އޭޓީއެމް ނެޓްވަރކް ފުޅާކުރުމާއި ގެދޮރުވެރިކަމުގެ ސިނާޢަތަށް ބޭންކުން ވަންނަން ނިންމި ނިންމުމަކީ ސިޔާސީ ނިންމުންތަކެއް ނޫންކަމަށް ބޭންކް އޮފް މޯލްޑިވްސްގެ ސީއީއޯ މުޙައްމަދު ޝަރީފް ވިދާޅުވެއްޖެއެވެ.
ބީއެމްއެލުން މިއަދު ބޭއްވި ނޫސްވެރިންގެ ބައްދަލުވުމުގައި އެބޭންކުގެ ސީއީއޯ ޝަރީފް ވިދާޅުވީ، އެބޭންކުގެ ނިންމުންތައް ސިޔާސީ ނުވާނެކަމަށާއި، އެފަދަ ވާހަކަތަކެއް ދެކެވޭ މައިގަނޑު ސަބަބެއްކަމަށް ޤަބޫލުކުރައްވަނީ ބޭންކުގެ އޭޓީއެމް ނެޓްވަރކް ފުޅާކުރުމާއި ގެދޮރުވެރިކަމުގެ ސިނާޢަތަށް ބޭންކުން ވަނުމުންކަމަށެވެ. އެހެންނަމަވެސް އެއީ ސިޔާސީ ނިންމުންތަކެއް ނޫންކަމަށާއި އެއީ، ބޭންކުގެ ބޯޑާއި މަޝްވަރާކުރެވި ނަގާފައިވާ ވިޔަފާރީގެ ނިންމުންތަކެއްކަމަށް ޝަރީފް ވިދާޅުވިއެވެ.
އެއީ ސިޔާސީ ނިންމުންތަކެއް ނޫން. އެއީ ބޭންކްގެ ކުރިމަގަށްޓަކައި ބޭންކުގެ ކުރިއެރުމަށްޓަކައި، ބޭންކްގެ މެނޭޖްމަންޓުންނާއި ބޯޑުން މަޝްވަރާކޮށް ނަގާފައިވާ ބިޒްނަސް ޑިސިޝަންތަކެއް.
ސީއީއޯ ޝަރީފް ވިދާޅުވިއެވެ.
ޝަރީފް ވިދާޅުވީ އޭޓީއެމްގެ ޚިދުމަތް ފުޅާކުރެވުނީ ސަރުކާރުގެ ވަރަށް ބޮޑު އިންވެސްޓްމަންޓަކާއެކުގައިކަމަށެވެ. އެހެންކަމުން އެކަމުގައި ސަރުކާރަށް ކްރެޑިޓް ނެގިދާނެކަމަށެވެ. އެހެންނަމަވެސް ބޭންކުގެ ނަޒަރުން ބަލާއިރު، ބޭންކުން އެކަންކުރީ ސަރުކާރުގެ އިންވެސްޓްމަންޓާއެކު ބެންކަށް ލިބޭނެ ފައިދާއަށް ބެލުމަށްފަހުގައިކަމަށާއި ބޭންކުންގެ ނިންމުންތަކަކީ ވަކި ހަމަތަކެއްގެ މަތިން ބޭންކުގައި އޮތް ބޯޑުން ނިންމާ މިނިވަން ނިންމުންތަކެއްކަމަށް ޝަރީފް ވިދާޅުވިއެވެ.
ބީއެމްއެލުން ވަނީ ރާއްޖޭގެ މީހުން ދިރިއުޅޭ ހުރިހާ ރަށެއްގައި އޭޓީއެމްގެ ޚިދުމަތް ފަށާފައެވެ. އަދި ބައެއް ރަށްރަށުގައި ޑޮލަރުގެ އޭޓީއެމްވެސް އަންނަނީ ބަހައްޓަމުންނެވެ.
ކިޔުންތެރިންގެ ހިޔާލު