އއ. އުކުޅަހުގައި އޮތް ޕީޕަލްސް ނެޝަނަލް ކޮންގްރެސް (ޕީއެންސީ) ގެ ހަރުގެ ޖަލްސާގައި ވާހަކަފުޅު ދައްކަވަމުން، ތަރައްޤީއާއި ހަމަޖެހުމަށް އުކުޅަހުން ދެއްކި ނަމޫނާއާ އެއްގޮތަށް ދެހާސް އަށާވީސް ވަނަ އަހަރުގެ ރިޔާސީ އިންތިޚާބުގައި މުޅި ރާއްޖެއިން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެވަނަ ދައުރަކަށް އިންތިޚާބު ކުރާނެ ކަމަށް ސްޕޯޓްސް މިނިސްޓަރު އަބްދުﷲ ރާފިއު ވިދާޅުވެއްޖެ އެވެ.
މިނިސްޓަރުގެ ވާހަކަފުޅުގައި އަލިއަޅުއްވާލެއްވީ އުކުޅަހުގެ ރައްޔިތުން ބޭނުންވީ ތަރައްޤީއާއި ހަމަޖެހުމާއި ރައްކާތެރިކަން ކަމަށާއި، ރައީސް މުޢިއްޒުގެ ވެރިކަމުގައި އެކަންކަން ހާސިލުވަމުންދާ ކަމަށެވެ. އަދި އެކަންކަން ޤަބޫލުކޮށް ނިމިދިޔަ ކައުންސިލް އިންތިޚާބުގައި އުކުޅަހުގެ ރައްޔިތުން ކޮންގްރެސް ޕާޓީއަށް ފުރުސަތު ދީފައިވާ ކަމަށް އެ މަނިކުފާނު ވިދާޅުވި އެވެ.
މި ޖަލްސާ އޮތީ މިނިސްޓަރު ރާފިއު ނިސްބަތްވެވަޑައިގަންނަވާ އއ. އުކުޅަހުގައެވެ. ރައްޔިތުންގެ ފަރާތުން ދެއްވި އެ ތާއީދަށް ތަކުރާރުކޮށް ޝުކުރު އަދާކުރައްވަމުން މިނިސްޓަރު ވަނީ އުކުޅަހުން ދެއްކީ ނަމޫނާއެއް ކަމަށާއި، އެ ނަމޫނާ ދެހާސް އަށާވީސް ވަނަ އަހަރު މުޅި ރާއްޖެއިން ދައްކާނެ ކަމަށް ވިދާޅުވެފައެވެ.
އުކުޅަހުގައި ޕީއެންސީގެ ހަރަކާތްތައް މިހާރަށްވުރެ ފުޅާކުރާނެ ކަމަށް މިނިސްޓަރު ވިދާޅުވި އެވެ. އަދި އިރާދަކުރެއްވިއްޔާ ދެހާސް އަށާވީސް ވަނަ އަހަރުގެ ރިޔާސީ އިންތިޚާބު ކާމިޔާބު ކުރާނީ ވެސް މި މަގުން ކަމަށް އެ މަނިކުފާނު ފާހަގަކުރެއްވިއެވެ.
އުކުޅަހުގައި ފެށުނު ތަރައްޤީގެ މަޝްރޫޢުތަކާއެކު ރަށަށް ހެޔޮ ބަދަލުތަކެއް އަންނާނެ ކަމަށް މިނިސްޓަރު ވިދާޅުވި އެވެ. އެގޮތުން ހައުސިންގ މަޝްރޫޢުގެ އިތުރުން ފަރުމަސްވެރިކަމަށް ޚާއްޞަކޮށްގެން އަޅާ ފުރަތަމަ އައިސްޕްލާންޓް އެ ރަށުގައި ޤާއިމުކުރުމުގެ މަސައްކަތް ބަޔަކާ ހަވާލުކޮށްފައިވާ ކަން އެ މަނިކުފާނު ފާހަގަކުރެއްވިއެވެ.
މީގެ އިތުރުން އުކުޅަހުގައި ސަރުކާރުން ތަރައްޤީކުރާ ސްޕޯޓްސް ކޮމްޕްލެކްސްގެ ބިންގާވެސް ވަނީ އަޅާފައެވެ. ކުރީގެ ސަރުކާރަށް ތިން އަހަރުވީއިރު ނިންމާނުލެވުނު ފުޓްބޯޅަ ދަނޑު މި ސަރުކާރުގެ ފުރަތަމަ އަހަރުގެ ތެރޭގައި ނިންމައި، ވޮލީ ކޯޓު ހުޅުވުމަކީ އެ ރަށުގެ ޒުވާނުންނަށް ލިބުނު ބޮޑު އުފަލެއް ކަމަށް މިނިސްޓަރު ވިދާޅުވިއެވެ.
ކިޔުންތެރިންގެ ހިޔާލު