ރާއްޖެއާއި އިންޑިއާއާ ދެމެދު ގާއިމުކުރުމަށް މަޝްވަރާކުރަމުންދާ މިނިވަން ވިޔަފާރީގެ އެއްބަސްވުމުގެ ސަބަބުން ރާއްޖޭގެ މެރިޓައިމް ސިނާއަތަށާއި ވިޔަފާރިތަކަށް ދުނިޔޭގެ ބޮޑެތި މާކެޓުތަކުން އާ ފުރުސަތުތަކެއް ފަހިވެގެންދާނެކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
އިންޑިއާގެ ކޮމާސް މިނިސްޓަރު ޕިޔޫޝް ގޯޔަލްއާއެކު ބޭއްވެވި މަޝްވަރާތަކަށްފަހު އިންޑިއާގެ ވިއޮން ނޫހަށް ދެއްވި އިންޓަވިއުއެއްގައި މިނިސްޓަރު މުހައްމަދު ސައީދު ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދާދިފަހުން އިންޑިއާއަށް ކުރެއްވި ދަތުރުފުޅުގެ ސަބަބުން ދެ ގައުމުގެ ގުޅުން ވަރަށް ބޮޑަށް ހަރުދަނާވެފައިވާ ކަމަށެވެ. އަދި އިންޑިއާގެ ނިއުދިއްލީ އާއި ބެންގަލޫރާއި މުމްބާއީގައި ބޭއްވުނު ވިޔަފާރީގެ ފޯރަމްތަކަށްފަހު ދެ ގައުމުގެ އަމިއްލަ އަދި ސަރުކާރުގެ ކުންފުނިތަކުގެ މެދުގައި އޮންނަ ގުޅުން ބަދަހިކުރެވި އިންވެސްޓްމަންޓުތަކަށް އާ ފުރުސަތުތަކެއް ހުޅުވިފައިވާކަމަށް އެމަނިކުފާނު ފާހަގަކުރެއްވިއެވެ.
ދެ ގައުމުގެ ދެމެދުގައި ގާއިމުކުރުމަށް މަސައްކަތްކުރަމުންދާ ފްރީ ޓްރޭޑް އެގްރީމަންޓް ނުވަތަ މިނިވަން ވިޔަފާރީގެ އެއްބަސްވުމަކީ ރާއްޖޭގެ ކުދި އަދި މެދުފަންތީގެ ވިޔަފާރިތަކަށް ލިބޭނެ ވަރަށް ބޮޑު ކުރިއެރުމެއްކަމަށް މިނިސްޓަރު ވިދާޅުވިއެވެ. މި އެއްބަސްވުމުގެ ދަށުން ދުނިޔޭގެ އެންމެ ބޮޑު އަދި އެންމެ ހަލުވިކޮށް ކުރިއަރަމުން އަންނަ މާކެޓުތަކަށް ވަނުމުގެ ފުރުސަތު ދިވެހި ވިޔަފާރިތަކަށް ފަހިވެގެންދާނެއެވެ. ހަމައެއާއެކު ރާއްޖޭގެ މެރިޓައިމް ސިނާއަތަށް މިކަމުގެ ސަބަބުން ގިނަ ފައިދާތަކެއް ލިބި ސަރަހައްދީ ވެލިއު ޗޭންތަކާ ގުޅިގެން މަސައްކަތްކުރުމުގެ މަގު ތަނަވަސްވެގެންދާނެކަން ވެސް އެމަނިކުފާނު ފާހަގަކުރެއްވިއެވެ.
މިނިވަން ވިޔަފާރީގެ އެއްބަސްވުމުގެ އިތުރުން އިންޑިއާއާއެކު މަޝްވަރާތައް ނިމިފައިވާ ބައިލެޓަރަލް އިންވެސްޓްމަންޓް ޓްރީޓީގެ ސަބަބުން ފަތުރުވެރިކަމާއި ލޮޖިސްޓިކްސް އާއި ސިއްހީ ދާއިރާއާއި ތައުލީމާއި އިއާދަކުރަނިވި ހަކަތައިގެ އިތުރުން ޑިޖިޓަލް އިގުތިސޯދު ފަދަ މުހިންމު ދާއިރާތަކަށް އިންޑިއާގެ އިންވެސްޓްމަންޓުތައް އިތުރުވެގެންދާނެއެވެ. މިކަމުގެ ސަބަބުން އިންވެސްޓަރުންގެ އިތުބާރު ބޮޑުވެ ވަޒީފާގެ އާ ފުރުސަތުތައް އުފެދި ޓެކްނޮލޮޖީއާއި ހުނަރު ތަރައްގީކުރުމަށް ބޮޑު އެހީތެރިކަމެއް ލިބޭނެކަމަށް މިނިސްޓަރު ސައީދު ވިދާޅުވިއެވެ.
އެފްޓީއޭގެ ސަބަބުން ކަސްޓަމްސްގެ މަރުހަލާތައް ލުއިވެ ވިޔަފާރިކުރުމުގެ ހަރަދު ކުޑަވުމާއެކު ސަޕްލައި ޗެއިން ހަރުދަނާވެގެންދާނެކަން ވަނީ ފާހަގަކުރައްވާފައެވެ. އަދި މިއީ އިންޑިއާގެ ވިޔަފާރިތަކަށާއި އިންވެސްޓަރުންނަށް ވެސް ފަހިވެގެންދާނެ ބޮޑު ފުރުސަތެއްކަމަށާއި މިކަމުގެ ސަބަބުން އިންޑިއާއާއެކު އޮންނަ އިގުތިސޯދީ ގުޅުން އިތުރަށް ވަރުގަދަވެގެންދާނެކަމަށް ވެސް މިނިސްޓަރު ވަނީ ވިދާޅުވެފައެވެ. އިންޑިއާއާއި ރާއްޖެއާ ދެމެދު އެފްޓީއޭގެ މަސައްކަތްތައް ފަށަން ނިންމައި އެކަން އިއުލާނުކުރީ 2024 ވަނަ އަހަރު ރައީސް މުއިއްޒު އިންޑިއާއަށް ކުރެއްވި ރަސްމީ ދަތުރުފުޅުގެ ތެރެއިންނެވެ.
ކިޔުންތެރިންގެ ހިޔާލު