ފެނަކަ ކޯޕަރޭޝަނުން ރައްޔިތުންނަށް ފޯރުކޮށްދޭ ކަރަންޓާއި ފެނާއި ނަރުދަމާގެ ހިދުމަތްތަކަށް ބަރޯސާވެވެނީ އެ ކުންފުނީގެ އިންޖިނިއަރުން ކުރާ ބުރަ މަސައްކަތުން ކަމަށް މެނޭޖިން ޑިރެކްޓަރު މުހައްމަދު އަފީފް ހުސައިން ވިދާޅުވެއްޖެއެވެ.
އިންޖިނިއަރުންގެ ދުވަހާ ގުޅުވައިގެން ދެއްވި ވީޑިއޯ މެސެޖެއްގައި އަފީފް ވަނީ ފެނަކައިގެ ހުރިހާ ދާއިރާއެއްގައި މަސައްކަތްކުރާ ހީވާގި އިންޖިނިއަރުންނަށް ދުވަހުގެ ހެޔޮއެދުމާއި ތަހުނިޔާ ދަންނަވާފައެވެ. އޭނާ ވިދާޅުވީ އެ ކުންފުނީގެ އިންޖިނިއަރުން ކުރަމުންދަނީ ހިދުމަތްތައް މެދުކެނޑުމެއް ނެތި ފޯރުކޮށްދިނުމުގައި ފާހަގަކޮށްލަންޖެހޭ ފަދަ މުހިންމު މަސައްކަތްތަކެއް ކަމަށެވެ.
ކޮންމެ ވަގުތަކު ކޮންމެ މައްސަލައެއް ދިމާވި ކަމުގައިވިޔަސް އެންމެ ފުރަތަމަ އެ ރަށެއްގައި ތިބޭ އިންޖިނިއަރުން އެކަމެއް ހައްލުކުރުމަށް ވަގުތުން މަސައްކަތް ފަށާނެ ކަމަށް އަފީފް ވިދާޅުވިއެވެ. އަދި އެ ރަށެއްގެ އިންޖިނިއަރުންނަށް މައްސަލަ ހައްލުނުކުރެވޭ ހާލަތްތަކުގައި ޖެހިގެން އޮންނަ ރަށުގެ އިންޖިނިއަރުން ހާޒިރުވެ އެ މަސައްކަތެއް ނިންމައިދޭނެ ކަމަށްވެސް އޭނާ ފާހަގަކުރެއްވިއެވެ.
ފެނަކައިގެ އިންޖިނިއަރިން ދާއިރާގައި ފިރިހެން މުވައްޒަފުންގެ އިތުރުން ގިނަ އަދަދެއްގެ އަންހެން މުވައްޒަފުންވެސް ހަރަކާތްތެރިވަމުންދާކަން މެނޭޖިން ޑިރެކްޓަރު ފާހަގަކުރެއްވިއެވެ.
އަފީފް އިތުރަށް ވިދާޅުވީ ފެނަކައިގެ މުވައްޒަފުން މަސައްކަތް ކުރަމުންދަނީ ގައުމީ ރޫހާއި ޖޯޝުގައި ކަމަށެވެ. އެ މުވައްޒަފުން ކުރާ ބުރަ މަސައްކަތުގެ އަގު އެންމެހާ ރައްޔިތުން ބަލައިގަންނަނީ ވަރަށް ބޮޑު އުފަލަކާއެކު ކަމަށްވެސް އޭނާ ވިދާޅުވިއެވެ.
ކިޔުންތެރިންގެ ހިޔާލު