ބޭންކް އޮފް މޯލްޑިވްސް (ބީއެމްއެލް) ގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް، އޭޝިއަން ބޭންކާސް އެސޯސިއޭޝަން (އޭބީއޭ) ގެ ޗެއާމަންގެ މަގާމަށް އައްޔަންކޮށްފިއެވެ. މިއީ މި ޝަރަފުވެރި މަގާމަށް ދިވެއްސަކު އައްޔަންކުރެވުނު ފުރަތަމަ ފަހަރެވެ.
މުހައްމަދު ޝަރީފް މި މަގާމަށް އައްޔަންކުރެއްވުމަށް އޭޝިއަން ބޭންކާސް އެސޯސިއޭޝަންގެ ބޯޑުން ނިންމާފައިވަނީ އެ ޖަމިއްޔާގެ ޗާޓަރާ އެއްގޮތްވާ ގޮތުގެ މަތިންނެވެ. މި އައްޔަންކުރުމަށް ރަސްމީކޮށް އަމަލުކުރަން ފަށާނީ މިއަދުން ފެށިގެންނެވެ. މިއީ ރާއްޖޭގެ މާލީ ދާއިރާ ބައިނަލްއަގުވާމީ ފެންވަރުގައި ތަމްސީލުކުރުމަށް ލިބުނު ވަރަށް ބޮޑު ފުރުސަތެކެވެ.
މުހައްމަދު ޝަރީފަކީ މީގެކުރިން 2018 އިން 2020 އަށް އެ އެސޯސިއޭޝަންގެ ވައިސް ޗެއާމަންގެ މަގާމު ފުރުއްވާފައިވާ ބޭފުޅެކެވެ. އެ މުއްދަތުގައި އެސޯސިއޭޝަންގެ އިސްތިރާޖީ އިސްކަންދޭ ކަންކަމުގައި އޭނާ ވަނީ މުހިންމު ހިއްސާއެއްވެވަޑައިގެން، ސަރަހައްދުގެ މެންބަރު ބޭންކުތަކުގެ މެދުގައި ގުޅުން ބަދަހިކުރުމަށް އެހީތެރިވެދެއްވާފައެވެ. މީގެއިތުރުން، އޭނާގެ ހިންގުންތެރިކަމަށް އޮތް އިތުބާރު ހާމަކޮށްދެމުން، 2025 ވަނަ އަހަރު އަލުން އޭނާ ވަނީ އެސޯސިއޭޝަންގެ ވައިސް ޗެއާމަންގެ މަގާމަށް އައްޔަންކޮށްފައެވެ.
މި އާ އައްޔަންކުރުމާއެކު، އޭޝިއާ ސަރަހައްދުގެ ބޭންކިން ދާއިރާގެ ކުރިއެރުމަށާއި، މެންބަރު ގައުމުތަކުގެ މެދުގައި މާލީ ގުޅުންތައް ބަދަހިކުރުމަށް އޭނާގެ ތަޖުރިބާގެ ބޭނުން އިތުރަށް ހިފިގެންދާނެއެވެ. މިއީ ބޭންކް އޮފް މޯލްޑިވްސްގެ އިތުރުން މުޅި ރާއްޖޭގެ މާލީ ސިނާއަތަށްވެސް ލިބުނު ފާހަގަކޮށްލެވޭ ބޮޑު ޝަރަފެކެވެ.
ކިޔުންތެރިންގެ ހިޔާލު