ކައުންސިލުތަކުގެ އިދާރާތަކުގެ ގޯތިތަކުގައި ސިޔާސީ ހަރަކާތްތައް ނުހިންގުމަށް ލޯކަލް ގަވަމަންޓް އޮތޯރިޓީ (އެލްޖީއޭ)އިން ކައުންސިލުތަކަށް އަންގައިފިއެވެ.
އެމްޑީޕީގެ ކޮންގްރެސް ބާއްވާނެ އެއްވެސް އިމާރާތެއް ނުލިބުމުގެ ސަބަބުން އެ ޕާޓީގެ ކޮންގްރެސް ބޭއްވުމަށް ހަމަޖެއްސީ މާލޭ ސިޓީ ކައުންސިލުގެ ހޯލުގައެވެ. މިދިޔަ ބުރާސްފަތި ދުވަހު ފެށި އެ ކޮންގްރެސްގެ މަސައްކަތްތައް ނިންމައިލައިފައިވަނީ ރޭގެ ވަގުތެއްގައެވެ.
އެމްޑީޕީގެ ކޮންގްރެސް ފެށި ދުވަހު ސިޓީ ކައުންސިލުތަކުގެ މޭޔަރުންނަށާއި ރަށު ކައުންސިލުތަކުގެ ރައީސުންނަށް އެލްޖީއޭގެ ސީއީއޯ މުޙައްމަދު ނިމާލް ފޮނުއްވި ސިޓީގައިވަނީ، ކައުންސިލުތަކުގެ އިދާރާގެ ގޯތިތަކާއި ކައުންސިލުތަކުގެ ނަންތަކުގައި ދަފުތަރުކޮށް އާންމު ޚިދުމަތްތަކަށް ކަނޑައަޅައިފައިވާ ބިންތަކުގައި ސިޔާސީ ޕާޓީތަކުގެ ފިކުރުތައް ދިރުވައި އާލާކުރުމަކީ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ އަސާސްތަކާ ޚިލާފަށް ކުރެވޭ ކަމެއް ކަމަށެވެ.
ކައުންސިލުތަކުގެ އެންމެހައި މުދާތަކާއި ވަސީލަތްތައް ކައުންސިލުތަކުން ބޭނުންކުރަންވާނީ އެ އިދާރާތަކަށް މަތިކޮށްފައިވާ ޒިންމާތައް އަދާކުރުމަށް ކަމަށް އެލްޖީއޭގެ ސީއީއޯ ފޮނުއްވި ސިޓީގައި ބަޔާންކުރައްވައިފައިވެއެވެ.
ކައުންސިލް އިދާރާއަކީ ރައްޔިތުން ޚިދުމަތް ހޯދުމަށް އަންނަ މުހިއްމު އިދާރާއެއްކަމުން އެފަދަ ތަންތަނުގައި ސިޔާސީ ހަރަކާތްތައް ހިންގުމަކީ ރައްޔިތުންގެ ހިތުގައި ނުތަނަވަސްކަން އުފެދިގެންދާނެ ކަމެއް ކަމަށް ދެކޭކަމަށް އެ ސިޓީގައި ލިޔުއްވައިފައިވެއެވެ.
ކައުންސިލުތަކުން ފޯރުކޮށްދޭ ޚިދުމަތްތައް ދިނުމުގައި ސިޔާސީ ފިކުރެއް ޕްރޮމޯޓުވާނެހެން ކައުންސިލުތަކުން އަމަލުކުރުމުގެ ސަބަބުން އެ ނިޒާމަށް ރައްޔިތުން ކުރާ އިތުބާރު ގެއްލޭނެ ކަމަށްވެސް އެލްޖީއޭއިން ބުނެފައިވެއެވެ.
އެހެންކަމުން ކައުންސިލުތަކުގެ މުދާތަކާއި ވަސީލަތްތައް ސިޔާސީ ޕާޓީއެއް ޕްރޮމޯޓުކުރުމަށް ނުވަތަ ވަކި ބަޔަކަށް މަންފާވާ ގޮތަށް ބޭނުން ނުކުރުމަށާއި ކައުންސިލުތަކުގެ ބިންތަކުގައި ސިޔާސީ ހަރަކާތްތައް ނުހިންގުމަށް ކައުންސިލުތަކަށް އެލްޖީއޭއިން ވަނީ އަންގައިފައެވެ.
ކިޔުންތެރިންގެ ހިޔާލު