ދައުލަތުގެ ހަރަދު ކުޑަކުރުމުގެ ސިޔާސަތުގެ ދަށުން، ލޯކަލް ގަވަމަންޓް އޮތޯރިޓީގެ ހުއްދަ ލިޔުމުން ހޯދައިގެން ނޫނީ ކައުންސިލްތަކަށް މުވައްޒަފުން ނުނެގެޭގޮތަށް ހަމަޖައްސައި އެކަން ކައުންސިލްތަކަށް އަންގަން ފަށައިފިއެވެ.
ކައުންސިލްތަކަށް މިގޮތަށް އަންގަން ފަށާފައި ވަނީ ލޯކަލް ގަވަމަންޓް އޮތޯރިޓީގެ ޗީފް އެގްޒެކްޓިވް އޮފިސަރު މުހައްމަދު ނިމާލު ސޮއިކުރައްވައި ކައުންސިލުތަކަށް ފޮނުއްވަން ފެއްޓެވި ސިޓީތަކެއްގައެވެ. މި ނިންމުމަކީ ދައުލަތުގެ ހަރަދުތައް ކުޑަކުރުމަށްޓަކައި އެ އޮތޯރިޓީން އަޅަން ނިންމާފައިވާ ފިޔަވަޅުތަކުގެ ތެރެއިން ފިޔަވަޅެކެވެ.
އެލްޖީއޭއިން ފޮނުވި ސިޓީތަކުގައި ބުނެފައި ވަނީ ދައުލަތުގެ ބަޖެޓުންނާއި ކައުންސިލްގެ އާމްދަނީން ހަރަދުވާ ގޮތަށް ވެސް، މުވައްޒަފުން ނެގެޭނީ އެ އޮތޯރިޓީގެ ހުއްދަ ލިޔުމުން ހޯދައިގެން ކަމަށެވެ.
މި އުސޫލުގެ ދަށުން ކައުންސިލްތަކުގައި އަލަށް އުފައްދާ ނުވަތަ ހުސްވާ ދާއިމީ މަގާމުތަކަށް މީހުން ނެގުން ހިމެނެއެވެ. މީގެ އިތުރުން ކަނޑައެޅޭ ވަކި މުއްދަތަކަށް ނުވަތަ ކަނޑައެޅޭ ވަކި މަސައްކަތްތަކެއް ކުރުމަށް ނަގާ ކޮންޓްރެކްޓް އެމްޕްލޯއިމެންޓް އަދި ވޭޖް އެމްޕްލޯއިމެންޓް ވަޒީފާތަކަށް މީހުން ނަގަންވާނީވެސް އެލްޖީއޭގެ ހުއްދަ ލިޔުމުން ހޯދުމަށް ފަހުގައި ކަމަށް އެ ސިޓީގައި ވަނީ ބަޔާންކޮށްފައެވެ.
ވަގުތީ ބޭނުންތަކާއި ވަކި މަޝްރޫއުތައް ހިންގުމަށް ކޮންޓްރެކްޓް، ވޭޖް އަދި ކޮންސަލްޓަންސީ އާއި އެ ނޫން ވެސް އުޖޫރަދެވޭ އެއްވެސް ބާވަތެއްގެ ވަޒީފާއަކަށް މީހުން ނެގުމަށް އިއުލާންކުރަން ޖެހޭނީ އެ އޮތޯރިޓީގެ ހުއްދަ ހޯދުމަށް ފަހު ކަމަށްވެސް އެލްޖީއޭއިން ވަނީ ކައުންސިލްތަކަށް އަންގާފައެވެ.
ކިޔުންތެރިންގެ ހިޔާލު