އިންފޮމޭޝަން ކޮމިޝަނަރު އަޙުމަދު އާހިދަކީ ސަރުކާރާ ދެކޮޅަށް މަސައްކަތްކުރަން އޯޑަރު ލިބޭ، ސަރުކާރާ އިދިކޮޅު ބޭފުޅެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ސިފަކުރައްވައިފިއެވެ. ރައީސް މިހެން ވިދާޅުވީ، މިނިވަން ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.
މިނިވަންކަމުގެ ވާހަކަ ދައްކާއިރު ސަރުކާރު ހިންގާ ނިޒާމުގެ މިނިވަންކަން ވެސް ފާހަގަކުރަން ޖެހޭކަން ބަޔާންކުރައްވައި، ރައީސް ވިދާޅުވީ ސަރުކާރު ހިންގުން ނުވަތަ ހެޔޮ ވެރިކަމުގެ ނިޒާމު އޭގެ އެންމެ ފުރިހަމަ ގޮތުގައި ތަންފީޒުކުރުމަކީ މި ސަރުކާރުގެ ސިޔާސަތު ކަމަށެވެ. އެގޮތުން، މައުލޫމާތު ހޯދައި ލިބިގަތުމުގެ ގާނޫނުގެ ދަށުން ދައުލަތުގެ އިދާރާތަކުން އަމިއްލަ އިސްނެގުމުގައި އާންމުކުރަން ޖެހޭ މައުލޫމާތު މި ސަރުކާރުގެ ހުރިހާ ވުޒާރާއަކުން އާންމުކޮށްފައިވާކަން އެ މަނިކުފާނު ފާހަގަކުރެއްވިއެވެ.
މިއީ ރާއްޖޭގެ ތާރީޚުގައި ވެސް ސަރުކާރަކުން މިގޮތަށް އަމަލުކުރި ފުރަތަމަ ފަހަރުކަން އިންފޮމޭޝަން ކޮމިޝަނަރު ވެސް ފާހަގަކުރައްވާފައިވާ ކަމަށް ރައީސް ވިދާޅުވިއެވެ. އިންފޮމޭޝަން ކޮމިޝަނަރަކީ ކުރީގެ ސަރުކާރުން އައްޔަންކޮށްފައި ހުންނެވި، އަދި ސިޔާސީ ގޮތުން ސަރުކާރާ ދެކޮޅަށް ކަންކަން ކުރަން އޯޑަރު އަންނަ ބޭފުޅެއްކަން ފާހަގަކުރައްވައި، ރައީސް ވިދާޅުވީ ސަރުކާރުން ގާނޫނު ތަންފީޒު ނުކުރާނަމަ އެފަދަ ބޭފުޅަކު އެކަން އިއުލާނު ނުކުރައްވާނެ ކަމަށެވެ.
ވުޒާރާތަކާ އެއްގޮތަށް ސަރުކާރުގެ ކުންފުނިތަކުން ވެސް ހާމަކުރަން ޖެހޭ މައުލޫމާތުތައް ހާމަކުރުމުގެ މަސައްކަތް މިހާރު ކުރަމުން އަންނަ ކަމަށް އެ މަނިކުފާނު ވިދާޅުވިއެވެ. އަދި މި ސަރުކާރުން އަންނަނީ މައުލޫމާތު ހޯދައި ލިބިގަތުމުގެ ހައްގުގެ ދަށުން ހުށަހަޅާ ހުށަހެޅުންތަކަށް ޖަވާބުދީ، ނޫސްވެރިންގެ ބައްދަލުވުންތައް ބާއްވައި، ނޫސްވެރިންނާ ގާތުން މަސައްކަތްކޮށް މީޑިއާއާ ރައްޓެހިކަން ބޭއްވުމުގައި ނަމޫނާ ދައްކަވަމުން ކަމަށް ވެސް ރައީސް ވިދާޅުވިއެވެ.
އިންފޮމޭޝަން ކޮމިޝަނަރުގެ މަގާމަށް އަޙުމަދު އާހިދު އައްޔަންކުރައްވާފައިވަނީ ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުގައި، ސެޕްޓެމްބަރު 6، 2021 ގައެވެ. އަމިއްލައަށް އިސްނަގައިގެން ހާމަކުރަން ޖެހޭ މައުލޫމާތު އެއްވެސް ވުޒާރާއަކުން އެއްކޮށް ހާމަކޮށްފައިނުވާ ކަމަށް މިދިޔަ މެއި މަހުގެ ތެރޭގައި އާހިދު ވިދާޅުވި ނަމަވެސް، ފަހުން އޭނާ ވަނީ ހުރިހާ ވުޒާރާއަކުން ވެސް ގާނޫނުން ލާޒިމުކުރާ މައުލޫމާތުތައް އާންމުކޮށްފައިވާކަން ކަށަވަރުކޮށްދެއްވާފައެވެ.
ކިޔުންތެރިންގެ ހިޔާލު