އެއްވެސް އުޒުރެއް ނެތި ދަރިވަރުން ސްކޫލަށް ނުދާނަމަ ހަރުކަށި ފިޔަވަޅު އަޅަން ސްކޫލްތަކަށް އަންގާފައިވާނެ ކަމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ރައްޔިތުންގެ މަޖިލިހުގައި މިއަދު ވިދާޅުވެއްޖެއެވެ.
މި ދުވަސްވަރު ދުވާލަކު 8،000 ކުދިން ސްކޫލަށް ހާޒިރުނުވާ ކަމަށާއި އޭގެ ތެރޭގައި ގިނައީ މާލެ ސަރަހައްދުގެ ސްކޫލްތަކުގެ ދަރިވަރުން ކަމަށް ޝަފީއު މީގެކުރިން ވަނީ ވިދާޅުވެފައެވެ. ޝަފީއު ވިދާޅުވީ ދަރިވަރުންގެ ނަތީޖާ އެކަށީގެންވާ މިންވަރެއްގައި ހިފެހެއްޓުމަށް ސްކޫލަށް ހާޒިރުވާން ޖެހޭނެ ކަމަށެވެ.
“ސްކޫލަށް ހާޒިރުނުވާ ދަރިވަރުންގެ 40 ޕަސެންޓަކީ މާލެ ސަރަހައްދުގެ ސްކޫލްތަކުގެ ދަރިވަރުން. ސްކޫލަށް ހާޒިރު ނުވެ، ފިލާވަޅުތައް ގެއްލޭނަމަ ނަތީޖާއަށް އަސަރު ކުރާނެ.” ކީސްޓޭޖް-3 2025 ގެ ނެޝަނަލް އެސެސްމަންޓް އޮފް ލާނިން އައުޓްކަމްސް ރިޕޯޓް އާންމު ކުރުމަށް މިދިޔަ ބުރާސްފަތި ދުވަހު ބޭއްވި ރަސްމިއްޔާތުގައި ޝަފީއު ފާހަގަކުރެއްވިއެވެ.
މަޖިލިހުގެ މިއަދުގެ ޖަލްސާގައި މެމްބަރަކު ކުރެއްވި ސުވާލަކަށް ޖަވާބު ދެއްވަމުން ޝަފީއު ވިދާޅުވީ ދަރިވަރުންގެ ހާޒިރީ ކަންތައް މިނިސްޓްރީން އެންމެ ފުރަތަމަ ވެސް ބަލަން ފެށީ ކުރީގެ ރައީސް އަބްދުﷲ ޔާމީންގެ ދައުރުގައި ޕީޕީއެމް ސަރުކާރުގައި ކަމަށާއި އޭގެ ފަހުން އައި އެމްޑީޕީ ސަރުކާރުން އެކަންތައް ދޫކޮށްލައިގެން ތިބި ކަމަށެވެ.
އެޓެންޑެންސް ޕޮލިސީއެއް އޮންނައިރު، ދަރިވަރުންގެ އެޓެންޑެންސް ސްކޫލްތަކުން މިނިސްޓްރީއާ ހިއްސާކުރަން ޖެހޭ ގޮތަށް އޮތް ނަމަވެސް ގަވައިދުން އެކަން ނުކުރާކަން ޝަފީއު ފާހަގަކުރެއްވިއެވެ.
“އެކަމަކު މިއަހަރު ޖޫން މަހުގެ ތެރޭގައި އަޅުގަނޑުމެން ކުރިން ކުރި މަސައްކަތްތަކަކާ އެކުގައި ސްކޫލްތަކުން މިހާރު މަޖުބޫރުވާނެ ކޮންމެ ދުވަހެއްގެ އެޓެންޑެންސް މިނިސްޓްރީ އޮފް އެޑިއުކޭޝަނަށް ފޮނުވަން ޖެހޭނެ. އެ ފޮނުވުމުގެ ތެރެއިން އަޅުގަނޑުމެންނަށް ދެނެގަނެވުނީ ފުދޭވަރަކަށް ގިނަ އަދަދެއްގެ ދަރިވަރުން ސްކޫލަށް ނުދާކަން.” ޝަފީއު ވިދާޅުވިއެވެ.
ކިޔުންތެރިންގެ ހިޔާލު