ރާއްޖޭގައި ބޭރު ފައިސާގެ ދަތިކަން އިންތިހާއަށް ބޮޑުވެފައިވަނީ ކުރީގެ ރައީސް މުހައްމަދު ނަޝީދުގެ ސަރުކާރުގައި ޑޮލަރުގެ ރޭޓަށް ގެނައި ބަދަލުގެ ސަބަބުން ކަމަށް އިކޮނޮމިކް މިނިސްޓަރު މުހައްމަދު ސައީދު މިއަދު ރައްޔިތުންގެ މަޖިލީހުގައި ވިދާޅުވެއްޖެެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވައިކަރަދޫ ދާއިރާގެ އެމްޑީޕީ މެންބަރު ހުސެން ޒިޔާދު ވަނީ ކަޅުބާޒާރުގައި ޑޮލަރުގެ އަގު 20 ރުފިޔާއަށްވުރެ މަތީގައި ހުރުމާ ގުޅިގެންނާއި، ޑޮލަރުގެ އަގު ހެޔޮވާނީ ކޮން އިރަކުންތޯ މިނިސްޓަރާ ސުވާލު ކުރައްވައިފައެވެ. މި ސުވާލަށް ޖަވާބު ދެއްވަމުން މިނިސްޓަރު ސައީދު ވިދާޅުވީ، 2008 ވަނަ އަހަރު އައި އެމްޑީޕީ ސަރުކާރުން ޑޮލަރު މާރުކުރާ ރަސްމީ ރޭޓު 10 ރުފިޔާއާއި 15 ރުފިޔާއާ ދެމެދުގެ ބޭންޑަކަށް ބަދަލުކުރުމަކީ މިއަދު ރައްޔިތުން ތަހައްމަލުކުރަމުންދާ ދަތިތަކުގެ ފެށުން ކަމަށެވެ. އެގޮތުން އޭރު ގެނައި ސިޔާސަތުގެ ސަބަބުން ރައްޔިތުންނަށް އަދިވެސް ސަލާމަތް ނުވެވިގެން އުޅޭކަމަށް މިނިސްޓަރު ތަކުރާރުކުރެއްވިއެވެ.
ޑޮލަރުގެ މައްސަލައިގައި އިތުރަށް ވާހަކަދައްކަވަމުން މިނިސްޓަރު ސައީދު ވަނީ ނިމިދިޔަ 19 ވަނަ ރައްޔިތުންގެ މަޖިލީހުގައި ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އަމަލުކުރި ގޮތަށްވެސް ފާޑުވިދާޅުވެފައެވެ. އެގޮތުން، ދައުލަތުގެ ހަރަދުތައް ހަމަޖެއްސުމަށްޓަކައި މާލިއްޔަތު ގާނޫނުގެ ބައެއް މާއްދާތައް ސަސްޕެންޑުކޮށް ފައިސާ ޗާޕުކުރުމަކީ ބޭރު ފައިސާގެ އަގު އުފުލިގެން ދިޔަ މައިގަނޑު އެއް ސަބަބުކަން އޭނާ ފާހަގަކުރެއްވި އެވެ. އެދުވަސްވަރުވެސް އޭގެ ނޭދެވޭ ނަތީޖާއާ މުސްތަގުބަލުގައި ކުރިމަތިލާންޖެހޭނެކަން ހަނދާންކޮށްދެއްވި ކަމަށް ސައީދު ވިދާޅުވިއެވެ.
ރާއްޖޭގެ ރަސްމީ ޑޮލަރު ރޭޓަކީ 15.42 ރުފިޔާ ނަމަވެސް، ކަޅުބާޒާރުގައި ޑޮލަރުގެ އަގު ކޮންޓްރޯލުން ނެއްޓިފައިވާތީ މަރުކަޒީ ބޭންކް (އެމްއެމްއޭ) އާއި ބޭންކް އޮފް މޯލްޑިވްސް ގުޅިގެން ދަނީ ފިޔަވަޅުތަކެއް އަޅަމުންނެވެ.
ކިޔުންތެރިންގެ ހިޔާލު