މިއަދު ފާހަގަކުރަމުންދާ ރާއްޖޭގެ މިނިވަން ދުވަހުގެ މުނާސަބަތުގައި ބޭއްވި ހާއްސަ ޖަލްސާގައި ވާހަކަފުޅު ދައްކަވަމުން، ކުރީ ސަރުކާރުތަކުން ހަމައެކަނި ވާހަކަ ދެއްކި ކަންކަން މި ސަރުކާރުން އަމަލީ ގޮތުން ތަންފީޒުކޮށް ނަތީޖާ ނެރެމުންދާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް ވިދާޅުވި ގޮތުގައި މި ސަރުކާރުން އަބަދުވެސް ވާހަކަ ދައްކާނީ އަމަލީ ނަތީޖާއިންނެވެ. އެގޮތުން ގައުމަށް ދިމާވެފައިވާ އިގުތިސާދީ ބޮޑެތި މައްސަލަތައް ހައްލުކުރުމަށްޓަކައި، އެމަނިކުފާނު ވެވަޑައިގެންނެވި ވައުދާ އެއްގޮތަށް ފައިސާ ޗާޕުނުކޮށް މާލީ ކަންކަން ހަމަޔަކަށް އެޅުވުމުގެ މަސައްކަތް ކުރިއަށް ގެންދަވާކަން ފާހަގަކުރެއްވިއެވެ. އަދި ކުރީ ސަރުކާރުތަކުން ނަގާފައިވާ ބޮޑެތި ލޯނުތައް އަދާކުރަމުން އިގުތިސާދު ފުޅާކޮށް ތަރައްގީކުރުމުގެ މަސައްކަތް ހަލުވި ދުވެލީގައި ކުރިއަށްދާ ކަމަށާއި، އިގުތިސާދު ވެއްޓިފައިވާ އަނދަވަޅުން ނަގައި ގައުމު މާލީ ގޮތުން މިނިވަންކުރުމުގެ މަސައްކަތް ބާރު ސްޕީޑުގައި ކުރައްވަމުން ގެންދަވާ ކަމަށްވެސް އެމަނިކުފާނު ވިދާޅުވިއެވެ.
ސިއްހީ ދާއިރާ ކުރިއެރުވުމަށް ސަރުކާރުން ކުރަމުންދާ މަސައްކަތްތަކަށް އަލިއަޅުއްވާލައްވަމުން ރައީސް ވިދާޅުވީ، ރާއްޖެއިން ބޭރަށް ގޮސްގެން ހޯދަންޖެހޭ ފަރުވާތައް މަދުކުރުމުގެ ގޮތުން ރާއްޖޭގެ ސިއްހީ ނިޒާމު އިތުރަށް ވަރުގަދަކުރަމުންދާ ކަމަށެވެ. މިކަމަށް ބޮޑެތި އިންވެސްޓްމަންޓްތަކެއް ކުރަމުންދާ ކަމަށާއި، ސަރުކާރުގެ އަމާޒަކީ ރާއްޖޭގެ ހުރިހާ ސަރަހައްދަކުން ވެސް ފެންވަރު ރަނގަޅު ސިއްހީ ހިދުމަތް ލިބޭނެ އިންތިޒާމު ހަމަޖެއްސުން ކަމަށް ވިދާޅުވިއެވެ. މީގެ އިތުރުން، އަންނަން އޮތް ޖީލުތައް ސިނގިރޭޓާއި ދުންފަތުގެ އަޅުވެތިކަމުން ސަލާމަތްކުރުމަށްޓަކައި ވޭޕް މަނާކުރުމާއި ފިޔަވަޅުތައް ވަރުގަދަކުރުމަށް ނިންމާފައިވާކަން އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ.
ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށް ފަށާފައިވާ މަޝްރޫއުތަކާ ގުޅޭގޮތުން ރައީސް ވިދާޅުވީ، މެދުއިރުމަތީގެ ހަނގުރާމައާ ގުޅިގެން އެ މަސައްކަތްތަކަށް ކޮންމެވެސް ވަރެއްގެ މަޑުޖެހުމެއް އައި ނަމަވެސް، މިހާރު އެ މަޝްރޫއުތައް އަލުން ބާރު ސްޕީޑުގައި ކުރިއަށްދާ ކަމަށެވެ. އަދި ފާއިތުވި ދެ އަހަރާއި ބައިގެ ތެރޭގައި މި ސަރުކާރުން އެކި ދާއިރާތަކުން ޖުމްލަ 590 މަޝްރޫއު ނިންމާފައިވާކަން ހާމަކުރައްވަމުން، ކުރިއަށް އޮތް ތަނުގައިވެސް ތަރައްގީގެ ގިނަ މަޝްރޫއުތަކެއް ފުރިހަމަކުރައްވާނެ ކަމުގެ ޔަގީންކަން ރައީސް މުއިއްޒު ވަނީ ދެއްވާފައެވެ.
ކިޔުންތެރިންގެ ހިޔާލު