އަހަރުގެ ފުރަތަމަ 6 މަސް ދުވަހުގެ ތެރޭގައި ރާއްޖެއިން 16,991 މެޓްރިކް ޓަނުގެ މަސް ބޭރުކޮށްފައިވާކަމށް އެމްއެމްއޭގެ ތަފާސް ހިސާބުތަކުން ދައްކައިފިއެވެ.
އެމްއެމްއޭއިން އާންމުކުރި ތަފާސް ހިސާބުތަކުން ދައްކާގޮތުގައި އެންމެ ގިނައިން ބޭރު ކޮށްފައިވަނީ، ތާޒާ އަދި ފިނިކުރި މަހުގެ ބާވަތްތަކެވެ. ތަފާސް ހިސާބުތަކުން ދައްކާގޮތުގައި އަހަރުގެ ފުރަތަމަ 6 މަސް ދުވަހުގެ ތެރޭގައި ރާއްޖެއިން 16,991 މެޓްރިކް ޓަނުގެ މަސް ބޭރު ކޮށްފައިވެއެވެ. މިއީ، މިދިޔަ އަހަރުގެ މިމުއްދަތުގައި ބޭރުކުރި 44,791 މެޓްރިކް ޓަނުގެ މަހާއި އަޅާބަލާއިރު، 62 އިންސައްތަ ދަށް އަދަދެކެވެ.
6 މަސް ދުވަހުގެ ތެރޭގައި 10,603 މެޓްރިކް ޓަނުގެ ކަޅުބިލަ މަސް ވަނީ ބޭރު ކޮށްފައެވެ. މިއީ، 2025ވަނަ އަހަރުގެ ފުރަތަމަ 6 މަސް ދުވަހު ބޭރު ކުރި 36,112 މެޓްރިކް ޓަނުގެ ކަޅުބިލަ މަހާއި އަޅާބަލާއިރު 70 އިންސައްތަ ދަށް އަދަދެކެވެ. ދަޅުގައި ބަންދުކޮށްގެން ބޭރުކުރި މަހުގެ އަދަދުވެސް ވަނީ 11 އިންސައްތަ ދަށްވެފައެވެ. މިއަހަރުގެ ފުރަތަމަ 6 މަހު ދަޅުގައި ބަންދު ކޮށްގެން ބޭރު ކޮށްފައިވަނީ، 2,702 މެޓްރިކް ޓަނުގެ މަހެވެ. މިދިޔަ އަހަރުގެ މި މުއްދަތުގައި މި އަދަދު އުޅުނީ، 3,056 މެޓްރިކް ޓަނުގައި ކަމަށް އެމްއެމްއޭގެ ރިޕޯޓުން ދައްކައެވެ.
ރާއްޖެއިން ބޭރުކުރި މަހުގެ އަދަދު ދަށްވެފައިވަނީ، މިމުއްދަތުގެ ތެރޭގައި މަސްވެރިކަން ދަށްވުމުގެ ސަބަބުން ކަމަށް ތަފާސްހިސާބުތަކުން ހާމަވެއެވެ. އެެހެންނަމަވެސް މިމުއްދަތުގެ ތެރޭގައި މިފްކޯއާއި އަމިއްލަ ކުންފުނިތަކުން މަސް ގަންނަ އަގު މަތިކޮށްފައިވާކަން ފާހަގަކޮށްލެވެއެވެ. އެގޮތުން އަހަރުގެ ކުރީކޮޅު ކަޅުބިލަމަހުގެ ކިލޯއެއް 16 ރުފިޔާއަށް ގަތް ނަމަވެސް މިހާރު މަސް ގަންނަމުންދަނީ 20 ރުފިޔާއަށެވެ.
ސަރުކާރުން އަންނަނީ މަސްވެރިކަމުގެ ސިނާއަތުގައި ހުރި މައްސަލަތައް ހައްލުކޮށް، މަގުގެ އުފެއްދުންތައް އަގުއެއްކޮށްގެން ބޭރުކުރުމަށް މަސައްކަތްކުރަމުންނެވެ.
ކިޔުންތެރިންގެ ހިޔާލު