ތިލަފުށީގައި ތަރައްގީކުރާ އިންޓަނޭޝަނަލް ބަނދަރުގެ މަޝްރޫއު ހަވާލުކޮށްފައިވަނީ ދިވެހިރާއްޖޭގެ ގާނޫނުތަކާއި ކަނޑައެޅިފައިވާ އުސޫލުތަކުގެ ތެރެއިން ކަމަށާއި، އެ ބަނދަރުގެ ތަރައްގީއާއި، މިލްކުވެރިކަމާއި، ހިންގުމުގެ ފުރިހަމަ ކޮންޓްރޯލް އޮތީ ދިވެހި ސަރުކާރުގެ އަތްމަތީގައި ކަމަށް މިނިސްޓްރީ އޮފް އިކޮނޮމިކް ދެވަލޮޕްމަންޓް އެންޑް ޓްރޭޑުން ބުނެފިއެވެ.
އިކޮނޮމިކް މިނިސްޓްރީން މިކަން ހާމަކޮށްފައިވަނީ ތިލަފުށީ އިންޓަނޭޝަނަލް ބަނދަރު ތަރައްގީކުރުމުގައި ދިވެހި ސަރުކާރުން ވަކި ބޭރުގެ ބައިވެރިއަކަށް އަނެއް ބައިވެރިއަކަށްވުރެ އިސްކަންދީފައިވާ ކަމަށް ބުނެ މީޑިއާތަކުގައި ފަތުރަމުންދާ ހަބަރުތަކާ ގުޅިގެން ނެރުނު ނޫސް ބަޔާނެއްގައެވެ.
އެ މިނިސްޓްރީން ބުނީ މި މަޝްރޫއު ހަވާލުކުރުމުގެ ނިންމުމަކީ ހަމައެކަނި ރާއްޖޭގެ ދުރުރާސްތާގެ ތަރައްގީގެ އިސްކަންދޭ ކަންކަމަށް ބަލައި ނިންމާފައިވާ ނިންމުމެއް ކަމަށެވެ. އަދި މިއީ ރާއްޖޭގެ އެއްވެސް ބޭރުގެ ބައިވެރިއަކާމެދު ގޮތެއް ނިންމުން ނުވަތަ އެއްވެސް ގައުމަކާމެދު ބަހައްޓާ ގުޅުމަށް އައި ބަދަލެއް އަންގައިދޭ ކަމެއް ނޫން ކަމަށްވެސް އެ ބަޔާނުގައި ބުނެފައިވެއެވެ.
ބަނދަރު ތަރައްގީކުރުމާއި، އޭގެ މިލްކުވެރިކަން އަދި ބަނދަރު ހިންގުން ކުރިއަށްދާނީ ދިވެހި ސަރުކާރުގެ ސީދާ ބެލުމުގެ ދަށުން ކަމަށް އިކޮނޮމިކް މިނިސްޓްރީން ބުނެއެވެ. އަދި ރާއްޖޭގެ ސިޔާދަތީ ބާރަކީ އެއްވެސް އިރެއްގައި ދޫދެވޭނެ ކަމެއް ނޫން ކަމަށާއި، ގާނޫނާއި ގައުމީ މަސްލަހަތު ތަންދޭ މިންވަރަށްވުރެ އިތުރަށް، ރާއްޖޭގެ އުމްރާނީ ތަރައްގީގެ ނިންމުންތަކުގެ މައްޗަށް ބަސްބުނުމުގެ ހައްގެއް މާޒީގެ ނުވަތަ މިހާރުގެވެސް ބައިވެރިއަކަށް ނޯންނާނެ ކަމަށް ބަޔާނުގައިވެއެވެ.
މިކަމާ ގުޅިގެން އިކޮނޮމިކް މިނިސްޓަރު މުހައްމަދު ސައީދު ވިދާޅުވީ ތިލަފުށި ބަނދަރަކީ ދިވެހި ރައްޔިތުންނަށާއި ގައުމުގެ ދުރުރާސްތާގެ ފާގަތިކަމަށްޓަކައި ތަރައްގީކުރެވޭ ތަނެއް ކަމަށެވެ.
“މި މަޝްރޫއު ހަވާލުކުރެވުނީ ސަރުކާރުގެ ކަނޑައެޅިފައިވާ އުސޫލުތަކުގެ ތެރެއިން. މިއީ އަޅުގަނޑުމެންގެ އެއްވެސް ބައިވެރިއަކާމެދު ދެކޭގޮތް ހާމަކޮށްދޭ ކަމެއްގެ ގޮތުގައި މާނަކޮށްގެން ނުވާނެ. ރާއްޖޭގެ ހުރިހާ ބައިވެރިންނަކީވެސް ސަރުކާރުން އަގުވަޒަންކުރާ ބައިވެރިން،” ސައީދު
ސަރުކާރުގެ ‘މާލްޑިވްސް-ފަސްޓް’ ނުވަތަ އިސްކަން ދިވެހިރާއްޖެއަށް ދިނުމުގެ ހާރިޖީ ސިޔާސަތަކީ އަބަދުވެސް ރާއްޖޭގެ ސިޔާދަތާއި ގައުމީ މަސްލަހަތު އިސްކޮށް، ބައިނަލްއަގުވާމީ ހުރިހާ ބައިވެރިންނާއެކުވެސް ބިނާކުރަނިވި ގޮތެއްގައި ގުޅިގެން މަސައްކަތްކުރުމުގެ ސިޔާސަތެއް ކަމަށް އިކޮނޮމިކް މިނިސްޓްރީގެ ބަޔާނުގައި ވަނީ ފާހަގަކޮށްފައެވެ.
ކިޔުންތެރިންގެ ހިޔާލު