ދިވެހިރާއްޖޭގެ 61 ވަނަ މިނިވަން ދުވަހުގެ މުނާސަބަތުގައި ބާއްވާ ހާއްސަ އަސްކަރީ ހިނގާލުން މާދަމާ ހަވީރު ހުޅުމާލޭގައި ބޭއްވުމަށް އެމްއެންޑީއެފުން ނިންމައިފިއެވެ. މި ހިނގާލުމަކީ ރާއްޖޭގެ މިނިވަންކަމުގެ 61 އަހަރު ފާހަގަކުރުމުގެ ގޮތުން ސިފައިން އިސްނަގައިގެން ކުރިއަށް ގެންދާ މުހިންމު ހަރަކާތެކެވެ.
މާދަމާ ހަވީރު 16:30 ގައި ފަށާ މި ހިނގާލުމުގައި، އެމްއެންޑީއެފްގެ މިލިޓަރީ ބޭންޑާ އެކު ޖުމްލަ ހަ ގެމަ ބައިވެރިވާނެއެވެ. މި ހަރަކާތުގައި ސިފައިންގެ އެކި ޔުނިޓުތަކުން ފޯރުކޮށްދޭ ހިދުމަތްތަކާއި، އަސްކަރީ ހުނަރުތަކުގެ އިތުރުން އެކި ބާވަތުގެ އަސްކަރީ އުޅަނދުތައް އާންމުންނަށް ދައްކާލުމަށް ވަނީ ހަމަޖެހިފައެވެ.
ހުޅުމާލޭގެ ހިތިގަސްމަގުގައި ހުންނަ ސިންތެޓިކް ދުވާ ޓްރެކް ސަރަހައްދުން ފެށުމަށް ހަމަޖެހިފައިވާ މި ހިނގާލުން، އެ ސަރަހައްދުން ފެށިގެން ހުޅުމާލޭގެ މައިގަނޑު މަގުތަކުގައި ކުރިއަށް ދާނެއެވެ. ހިނގާލުން ކުރިއަށްދާ ވަގުތު މައިގަނޑު ދެ ސަރަހައްދެއްގައި މަޑުކޮށް، މިލިޓަރީ ބޭންޑުން ގައުމީ ރާގުތައް ހުށަހަޅައިދޭނެއެވެ. އެގޮތުން ހުށަހެޅުންތައް އޮންނާނީ ސެންޓްރަލް ޕާކު ކައިރީ ހިތިގަސްމަގާއި ހުވަނދުމާހިނގުން ގުޅޭ ކަންމައްޗާއި، ސިފްކޯ ފުލެޓް ކައިރީ ރީތިގަސްމަގާއި އަސުރުމާހިނގުން ގުޅޭ ކަންމަތީގައެވެ.
ގައުމީ ޖޯޝާއި ފޯރި އިތުރުކޮށްދޭ މި ހިނގާލުމަކީ ކޮންމެ އަހަރަކު ވެސް އާންމުންގެ ބޮޑު ތަރުހީބެއް ލިބޭ ހަރަކާތެކެވެ. މި ހިނގާލުން ކުރިއަށްދާ ވަގުތުތަކުގައި ހުޅުމާލޭގެ ޓްރެފިކަށް ބަދަލުތަކެއް އަންނާނެތީ، އެކަމަށް ސަމާލުކަން ދިނުމަށާއި، ޓްރެފިކް ފުލުހުންގެ އިރުޝާދުތަކާ އެއްގޮތަށް އަމަލުކުރުމަށް ކަމާބެހޭ ފަރާތްތަކުން ވަނީ އިލްތިމާސްކޮށްފައެވެ.
ކިޔުންތެރިންގެ ހިޔާލު