ރ. ކިނޮޅަހުގައި ތަރައްޤީކުރާ ފުޓްސަލް ދަނޑުގައި މިހާރު ކުރިއަށްދަނީ ސިމެންތި ޖެހުމާއި ކުލަލުމުގެ މަސައްކަތްކަމަށް އެމްޓީސީސީން ބުނެފިއެވެ.
އެމްޓީސީސީން ބުނީ 200 މީޓަރު ސަރަހައްދެއްގައި ސިމެންތި އެޅުން ކުރިއަށްދާކަމަށެވެ. އަދިކުލަލުމުގެ މަސައްކަތްވެސް މިހާރު ކުރިއަށްދާކަމަށް އެކުންފުނިން ބުންޏެވެ.
ކިނޮޅަހުގައި ފުޓްސަލް ދަނޑު ތަރައްގީކުރުމަށް ސަރުކާރުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ ލިމިޓެޑް (އެމްޓީސީސީ) އާ ހަވާލުކުރީ މިދިޔަ އަހަރުގެ އޮގަސްޓުމަހުއެވެ.
120 ދުވަހުގެ ތެރޭގައި ނިންމާގޮތަށް 1.74 މިލިއަން ރުފިޔާއަށް އެމްޓީސީސީއާ ހަވާލުކުރެވުނު ފުޓްސަލް ދަނޑު ތަރައްގީކުރުމުގެ މަސައްކަތުގެ ތެރެއިން ކުރިއަށްދާނީ ފާރު ރޭނުމުގެ މަސައްކަތާ ކޮންކްރީޓްގެ މަސައްކަތުގެ އިތުރުން ދަނޑުގައި ޓާފް އެޅުމުގެ މަސައްކަތެވެ.
691 މީހުންގެ އާބާދީއެއް އޮންނަ ރ. ކިނޮޅަހުގައި މިވަގުތު އޮތް ފުޓްސަލް ދަނޑަކީ 2015 ވަނަ އަހަރުން ފެށިގެން އެރަށުގައި ބޭނުން ކުރަމުން އަންނަ ދަނޑެކެވެ. ގިނަ ދުވަސްވެ ދަނޑު މިހާރު ހަލާކުވެފަވާއިރު، ޒުވާނުން އަދި ކައުންސިލު ގުޅިގެން އަޅާފައިވާ ވޮލީކޯޓުވެސް މިހާރުވަނީ މަރާމާތުކުރަންޖެހިފައިކަމަށް ރ. ކިނޮޅަހު ކައުންސިލުގެ ރައީސް އަހުމަދު ހުސައިންވަނީ ވިދާޅުވެފައެވެ.
ކުޅިވަރުގެ ދާއިރާއިން ރަށަށް ގެނެވޭ ތަރައްގީއާއެކު ރަށުގެ ޒުވާނުންނަށް ވަރަށް ބޮޑު ހިތްހަމަޖެހުމެއް ލިބިގެންދާނެކަން ފާހަގަކުރައްވަމުން ރައީސް ވިދާޅުވީ އެރަށަކީ ކުޅިވަރަށް ލޯބިކުރާ ރައްޔިތަކު ނިސްބަތްވާ ރަށެއްކަމަށެވެ. އަދި ރަށުގެ އާބާދީގެ ނިސްބަތުން ގިނަ ބަޔަކު ކުޅިވަރުގައި ޝާމިލުވަމުންދާކަމަށް އޭނާ ވިދާޅުވިއެވެ.
ކިޔުންތެރިންގެ ހިޔާލު