގަޅު އަގެއް ކަމަށް ވާތީވެ. އަހަރުމެން ވަރަށް ޝައުގުވެރިވާ ކުޅުންތެރިއެއް އެއީ.
ބާސާގެ ރައީސް ލަޕޯޓާ ވިދާޅުވިއެވެ.
މި ސީޒަނަށް ބާސެލޯނާއިން ވަނީ ކުޅުންތެރިން ވިއްކައިގެން 100 މިލިއަން ޔޫރޯ ހޯދައި ކުޅުންތެރިން ގަތުމަށް 200 މިލިއަނަށްވުރެ ގިނައިން ހޭދަކޮށްފަ އެވެ. އަދި އާމްދަނީއަށް ބަލައި އެ ކުލަބުގެ މުސާރައިގެ ޖާގަ ސްޕެނިޝް ލީގުން ވަނީ ގާތްގަނޑަކަށް 600 މިލިއަނާ ގާތަށް އިތުރުކޮށްދީފައެވެ.
ކިޔުންތެރިންގެ ހިޔާލު