މަސައްކަތުގެ މާހައުލުގައި ޓީމެއްގެ ގޮތުގައި ގުޅިގެން މަސައްކަތްކުރުން މުހިންމު ކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު ވިދާޅުވެއްޖެއެވެ.
ފަސްޓް ލޭޑީ ސާޖިދާ މިފަދައިން ވިދާޅުވީ، މަސައްކަތުގެ މާހައުލުގައި ނަފްސާނީ ދުޅަހެޔޮކަން ހަރުދަނާކުރުމަށް ރާއްޖޭގައި ބާއްވާ ފުރަތަމަ ސެމިނަރ ފެށުމުގެ ރަސްމިއްޔާތު ޝަރަފްވެރިކޮށްދެއްވައި ވާހަކަފުޅުދައްކަވަމުންނެވެ.
ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވީ، މަސައްކަތުގެ މާހައުލުގައި ދިމާވާ ތަފާތުކުރުންތަކާއި، ނުތަނަވަސްކަމާއި، ރައްކާތެރިކަންނެތުން ފަދަ ކަންކަމަކީ މުވައްޒަފުންގެ ނަފްސާނީ ދުޅަހެޔޮކަމާއި ގުޅިފައިވާ ކަންތައްތައްކަމަށެވެ. އެކަމަނާގެ ވާހަކަފުޅުގައި އެއްޓީމެއްގެ ގޮތުގައި މުވައްޒަފުން މަސައްކަތްކުރާއިރު، ހުރިހާ ކަމެއްގައިވެސް ޚިޔާލާއި މަޝްވަރާގައި އެކި ފެންވަރުގެ ވެރިން ބައިވެރިވުމުގެ މުހިންމުކަން ފާހަގަކުރެއްވިއެވެ. އަދި ކޮންމެ ފަރުދެއްގެވެސް ނަފްސާނީ ޙާލަތަކީ ފަރުވާތެރިވާންޖެހޭކަމެއްކަމަށް ވިދާޅުވިއެވެ.
“މަސައްކަތުގެ މާހައުލުގައި ދިމާވާ ތަފާތު ކުރުންތަކާއި، ނުތަނަވަސްކަމާއި، ރައްކާތެރިކަން ނެތުންފަދަ ކަންކަމީ މުވައްޒަފުންގެ ނަފްސާނީ ދުޅަހެޔޮކަމާއި ގުޅިފައިވާ ކަންތައް. މީގެއިތުރުން މި ދާއިރާއަކީ އިޖުތިމާޢީ އިލްމުގައި ވަރަށް ގިނަ ޢިލްމީ ދިރާސާތައް ކުރެވެމުންދާ ދާއިރާއެއް.” ފަސްޓް ލޭޑީސާޖިދާ ވިދާޅުވިއެވެ.
ރައީސުލްޖުމްހޫރިއްޔާގެ އަނބިކަނބަލުންގެ ވާހަކަފުޅުގައި ވަނީ ނަފްސާނީ ދުޅަހެޔޮކަމުގެ ބައެއް ތަފާސްހިސާބުތަކަށްވެސް އަލިއަޅުއްވާލައްވާފައެވެ. އެގޮތުން 2020/2021 ވަނަ އަހަރު ކުރެވުނު ސަރވޭއަކުން ދައްކާގޮތުގައި ރާއްޖޭގެ ކޮންމެ 5 މީހަކުން އެކަކީ ޑިޕްރެޝަންގެ އަލާމާތްތައް ތަހައްމަލުކުރި މީހެއްކަމަށް ވިދާޅުވިއެވެ. މިއީ ނުހަނު ސަމާލުވާންޖެހޭ ކަންތައްތައްކަމަށާއި، އެންމެންގެ ދުޅަހެޔޮކަމަށް ގުޅިގެން މަސައްކަތް ކުރަންޖެހޭ ކަމަށް ވިދާޅުވިއެވެ.
ރައީސުލްޖުމްހޫރިއްޔާގެ އަނބިކަނބަލުން ވިދާޅުވީ ދިރާސާތަކުން ދައްކާގޮތުގައި، ނަފްސާނީ ގޮތުން ދުޅަހެޔޮ މުވައްޒަފުން މަސައްކަތްކުރާ މުއައްސަސާތަކުގައި ސަލާމް ބުނުމާއި ގަޑިޖެހުން ފަދަ ކަންކަންވެސް މަދުވުމުގެ އިތުރުން، މަސައްކަތުގެ ރޫޙު އިތުރުވެ، ޚިދުމަތް ހޯދަން އަންނަ ފަރާތްތަކުގެ ހިތްހަމަޖެހުން އިދާރާގެ މުވައްޒަފުންނާއިމެދު އޮވެއެވެ.
“ނަފްސާނީ ގޮތުން ދުޅަހެޔޮ މުވައްޒަފުން މަސައްކަތްކުރާ މުއައްސަސާތަކުގައި ސަލާމް ބުނުމާއި ގަޑިޖެހުން ފަދަ ކަންކަން މަދުވޭ. އިދާރީ އުސޫލުތަކާއި ޚިލާފުވުން ފަދަ ކަންކަން މަދުކަމަށް ދިރާސާތަކުން ދައްކާ. އަދި މަސައްކަތުގެ ރޫޙު އިތުރުވެ، ޚިދުމަތް ހޯދަން އަންނަ ފަރާތްތަކުގެ ހިތްހަމަޖެހުން އިދާރާގެ މުވައްޒަފުންނާއިމެދު އަށަގަންނަކަން ހޯދިފައިވޭ.” މެޑަމް ސާޖިދާ ވިދާޅުވިއެވެ.
މަސައްކަތުގެ މާހައުލުގައި ނަފްސާނީ ދުޅަހެޔޮކަން ހަރުދަނާކުރުމަށް ބާއްވާ ސެމިނަރއަކީ ނޭޝަނަލް މެންޓަލް ހެލްތު ޑިޕާޓްމަންޓާއި ސިވިލް ސަރވިސް ކޮމިޝަން ގުޅިގެން، މަސައްކަތުގެ މާހައުލުގައި މުވައްޒަފުންގެ ނަފްސާނީ ދުޅަހެޔޮކަމާއި ގުޅޭގޮތުން ބާއްވާ ސެމިނަރއެކެވެ.
މި ސެމިނަރގައި ސިވިލް ސަރވިސްގެ އިދާރާތަކުގެ ހިއުމަން ރިސޯސް ދާއިރާގައި އިސްކޮށް ހަރަކާތްތެރިވާ ފަރާތްތަކާއި، ސިޓީތަކުގެ އިސްވެރިންނާއި، ރީޖަނަލް ހޮސްޕިޓަލްތަކުގެ އިސްވެރިން ހިމެނޭހެން 60 މީހުން ބައިވެރިވެއެވެ. މިއީ މިފަދަ ސެމިނަރއެއް ރާއްޖޭގައި ބާއްވާ ފުރަތަމަ ފަހަރެވެ.
ކިޔުންތެރިންގެ ހިޔާލު