ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނެރުއްވި ޚާއްޞަ ގަރާރެއްގެ ދަށުން، ފަތުރުވެރިކަމުގެ ބޭނުމަށް އައްޑޫ ސިޓީގެ އިހުތިސާސުން އެ އަތޮޅު ސަވާހެލި ރަސްމީކޮށް ވަކިކުރައްވައިފިއެވެ.
ރައީސް އޮފީހުން ހާމަކޮށްފައިވާ ގޮތުގައި، މި ނިންމެވުން ނިންމަވާފައިވަނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުން ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުންނެވެ. އެއީ އިދާރީ ދާއިރާތަކުގައި ހިމެނޭ ސިޓީ ކައުންސިލްތަކާއި ރަށު ކައުންސިލްތަކުގެ އިހުތިސާސް ކަނޑައެޅުމަށް ގާނޫނުން މަތިކޮށްފައިވާ ބާރެވެ. މި ބަދަލާއެކު، އައްޑޫ ސިޓީގެ އިހުތިސާސަށް އައި ބަދަލު ދައްކުވައިދޭ ޗާޓު މިހާރު ވަނީ ސަރުކާރުގެ ގެޒެޓުގައި ޝާއިއުކޮށްފައެވެ.
ސަވާހެއްޔަކީ އައްޑޫ ސިޓީގެ ގުޅިފައިވާ ރަށްތަކުގެ ތެރެއިން ފޭދުއާއި މަރަދޫފޭދޫގެ މެދަށް ވާ ގޮތަށް އޮންނަ ސަރަހައްދެކެވެ. މިއީ ކުރިންވެސް ފަތުރުވެރިކަމުގެ ބޭނުމަށް ތަރައްގީކުރުމުގެ ވިސްނުން ގެންގުޅެފައިވާ ތަނެކެވެ. އެގޮތުން، ފަތުރުވެރިންނަށް ބޭނުންކުރެވޭ ގޮތަށް އެ ތަން ތަރައްގީކުރުމަށް 2021 ވަނަ އަހަރު އައްޑޫ ސިޓީ ކައުންސިލުން ނިންމާފައިވެއެވެ.
މި ނިންމެވުމުގެ ސަބަބުން، ސަވާހެލި ސީދާ ފަތުރުވެރިކަމުގެ ބޭނުމަށް ތަރައްގީކުރުމުގެ މަސައްކަތް ހަލުވިވެގެންދާނެ ކަމަށް ބެލެވެއެވެ. އަދި އައްޑޫ ސިޓީގެ ފަތުރުވެރިކަމުގެ ސިނާއަތް ކުރިއެރުވުމަށް ސަރުކާރުން ކުރަމުންދާ މަސައްކަތްތަކަށް މިކަމުގެ ސަބަބުން އިތުރު ބާރެއް ލިބިގެންދާނެއެވެ. މި ސަރަހައްދު ތަރައްގީވުމަކީ މުޅި އަތޮޅުގެ އިގުތިސާދަށްވެސް އޭގެ ހެޔޮ އަސަރުކުރާނެ ކަމެއްގެ ގޮތުގައި ވަނީ ފާހަގަކުރެވިފައެވެ.
ކިޔުންތެރިންގެ ހިޔާލު