ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ މަތީ މަޖިލީހުން އިންތިޚާބުކުރާ އެ ޕާޓީގެ ނައިބު ރައީސްކަމުގެ މަޤާމަށް ކުރިމަތިލެއްވުމަށް ނިންމަވައި، މިނިސްޓަރ އޮފް ޔޫތު އެމްޕަވަރމަންޓް، ސްޕޯޓްސް އެންޑް ފިޓްނަސް ޢަބްދުއްﷲ ރާފިއު އެކަން ރަސްމީކޮށް އިޢުލާން ކުރައްވައިފިއެވެ. ޒުވާނުންނާއި ކުޅިވަރާ ބެހޭ ވަޒީރު މިކަން ހާމަކުރެއްވީ މިއަދު މީސްމީޑިއާ މެދުވެރިކޮށް ހިއްސާކުރެއްވި ޚާއްޞަ މެސެޖެއްގައެވެ.
ވަޒީރު ޢަބްދުއްﷲ ރާފިއު މީސްމީޑިއާގައި ހިއްސާކުރެއްވި މެސެޖެއްގައި ވިދާޅުވީ، މާތް ﷲގެ ވާގިފުޅާއެކު ކޮންގްރެސް ޕާޓީގެ މަތީ މަޖިލީހުގެ ފަރާތުން އިންތިޚާބުކުރާ ޕާޓީގެ ނައިބު ރައީސްކަމުގެ މަޤާމަށް ކުރިމަތިލުމަށް ޤަޞްދުކުރައްވާފައިވާ ކަމަށެވެ. އަދި މި މަޤާމަށް އެމަނިކުފާނު އިންތިޚާބު ކުރެއްވުމުގައި މަތީ މަޖިލީހުގެ އެންމެހައި ލޮބުވެތި މެންބަރުންގެ ތާއީދަށް ނުހަނު އިޚުލާޞްތެރިކަމާއެކު އެދިވަޑައިގަންނަވާ ކަމަށްވެސް އެމަނިކުފާނު ވިދާޅުވިއެވެ.
ވަޒީރު ރާފިއުއަކީ ޒުވާނުންނާއި ކުޅިވަރުގެ ދާއިރާ ކުރިއެރުވުމުގައި ފާހަގަކޮށްލެވޭ ފުރިހަމަ ޚިދުމަތްތަކެއް ކުރައްވަމުން އަންނަ، ހަރަކާތްތެރި އަދި ދުރުވިސްނޭ ތަޞައްވުރެއް އޮތް ޤާބިލު ލީޑަރެކެވެ. ރާއްޖޭގެ ކުޅިވަރާއި ޒުވާނުންގެ ކަންކަން ހަރުދަނާކުރުމަށް ސަރުކާރުން ކުރިއަށްގެންދާ މުހިންމު މަޝްރޫޢުތައް ރޭވުމާއި ހިންގުމުގައި އެމަނިކުފާނު އަންނަނީ އިސް ދައުރެއް އަދާކުރައްވަމުންނެވެ.
ޕާޓީގެ މަތީ މަޖިލީހުގެ މެންބަރުންނާއި ޕާޓީގެ ޢާންމު ސަޕޯޓަރުންގެ ބޮޑު ތާއީދެއް އެމަނިކުފާނަށް އޮތްއިރު، ޕާޓީގެ ހިންގުން އިތުރަށް ހަރުދަނާކޮށް، ޒުވާނުންގެ އަޑު ސިޔާސީ މައިދާނުގައި އުފުލުމުގައި އެމަނިކުފާނުގެ ދައުރު މުހިންމުވެގެންދާނެ ކަމަށް ގުޅުންހުރި ފަރާތްތަކުން ދެކެއެވެ. މި އިންތިޚާބަކީ ޕީއެންސީގެ އެތެރޭގެ ހިންގުން ހަރުދަނާކުރުމަށާއި ކުރިއަށް އޮތް ތަނުގައި ޕާޓީގެ ސިޔާސީ ޙަރަކާތްތައް އިތުރަށް ފުޅާކުރުމަށް އެޅޭ މުހިންމު ފިޔަވަޅެކެވެ.
ކިޔުންތެރިންގެ ހިޔާލު