މިފްކޯއިން ކަނޑުއޮތްގިރީގައި ގާއިމުކޮށްފައިވާ 25 ޓަނުގެ އައިސް ޕްލާންޓުން މިއަދު މަސްވެރިންނަށް އައިސް ވިއްކަން ފަށައިފިއެވެ. މިއީ މާލެ ސަރަހައްދުގައި ހަރަކާތްތެރިވާ މަސްވެރިންނަށް އައިސް ހޯދުމުގައި ދިމާވާ ދަތިތަކަށް ހައްލެއް ހޯދައިދިނުމުގެ ގޮތުން ފެށި މުހިންމު ޚިދުމަތެކެވެ.
މިފްކޯއިން އެކްސްގައި އާންމުކުރި މައުލޫމާތުގައި ބުނެފައިވަނީ، ކަނޑުއޮތްގިރިން އައިސް ލިބޭނެ އިންތިޒާމު ހަމަޖެހިގެން ދިއުމަކީ މާލެ ސަރަހައްދުގެ މަސްވެރިންނަށް ލިބިގެންދިޔަ ވަރަށް ބޮޑު ލުއިފަސޭހައެއް ކަމަށެވެ. މާލެ އަތޮޅަކީ ގިނަ އަދަދެއްގެ ދޯނިފަހަރު މަސްވެރިކަމުގައި ހަރަކާތްތެރިވާ ސަރަހައްދަކަށް ވުމާއެކު، އައިސް ހޯދުމަށް އޮންނަ ޑިމާންޑް އަބަދުވެސް ބޮޑެވެ. އެހެންކަމުން އަލަށް ޚިދުމަތްދޭން ފެށި 25 ޓަނުގެ އައިސް ޕްލާންޓާއެކު، އައިސް ހޯދުމަށް މަސްވެރިން ކުރަންޖެހޭ ދަތުރުތަކަށާއި ހޭދަކުރަންޖެހޭ ވަގުތަށް ބޮޑު ލުޔެއް ލިބިގެންދާނެއެވެ.
މަސްވެރިންނަށް އައިސް ފޯރުކޮށްދިނުމުގެ އިތުރުން، މި ހިނގާ މަހުގެ ތެރޭގައި ކަނޑުއޮތްގިރީގައި ވަނީ ހިކިމަސް އުފައްދާ ފެކްޓަރީއެއްވެސް ހުޅުވާފައެވެ. ރާއްޖޭގެ އެކި ކަންކޮޅުތަކުގައި މަސްވެރިކަމުގެ އުމްރާނީ ތަރައްގީގެ މަޝްރޫއުތައް ހިންގަމުންދާއިރު، ކަނޑުއޮތްގިރީގައި މިފަދަ ވަސީލަތްތައް ގާއިމުކުރެވެމުން ދިއުމަކީ މަސްވެރިން ބާނާ މަހަށް ހަމައަގު ހޯދައިދިނުމަށާއި، މަސްވެރިކަމުގެ ސިނާއަތް އިތުރަށް ފުޅާކުރުމަށް ކުރަމުންދާ މަސައްކަތްތަކަށް ލިބޭ ބޮޑު ކުރިއެރުމެކެވެ. މިއާއެކު، އެ ސަރަހައްދުގައި ހަރަކާތްތެރިވާ މަސްވެރިންނަށް ފަސޭހައިން އައިސް ލިބުމުގެ މަގުފަހިވެ، މަސްވެރިކަމުގެ އުފެއްދުންތެރިކަން އިތުރުވެގެންދާނެކަމަށް ބެލެވެއެވެ.
ކިޔުންތެރިންގެ ހިޔާލު