ތައުލީމީ މުއައްސަސާތަކުގެ ނަން ބޭނުންކޮށްގެން ޔޫނިއަންތައް އުފެއްދުމަކީ ގާނޫނާ ހިލާފުކަމެއް ކަމަށާއި، އިސްކަންދަރު ސްކޫލްގެ ނަމުގައި އުފައްދާފައިވާ ޔޫނިއަން ބަލައިނުގަންނާނެ ކަމަށް ތައުލީމާއި މަތީތައުލީމާއި ހުނަރުތައް ތަރައްގީކުރުމާ ބެހޭ ވަޒީރު ޑރ. އިސްމާއިލް ޝަފީއު ވިދާޅުވެއްޖެއެވެ.
ޔޫނިއަން ރަޖިސްޓްރީކުރުމާ ގުޅޭ ގަވާއިދުގައި ބަޔާންކޮށްފައިވާ ގޮތުން ދިވެހި ދައުލަތުގެ މުއައްސަސާއެއްގެ ނަމެއް ނުވަތަ އެފަދަ މުއައްސަސާއެއްގެ ނަމަކާ އޮޅުން އަރާފާނެ ފަދަ ނަމެއް ޔޫނިއަނަކަށް ނުކިޔޭނެއެވެ. މިކަމާ ގުޅޭގޮތުން ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ކުރެއްވި ސުވާލަކަށް ޖަވާބު ދެއްވަމުން ވަޒީރު ވިދާޅުވީ، ސްކޫލްތަކަކީ އާއްމު ކުންފުނިތަކާ ހިލާފަށް ހާއްސަ ސިފަތަކަކާއި ހިފެހެއްޓުންތަކެއް ލިބިފައިވާ ތަންތަން ކަމަށެވެ. އެހެންކަމުން ގަވާއިދުގެ 12 ވަނަ މާއްދާގެ (ހ)ގެ 4 ވަނަ ނަމްބަރަށް ރިއާޔަތްކޮށް، ވަކި ސްކޫލެއްގެ ނަން ބޭނުންކޮށްގެން ޔޫނިއަނެއް އުފެއްދުމަކީ ގަބޫލުކުރެވޭނެ ކަމެއް ނޫން ކަމަށް ވަޒީރު ފާހަގަކުރެއްވިއެވެ.
އިސްކަންދަރު ސްކޫލްގެ ޓީޗަރުން އުފެއްދި ޔޫނިއަން ބަލައިނުގަންނާނެކަމަށް އެ ސްކޫލްގެ ޕްރިންސިޕަލް އެންގެވީ ވުޒާރާގެ އިރުޝާދުގެ ދަށުން ކަމަށް ވަޒީރު ވިދާޅުވިއެވެ. އަދި އެ ޔޫނިއަން ރަޖިސްޓްރީކޮށްފައިވަނީ ގަވާއިދާ އެއްގޮތަށް ކަމަށް ވުޒާރާއިން ނުދެކޭތީ، އެ މައްސަލަ ޔޫނިއަންތަކުގެ ރަޖިސްޓްރާއަށް ހުށަހެޅުމަށް ތައްޔާރުވަމުން އަންނަ ކަމަށް ވެސް ވަޒީރު ވިދާޅުވިއެވެ. މެންބަރު މައުރޫފް ފާހަގަކުރެއްވި ގޮތުގައި އެ ޔޫނިއަން މިދިޔަ ޖެނުއަރީ މަހު ދާހިލީ ވުޒާރާގައި ރަޖިސްޓްރީކޮށްދީފައިވީ ނަމަވެސް، ވަޒީރު ވިދާޅުވީ ސަރުކާރުގެ އިދާރާއަކުން ރަޖިސްޓްރީކުރި ނަމަވެސް އެކަށީގެންވާ ވަރަށް ބަލައިލުމެއް ނެތި އެކަން ކުރެވިފައިވާ ކަމަށެވެ.
ސަރުކާރުން ޓީޗަރުންގެ ހައްގުތައް ހޯދައިދިނުމަށް ގިނަ މަސައްކަތްތަކެއް ކުރަމުންދާ ކަމަށާއި، މިހާރު ވެސް ޓީޗަރުންނާ ގުޅޭ މައްސަލަތަކުގައި މުއާމަލާތުކުރުމަށް ފުރިހަމަ ޕްލެޓްފޯމްތައް ގާއިމުވެފައި ހުރި ކަމަށް ވަޒީރު ވިދާޅުވިއެވެ. ވަކިވަކި ސްކޫލްތަކުގެ ނަމުގައި ޔޫނިއަންތައް އުފައްދައިގެން ޓީޗަރުންގެ ތެރޭގައި ބައިބައިވުން އުފެއްދުމަކީ ސަރުކާރުން ތާއީދުކުރާ ކަމެއް ނޫން ކަމަށް ވަޒީރު ތަކުރާރުކޮށް ވިދާޅުވިއެވެ. އެހެންނަމަވެސް ސްކޫލްތަކުގެ ތެރޭގައި ޓީޗަރުންގެ ހައްގުތައް ހިމާޔަތްކުރުމަށް އަބަދުވެސް ފުރުސަތު ދޭނެ ކަމުގެ ޔަގީންކަން ވަޒީރު ދެއްވިއެވެ.
ކިޔުންތެރިންގެ ހިޔާލު