ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، ކަނޑުއޮތްގިރީގައި މަސްވެރިކަމުގެ ވަސީލަތްތައް ތަރައްޤީކުރުމުގެ ގޮތުން މިފްކޯއިން އައިސް ޕްލާންޓަކާއި ހިކިމަސް ކާރުޚާނާއެއް މިއަދު ހުޅުވައިފިއެވެ.
މިއަދު ބޭއްވި ޚާއްޞަ ރަސްމިއްޔާތެއްގައި މި ދެ ކާރުޚާނާ ރަސްމީކޮށް އިފުތިތާޙުކޮށްދެއްވީ މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމެވެ. މި ރަސްމިއްޔާތުގައި މިފްކޯގެ ސީއީއޯ މުޙައްމަދު އަނަސްގެ އިތުރުން ވުޒާރާއާއި މިފްކޯގެ އިސްވެރިން ބައިވެރިވެވަޑައިގަތެވެ. މިއީ ރާއްޖޭގެ މަސްވެރިކަމުގެ ސިނާޢަތް ކުރިއެރުވުމަށް ސަރުކާރުން ކުރިއަށްގެންދާ މަސައްކަތްތަކުގެ ތެރެއިން ފުރިހަމަކުރެވުނު މުހިންމު މަޝްރޫޢެކެވެ.
މިފްކޯއިން މަޢުލޫމާތު ދީފައިވާ ގޮތުގައި، އަލަށް ހުޅުވި ހިކިމަސް ކާރުޚާނާއިން ދުވާލަކު 3 ޓަނުގެ މަސް ޕްރޮސެސްކުރެވޭނެއެވެ. އަދި އައިސް ޕްލާންޓަކީ ދުވާލެއްގެ މައްޗަށް 25 ޓަނުގެ ގަނޑުފެން އުފެއްދުމުގެ ޤާބިލުކަން ލިބިފައިވާ ތަނެކެވެ. މި ކާރުޚާނާގައި މިއަދުން ފެށިގެން ވަޅޯމަހާއި ހިކިމަސް ތައްޔާރުކުރަން ފަށާފައިވާއިރު، ވަރަށް އަވަހަށް ރިހާކުރާއި މުގުރިމަސް ފަދަ ބާވަތްތައް ވެސް ތައްޔާރުކުރަން ފަށާނެއެވެ. މި މަސައްކަތަށް ބޭނުންވާ އެންމެ ރަނގަޅު ވަސީލަތްތައް ޤާއިމުކޮށްފައިވަނީ އެފަދަ ތަނެއްގައި ހުންނަންޖެހޭ އެންމެ މަތީ ސިއްޙީ މިންގަނޑުތަކަށް ފެތޭ ގޮތަށެވެ.
މިފްކޯގެ ސީއީއޯ އަނަސް ވިދާޅުވި ގޮތުގައި، މާލެއާ ކައިރިން މިފަދަ ޚިދުމަތެއް ފެށުމަކީ މާލޭ ސަރަޙައްދުގެ ފިހާރަތަކަށް މިފްކޯގެ އުފެއްދުންތައް ނެރުމުގައި ހުރި ގޮންޖެހުންތަކަށް ލިބޭނެ ވަރަށް ބޮޑު ޙައްލެކެވެ. ކުރިން ކޫއްޑޫން ޕްރޮސެސްކޮށްގެން މާލެއަށް ތަކެތި ގެނައުމުގައި ލޮޖިސްޓިކް ދަތިތަކާ ހުރެ މުދާ ހުސްވުމުގެ ޝަކުވާ ލިބުނު ނަމަވެސް، ކަނޑުއޮތްގިރީގެ ކާރުޚާނާއާއެކު އެކަމަށް ޙައްލެއް ލިބި، އުފެއްދުންތައް މެދުނުކެނޑި ފޯރުކޮށްދިނުމަށް މަގުފަހިވެގެންދާނެކަމަށް އޭނާ ފާހަގަކުރެއްވިއެވެ.
ކިޔުންތެރިންގެ ހިޔާލު