އިމިގްރޭޝަނުގެ ޓާސްކުފޯހުން މިއަދު ކުރިއަށްގެންދިޔަ ހާއްސަ އޮޕަރޭޝަނެއްގައި މާލޭގެ 9 ކެފޭއަކުން 10 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
ގަވާއިދާ ހިލާފަށް ރާއްޖޭގައި އުޅެމުންދާ ބިދޭސީންގެ މައްސަލައަށް ހައްލެއް ހޯދުމަށް ސަރުކާރުން ކުރަމުންދާ މަސައްކަތުގެ ތެރެއިން، މޯލްޑިވްސް އިމިގްރޭޝަންގެ ޓާސްކް ފޯސްއިން ވަނީ މިއަދު ހެނދުނު މާލޭގައި ހާއްސަ ރެއިޑު އޮޕަރޭޝަނެއް ކުރިއަށް ގެންގޮސްފައެވެ. މި އޮޕަރޭޝަނުގައި މާލޭގެ 9 ކެފޭއެއް ބަލައި ފާސްކޮށްފައިވެއެވެ. އަދި މި ތަންތަނުގައި ގަވާއިދާ ހިލާފަށް މަސައްކަތްކުރަމުންދިޔަ 10 ބިދޭސީއަކު ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައެވެ. މިއީ މާލެ ސަރަހައްދުގައި ހިންގާ ކާބޯތަކެތީގެ ހިދުމަތްދޭ ތަންތަނުގައި ގަވާއިދާ ހިލާފަށް ބިދޭސީން ގެންގުޅޭ މައްސަލަ ހައްލުކުރުމަށް އެ އިދާރާއިން ފަށާފައިވާ ހާއްސަ ހަރަކާތުގެ ބައެކެވެ.
މިއަދުގެ އޮޕަރޭޝަންގެ އިތުރުން، މި މަހުގެ އެކި ދުވަސްމަތިން އިމިގްރޭޝަނުން ވަނީ ބޮޑެތި އޮޕަރޭޝަންތަކެއް ހިންގާފައެވެ. އެގޮތުން، މި މަހުގެ 5 ވަނަ ދުވަހުގެ ރޭ މާލޭގެ ފުޑް ކޯޓު ސަރަހައްދުގައި ހިންގި ހަރަކާތުގައި 88 ބިދޭސީއަކު ބަލައި ފާސްކޮށް، އޭގެ ތެރެއިން 27 ބިދޭސީއަކު ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައެވެ. މީގެ އިތުރުން، މި މަހުގެ 11 ވަނަ ދުވަހު ތިލަފުށީގައި ކުރިއަށްގެންދިޔަ ފުޅާ ދާއިރާއެއްގެ ރެއިޑް އޮޕަރޭޝަނުގައި 836 ބިދޭސީން ބަލައި ފާސްކޮށްފައިވެއެވެ. އަދި އޭގެ ތެރެއިން ގަވާއިދާ ހިލާފަށް އުޅެމުންދިޔަ 32 ބިދޭސީއަކު ވަނީ އެ މުއައްސަސާގެ ބެލުމުގެ ދަށަށް ގެންގޮސްފައެވެ.
ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލައަކީ ގައުމީ ސަލާމަތާއި އިގުތިސޯދާ ގުޅިފައިވާ ބޮޑު މައްސަލައަކަށް ވުމާއެކު، އިމިގްރޭޝަނާއި ގުޅުންހުރި އެހެނިހެން މުއައްސަސާތައް ގުޅިގެން ދަނީ މިކަމަށް އަވަސް ހައްލެއް ހޯދުމަށް ގިނަ މަސައްކަތްތަކެއް ކުރަމުންނެވެ. މިގޮތުން، މާލެއާއި އަތޮޅުތެރޭގެ އެކި ސަރަހައްދުތަކުގައި ގަވައިދުން ފާސްކުރުމުގެ ހަރަކާތްތައް ހިންގައި، ގާނޫނާ ހިލާފަށް އުޅޭ ފަރާތްތަކާމެދު ދަނީ ހަރުކަށި ފިޔަވަޅުތައް އަޅަމުންނެވެ.
ކިޔުންތެރިންގެ ހިޔާލު