މ. ކޮޅުފުށި ފިޓްނަސް އެންޑް ރެކްރިއޭޝަން ސެންޓަރު (އެފްއާރްސީ) ގެ މަސައްކަތް ބާރަށް ކުރިއަށްދާކަމަށް އެމްޓީސީސީން ބުނެފިއެވެ.
އެމްޓީސީސީން ބުނީ އެރަށޫގައި ތަރައްޤީކުރާ ފިޓްނެސް އެންޑް ރެކްރިއޭޝަން ސެންޓަރުގައި މިހާރު ކުރިއަށްދަނީ ކޮންކްރީޓް ތަނބުތައް އެޅުމުގެ މަސައްކަތްކަމަށެވެ.
ކޮޅުފުށީގައި އިމާރާތްކުރާ އެފްއާރްސީގެ ބިންގާއެޅީ މިދިޔަ އަހަރުގެ ސެޕްޓެމްބަރު 23ގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެރަށަށް ކުރެއްވި ދަތުރުފުޅުގެ ތެރެއިންނެވެ.
1485 މީހުންގެ އާބާދީއެއް އޮންނަ ކޮޅުފުށީގައި އިމާރާތްކުރާ އެފްއާރްސީގެ މަސައްކަތަކީ 4.61 މިލިއަން ރުފިޔާއަށް 220 ދުވަހުގެތެރޭގައި ނިންމާގޮތަށް އެމްޓީސީސީ އާއި ހަވާލުކޮށްފައިވާ މަޝްރޫއެކެވެ.
މި މަޝްރޫއުގެ ދަށުން ބިންގަނޑު ކޮނުމާއި މޭޝަނަރީ އަދި ކޮންކްރިޓް މަސައްކަތްކުރުމާއި ފުރާޅު ހަރުކުރުމާއި ދަވާދުލުމުގެ މަސައްކަތް ހިމެނެއެވެ.
ކޮޅުފުށީ އެފްއާރްސީގައިވެސް އިންޑޯ ޖިމާއި އެރޮބިކްސް އަދި އެކި ކަހަލަ ބޯޑު ގޭމްތަކާއި އެހެނިހެން ކުޅިވަރުތައް ކުޅެވޭނެ އިންތިޒާމުތައް ހަމަޖެހިގެންދާނެއެވެ.
ކިޔުންތެރިންގެ ހިޔާލު