މެދުއިރުމަތީގެ ގައުމުތަކަށް އެމެރިކާ ރައްޔިތުން ދަތުރު ނުކުރުމަށް، އެމެރިކާގެ ޚާރިޖިއްޔާއިން މުޅި މެދުއިރުމައްޗަށް އިންޒާރު ނެރެފިއެވެ.
މިކަމުގެ އިންޒާރުތައް ކުރިން ނެރުނީ، މެދުއިރުމަތީގެ ގައުމުތަކުގައި ހުރި އެމެރިކާގެ އެމްބަސީތަކުންނެވެ. އެގޮތުން، ޔޫއޭއީ، ގަތަރު، އުމާން، އިރާގު، އުރުދުން، އިސްރާއީލު، ކުވައިތު، ސައުދީ އަރަބިއްޔާ، ބަހްރެއިން އަދި މިސްރުގައި ހުންނަ އެމެރިކާ އެމްބަސީތަކުން ކުރިން އިންޒާރު ނެރެފައި ވެއެވެ.
އެމެރިކާގެ ޚާރިޖިއްޔާއިން އެންމެފަހުން ނެރުނު އިންޒާރުގައި، އެމެރިކާ ރައްޔިތުން މެދުއިރުމައްޗަށް ދަތުރު ނުކުރުމަށާއި، އަދި މެދުއިރުމަތީގެ ގައުމުތަކުގައި މިހާރު ތިބި އެމެރިކާ ރައްޔިތުންވެސް ވީހާވެސް އަވަހަކަށް ފުރުމާމެދު ވިސްނުމަށް އިލްތިމާސް ކޮށްފައި ވެއެވެ. ނުވަތަ ސަރަހައްދުގެ ހާލަތު ގޯސްވެއްޖެނަމަ ވަގުތުން ފުރަން ތައްޔާރުވެ ތިބުމަށްވެސް އިލްތިމާސް ކޮށްފައި ވެއެވެ.
އެމެރިކާ ޚާރިޖިއްޔާގެ އިންޒާރު މިއައީ، އެމެރިކާއާއި އިސްރާއީލު ގުޅިގެން އީރާނަށް ވަރުގަދަ ވައިގެ ހަމަލާތަކެއް ދޭން ތައްޔާރުވަމުންދާ ވަގުތެއްގައެވެ. އެމެރިކާ ސަރުކާރުގެ އޮފިޝަލުންވަނީ މިކަން ކަށަވަރު ކޮށްދީފައެވެ.
އެމެރިކާއާއި އިސްރާއީލުން ވައިގެ ހަމަލާތައް ދޭން އުޅެނީ އީރާނުގެ އިންޖީނުގެތަކަށާއި، ހަކަތައާ ގުޅުންހުރި ތަންތަނާއި، އީރާނުގެ ނިއުކްލިއަރ ސައިޓްތަކަށް ކަމަށް ރިޕޯޓްތައް ބުނެއެވެ.
އެމެރިކާގެ އިންޒާރުތަކަށް ރައްދުދެމުން އީރާނުންވަނީ، އީރާނަށް ހަމަލާ ދީފިނަމަ ސަރަހައްދުގައި އެމެރިކާގެ އަސްކަރީ ބޭސްތައް ހަދާފައިވާ ގައުމުތަކަށް ވަރުގަދަ ރައްދު ހަމަލާތަކެއް ދޭނޭ ކަމަށް ބުނެ ވަރުގަދަ އިންޒާރުތަކެއް ދީފައެވެ.
އީރާނުން ރައްދު ހަމަލާތައް ދޭނޭ ތަންތަނުގެ ލިސްޓެއް އީރާނުގެ އިންގިލާބީ ލަޝްކަރުން އާންމުކޮށްފައި ވާއިރު، ސަރަހައްދުގެ ގައުމުތަކުގައި ހުރި އެމެރިކާގެ މަސްލަހަތު އޮންނަ ހަކަތައިގެ އެއްވެސް ތަނެއް ސަލާމަތް ނުވާނޭ ކަމަށް އީރާނުންވަނީ އަންގާފައެވެ. އަދި އިސްރާއީލުގެ ހުރިހާ ގޭސްދަނޑުތައްވެސް ގޮއްވާލަން އީރާނުންވަނީ ލިސްޓް ކޮށްފައެވެ.
އެމެރިކާގެ ހަމަލާތަކުގެ ރައްދުގައި މެދުއިރުމަތީގެ އިތުރުން، ދުނިޔޭގެ އެކި ކަންކޮޅުތަކުގައި ހުރި އެމެރިކާގެ މަސްލަހަތުތަކަށް އީރާނާ ގުޅިފައިވާ ގްރޫޕްތަކުން ހަމަލާދިނުމަކީ އެކަށީގެންވާ ކަމެއް ކަމަށްބުނެވެސް އެމެރިކާ ސަރުކާރުން، އެމެރިކާ ރައްޔިތުންނަށް އިންޒާރުގެ އިލްތިމާސް ނެރެފައި ވެއެވެ.
ކިޔުންތެރިންގެ ހިޔާލު